«Mnie tak škada jaho. Jon nie razumieje, što adbyvajecca». Były tvar prakramloŭskaj moładzi vykazaŭsia pra Pucina
Były kiraŭnik rasijskaha Fiederalnaha ahienctva pa spravach moładzi i zasnavalnik prakramloŭskich moładzievych ruchaŭ «Iduŝije vmiestie» i «Naši» Vasil Jakiemienka ŭ intervju błohieru Stanisłavu Ražańkovu vykazaŭ mierkavańnie, što Uładzimir Pucin nie razumieje, što i jak jon robić na pasadzie prezidenta, piša The Moscow Times.
«Dy mnie tak škada jaho. Jon nie razumieje, što adbyvajecca. Jon ščyra nie razumieje, što adbyvajecca. Jon mužyk taki rašučy, jon choča niešta zrabić, jon navat nie razumieje, dzie i što nie tak jon robić. A kali nasuprać jaho sadziacca voś hetyja ŭsie chłopcy, jakija ŭ kosmasie žyvuć, pačynajuć jamu davać parady, adnu durniejšuju za inšuju. I voś jon taki siadzić i pytajecca ŭ siabie: «Dyk ja 30 hadoŭ va ŭładzie. Što ja zrabiŭ, što ja mahu jašče zrabić? Za što ni paciahnieš — ničoha nie vychodzić», — zajaviŭ Jakiemienka.
Na jahonuju dumku, situacyja, jakaja skłałasia ŭ Rasii, abumoŭlenaja sistemnymi prablemami, siarod jakich niekampietentnaść abo karumpavanaść čynoŭnikaŭ.
«I voś ty siadziš naviersie, u ciabie poŭnaja iluzija, što ty možaš niešta zrabić. I vyśviatlajecca, što ŭsio, što možaš zrabić, nu darohu pabudavać i našlopać hetych bietonnych błokaŭ. […] Tak, heta ŭsio, što jon [Pucin] zrabiŭ, heta kašmar. Ale heta nie kašmar, a toje, što jon i nie moh bolš ničoha zrabić. Čałaviek tolki sam moža z saboj niešta zrabić. I ja dumaju, što da jaho heta ciapier dachodzić pavolna, a što jon zrobić? 30 hadoŭ užo», — dadaŭ były moładzievy lidar.
Akramia taho, jon pryznaŭsia, što hałoŭnym dasiahnieńniem jahonaj ułasnaj pracy va ŭładzie stali hrošy i nieruchomaść. Na pytańnie ab tym, ci ličyć jon svaje dziejańni na dziaržaŭnaj słužbie biazhłuździcaj, eks-čynoŭnik adkazaŭ:
«Nu jak heta biazhłuździca? Ja zarabiŭ šmat hrošaj. Vy sa mnoj ciapier razmaŭlajecie šmat u čym tamu, što ŭ mianie była za plačyma hetaja historyja. Ja pabudavaŭ sabie dom, i nie adzin. Heta było całkam asensavanaje mierapryjemstva».
Paśla zakančeńnia čynoŭnickaj karjery Jakiemienka pajšoŭ u biznes, dla čaho zaroblenyja padčas dziaržaŭnaj pracy kapitały, vidać, dobra prydalisia.
Kamientary