Siarhiej Minski — były śpiavak, a ciapier pradziusar «Faktar.baj» na BT — pajechaŭ u Varšavu na vystavu, kab znajści idei dla novych praŭładnych mierapryjemstvaŭ.
Śpiavak Siarhiej Minski źjaviŭsia na biełaruskaj estradzie naprykancy 90-ch. U 1998 hodzie vystupiŭ na «Słavianskim bazary», a ŭ 2001-m navat atrymaŭ uznaharodu jak śpiavak hoda.
Ale nulavyja prajšli, pra śpievaka padzabyli. Jon rašyŭ pajści za kulisy i stać pradziusaram, a taksama stvaryć ivent-ahienctva «Ružovaja ziebra».
Darečy, hetamu ahienctvu daviarali pravodzić šmat padziej, jakija niejkim čynam źviazany ź dziaržavaj. Naprykład, z 2018 pa 2020 hod «Ružovaja ziebra» pravodziła Kaladny chakiejny turnir na pryzy Łukašenki. A ŭ 2022 hodzie ładziła Kubak pasolstva Rasii ŭ Biełarusi, pryśviečany Dniu Rasii.
Taksama supracoŭniki ivent-ahienctva ŭdzielničali ŭ padrychtoŭcy vakalnaha šou BT «Faktar.baj». A Siarhiej Minski asabista kožny tydzień sustrakaŭ u aeraporcie rasijskuju śpiavačku Volhu Buzavu (jana była siarod nastaŭnikaŭ prajekta), daryŭ joj kvietki i častavaŭ kavaj z buterbrodami.
Ale ŭsio heta letaś nie ŭratavała «Ružovuju ziebru» padčas dzikaha palavańnia HUBAZiKa na ivent-ahienctvy. Pa danosie Volhi Bondaravaj zatrymali adnaho z suzasnavalnikaŭ «Ružovaj ziebry» Aleha Astralenku. Razzłavała danosčycu toje, što ŭ instahramie kampanii byli videa ź mierapryjemstvaŭ, jakija pravodziŭ Jaŭhien Bułka. Paśla z akaŭnta terminova vydalili 19 dopisaŭ.
Minkult vyklučyŭ kampaniju z rejestra arhanizataraŭ kulturnych mierapryjemstvaŭ. Na pracy Siarhieja Minskaha zatrymańnie partniora nijak nie adbiłasia. U jaho zastaŭsia druhi prajekt — «Pieršaja pradziusarskaja kampanija», dzie Siarhiej źjaŭlajecca dyrektaram.
U akaŭncie kampanii paznačana, što jana zajmajecca arhanizacyjaj šou-turaŭ «Faktar.baj». «Pieršaja pradziusarskaja kampanija» pijaryć artystaŭ, jakija hatovy śpiavać «Nado!» Łukašenku — naprykład, Naściu Kraŭčanka i Mikitu Bialko.
Artysty kampanii na čale ź Siarhiejem Minskim pryniali ŭdzieł u praŭładnym fłešmobie «Nado!», kab padtrymać rašeńnie Łukašenki iści na čarhovyja vybary.
Ciapier Siarhiej Minski padzialiŭsia ŭ storys u svaim instahramie, što pajechaŭ šukać natchnieńnie ŭ Polšču — a kankretniej, na vystavu rekłamy i palihrafii RemaDays, jakaja prachodziła ŭ Varšavie naprykancy studzienia. Žartavaŭ, što znajšoŭ idei, jakija budzie vykarystoŭvać «Pieršaja pradziusarskaja kampanija».
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary