Stała viadoma, što za amierykaniec niadaŭna byŭ vyzvaleny ź biełaruskaj turmy
Na minułym tydni režym Łukašenki ŭ vyniku damoŭlenaści z amierykancami vyzvaliŭ z-za krataŭ troch palitviaźniaŭ. Imiony dvuch byli adrazu viadomyja — Andrej Kuźniečyk i Alena Maŭšuk. A voś pra treciaha było viadoma tolki toje, što jon hramadzianin ZŠA. Ciapier ža telekanał «Dožd́» daviedaŭsia jahonaje imia — Mikałaj Šuhajeŭ.
56-hadovy Mikałaj Šuhajeŭ raskazaŭ «Doždiu», što ŭ jaho jość amierykanskaje i ŭkrainskaje hramadzianstva. U Biełarusi jon znachodziŭsia z 2020 hoda, kudy pryjechaŭ da siamji i svajho maleńkaha syna.
Pa słovach Šuhajeva, mienavita žonka, ź jakoj u jaho sapsavalisia adnosiny, i napisała na jaho danos biełaruskim uładam. Paśla taho jaho 5 miesiacaŭ trymali ŭ biełaruskich SIZA pavodle palityčnych artykułaŭ.
Mikałaj byŭ padpisany ŭ sacsietkach na «NEXTA Live», «Radyjo Svaboda», «Biełsat» i inšyja kanały dy miedyja, pryznanyja režymam «ekstremisckimi», praz što i byŭ zatrymany 12 vieraśnia 2024 hoda.
Spačatku Šuhajevu pastavili ŭ vinu raspaŭsiud ekstremisckich materyjałaŭ i pasadzili na 13 sutak u izalatar Navapołacka. Zatym pajšli jašče try takija ž administracyjnyja aryšty pavodle novaha składu złačynstva.
«Siłaviki pytajucca: navošta ŭ ciabie na padakońniku lažyć kniha Džordža Orueła «1984»? Ja kažu: «Jak navošta? Čytać». Tak, kali jany pravodzili pieratrus, jany kanfiskavali navat hetuju knihu. U mianie ŭ kvatery visieli ściahi dźviuch krain — amierykanski i ŭkrainski. Ściahi taksama kanfiskavali», — raskazaŭ mužčyna.
Umovy ŭ izalatary Šuhajeŭ nazyvaje katoŭniaj: jamu nie dazvalali mycca, narmalna spać i vielmi słaba karmili. Taksama ŭ dačynieńni da źniavolenaha praktykavali katavańnie pad nazvaj «łastaŭka», śćviardžaje mužčyna.
U izalatary Šuhajeŭ prabyŭ 56 dzion, paśla čaho mužčynu pieraviali ŭ SIZA KDB u Miensku i raspačali suprać jaho kryminalnuju spravu za publičnuju abrazu Łukašenki, asnovaj dla jakoha staŭ kamientar u instahramie. Tam jon pravioŭ jašče try miesiacy.
12 lutaha Šuhajeŭ vyjšaŭ na volu pry sadziejničańni amierykanskich uładaŭ. Ciapier Mikałaj znachodzicca ŭ San-Antonia (štat Techas), u miedycynskaj klinicy na terytoryi vajskovaj bazy, dzie prachodzić reabilitacyju. Za 5 miesiacaŭ źniavoleńnia jon straciŭ 20 kiłahramaŭ, mužčyna skardzicca na prablemy sa zrokam. Taksama pa vynikach analizaŭ u mužčyny jość padazreńnie na suchoty, jakija jon moh padchapić u izalatary.
«Łukašenka ničoha nie atrymaŭ za hety abmien». Pa palitviaźniaŭ u Minsk pryjazdžaŭ supracoŭnik Dziarždepa Krys Śmit
«Prakuror skazaŭ, što mnie treba pakinuć Biełaruś». Byłaja palitźniavolenaja Alena Maŭšuk raskazała pra ŭmovy svajho vyzvaleńnia
Amierykancy zabrali ź biełaruskaj turmy žurnalista Andreja Kuźniečyka i jašče dvuch palitźniavolenych
Pres-sakratarka Łukašenki prakamientavała vyzvaleńnie Biełaruśsiu amierykanca
Cichanoŭskaja sustrełasia z amierykanskim čynoŭnikam, jaki pryjazdžaŭ u Minsk pa palitviaźniaŭ
Kamientary