Tramp zajaviŭ, što Ukraina i ZŠA nie pavinny byli dazvolić Rasii pačać vajnu
Raniej prezident ZŠA zajaviŭ, što Ukraina nie pavinna była pačynać vajnu try hady tamu, što vyklikała šyrokuju chvalu krytyki ŭ jaho adras.
U piatnicu prezident Donald Tramp udakładniŭ, što Rasija sapraŭdy ŭvarvałasia va Ukrainu i zajaviŭ, što Kijeŭ nieŭzabavie padpiša sa Złučanymi Štatami pahadnieńnie ab karysnych vykapniach u ramkach namahańniaŭ pa spynieńni vajny, paviedamlaje «Hołas Amieryki».
U aŭtorak Tramp skazaŭ, što Ukraina «nie pavinna była pačynać» vajnu try hady tamu, vyklikaŭšy chvalu krytyki jak unutry krainy, tak i na mižnarodnym uzroŭni.
U piatnicu, kali jaho spytali pra heta ŭ intervju radyjostancyi Fox News, jon pryznaŭ, što Rasija ŭvarvałasia va Ukrainu na zahad Pucina.
«Rasija napała, ale jany nie pavinny byli dazvolić joj napaści», — skazaŭ Tramp, dadaŭšy, što prezident Ukrainy Uładzimir Zialenski i tahačasny prezident ZŠA Džo Bajden pavinny byli zrabić zachady, kab praduchilić uvarvańnie.
Tramp taksama pradkazaŭ, što pahadnieńnie ab karysnych vykapniach budzie dasiahnutaje najbližejšym časam.
«My padpišam pahadnieńnie, spadziajusia, u najbližejšyja davoli karotkija terminy», — skazaŭ Tramp žurnalistam u Avalnym kabiniecie, kali jaho spytali ab mahčymaj ździełcy pa karysnych vykapniach Ukrainy.
Uładzimir Zialenski taksama paviedamiŭ u piatnicu, što ŭkrainskaja i amierykanskaja kamandy pracujuć nad prajektam pahadnieńnia. «Ja spadziajusia na… spraviadlivy vynik», — skazaŭ jon u videazvarocie.
Donald Tramp taksama zajaviŭ žurnalistam, što nie pajedzie ŭ Maskvu na śviatkavańnie 80-j hadaviny Pieramohi i zakančeńnia Druhoj suśvietnaj vajny ŭ Jeŭropie.
Raniej pra mahčymaść vizitu amierykanskaha prezidenta na mierapryjemstvy 9 maja ŭ Maskvie napisali niekalki jeŭrapiejskich vydańniaŭ. Pryjezd Trampa ŭ Maskvu pakul nie płanujecca, taksama paviedamili i rasijskija ŭłady.
Kamientary
Pytańni nie da jaho a da pałovy amierykancaŭ jaki prahałasavali za kryminalnika