Biełarusam, jakija atrymali hrečaski šenhien, stali časta telefanavać z konsulstva
Uvaha da biełarusaŭ, jakija atrymali šenhienskuju vizu ci chočuć heta zrabić, uzmacniajecca. U śniežni supracoŭniki vizavaha centra Polščy abzvońvali tych, chto zapisaŭsia na padaču ŭ minskaj konsulskaj akruzie. Ich cikaviła, jak ludzi trapili ŭ čarhu. A ŭ lutym numar konsulstva Hrecyi ŭ Maskvie staŭ usio čaściej vyśviečvacca na telefonach biełarusaŭ, jakija atrymali šenhien hetaj krainy, piša «Lusterka».
U ludziej prosiać paćvierdzić broń u hateli. Kali čałaviek hetaha nie robić, to nastupstvy sumnyja.
Pa słovach vizavaj ekśpiertki i redaktarki visaflow.live Anastasii Łysakoŭskaj, ludziam, jakija atrymlivali hrečaski šenhien, i ŭ minułyja hady nabirali i pisali z konsulstva ŭ Maskvie. Mahli paprasić paćvierdzić broń u hateli. U lutym hetych zvankoŭ stała bolš.
«Raniej heta była chutčej redkaść, čym zakanamiernaść. Ciapier zvanki pastupajuć časta, — kaža ekśpiertka. — Padčas razmovy ŭ čałavieka prosiać vysłać na elektronnuju poštu ček apłaty hatela. Kali jon hetaha nie robić, vizu anulujuć u adnabakovym paradku. Toje ž adbyvajecca, kali konsulstva nie zmahło źviazacca z turystam».
Anastasija adznačaje, što ludziam telefanujuć randomna. Nabirajuć i tym, u kaho raniej byŭ hrecki šenhien, i tym, kamu jaho ŭkleili ŭpieršyniu. Adzinaja zakanamiernaść, jakuju jany z kalehami zaŭvažyli: ludzi, z kim źviazvalisia, za niekalki dzion da hetaha admianiali broń.
Jak konsulstva pra heta daviedałasia, Anastasija nie ŭ kursie. Miarkuje, što jany mahli ŭdakładnić u hatela ci pravieryć reziervacyju na sajcie: padajučysia na vizu, čałaviek paznačaje, dzie płanuje spynicca.
«Pra toje, što viza anulavanaja, čałavieka zahadzia mohuć nie papiaredzić. Heta tyčycca vypadkaŭ, kali da jaho nie datelefanavalisia, — kaža Anastasija. — Ad kalehaŭ viedaju, što niekatorym ich klijentam, jakija adkazali na zvanok, ale nie paćvierdzili broń, prychodziŭ list z paviedamleńniem: «konsulstva adpraŭlaje zapyt na anulavańnie». Ja tak razumieju, heta niejki ŭnutrany praces, vynik jakoha — admiena šenhiena. Adnak aficyjna pra vynik možna daviedacca, tolki kali im pieratelefanuješ ci ŭžo na miažy».
Čuła surazmoŭca i pra vypadki, kali čałaviek admoviŭsia ad broni. Praź niejki čas jamu patelefanavali z konsulstva, jon nie źniaŭ trubku, chutka aformiŭ novuju rehistracyju ŭ hateli, nabraŭ konsulstva, daŭ spravazdaču, ale jamu ŭsio roŭna skazali, što «adpravili zapyt na anulavańnie».
«I ŭsio, treba padavacca znoŭku», — adznačaje ekśpiertka.
Prava anulavańnia šenhiena prapisana ŭ artykule 34 Vizavaha kodeksa ES. Siarod inšaha ŭ im havorycca: «Viza moža być skasavanaja ŭ tym vypadku, kali vyjaŭlena, što ŭmovy vydačy pierastali vykonvacca». Siudy možna adnieści i admienu broni.
«U nas niama dakładnaha adkazu, čamu ludziam stali čaściej telefanavać, — kaža Anastasija. — Nakolki ja viedaju, źjaviŭsia novy konsuł. Mahčyma, u hetym pryčyna».
U śniežni pra zvanki ź vizavaha centra raskazvali biełarusy, jakija zapisalisia na polski šenhien. Havorka išła pra tych, chto naležyć da minskaj konsulskaj akruhi. Ich nabirali z pytańniem, jak jany trapili ŭ čarhu na padaču, i prasili nazvać kod, jaki čałavieku tut ža adpraŭlali na elektronnuju poštu. Kali jon nie moh hetaha zrabić, rehistracyju anulavali. Ekśpierty mierkavali, što tak zmahalisia ź vizavymi pasiarednikami.
Minčuki atrymali bałharskuju šenhienskuju vizu, ale za dzień da pajezdki jaje anulavali
Biełarusy mohuć zastacca biez šenhiena, navat kali jaho atrymali. Źjaviłasia novaja tendencyja anulavańnia viz
Jak atrymać šenhienskuju vizu ŭ Biełarusi samastojna. Praktyka i parady
«Biessensoŭna padavać apielacyju». Jak biełarusam admaŭlajuć u polskich vizach i što jany z hetym robiać
Śpiecpradstaŭnik MZS Polščy pa Biełarusi nie ličyć praces atrymańnia polskich vizaŭ składanym i darahim
Ciapier čytajuć
Biełaruska narakaje, što siem hadoŭ nie moža znajści pastajannuju pracu. A ŭ emihracyi stała jašče składaniej6
Kamientary