«Biessensoŭna padavać apielacyju». Jak biełarusam admaŭlajuć u polskich vizach i što jany z hetym robiać

Jak ni starałasia VFS Global abaranić elektronnuju sistemu reziervacyi vizitaŭ ad pasiarednikaŭ — z dapamohaj vieryfikacyi praź MSI (jaje ŭžo skasavali) abo z dapamohaj fota — ničoha nie vyjšła. Słotaŭ pa-raniejšamu nie złavić, i dapamahatary pa-raniejšamu prapanoŭvajuć svaje pasłuhi.

Da hetaj prablemy dadałasia novaja: navat paśpiachovaja padača dakumientaŭ nie harantuje vydačy vizy. Jana, viadoma, nikoli nie harantavała na 100%, ale apošnija miesiacy admoŭ jak nikoli šmat, vynikaje z paviedamleńniaŭ u čatach.

Fiodar raskazaŭ pra admovu ŭ pracoŭnaj vizie, niahledziačy na ofier z Google, adnak biełarusam taksama rehularna admaŭlajuć u nacyjanalnych (D) i turystyčnych vizach. Časta ŭ matyviroŭcy pakazany p. 10 — «sumnievy ŭ dakładnaści zajaŭlenaj mety znachodžańnia». 

Kiejsy, kali zajaŭniki ničoha nie razumiejuć

Voś jak pišuć pra takija kiejsy ŭ čatach:

• Padaŭsia na polskuju pracoŭnuju ŭ Mahilovie — admova, p. 10. Abskardziŭ u konsuła — taksama admova. Na abskardžańnie prynios umovu najmańnia miaškańnia, list ad firmy i damovu na navučańnie ŭ palicejałcy. Ničoha nie dapamahło. U Polščy žyvu i pracuju ŭžo try hady, usie padatki płaciŭ, firma z zaprašeńniem žyvaja, pracuju tam užo vosiem miesiacaŭ. Padaŭsia na pobyt, ale tam kanca-kraju nie vidać, a mnie ź siamiejnych [abstavin] treba byvać u Biełarusi. Chto sutykaŭsia z padobnymi rečami, što rabić, čamu jany lepiać admovy? 
• Siońnia zabraŭ pašpart. Atrymaŭ admovu pa pracoŭnaj vizie. Padača była 28 kastryčnika ŭ Homieli. 10-y punkt, standarcik. U mianie pieršy raz admova, nikoli takoha nie było.
• U mianie 8 admoŭ, i 2 admovy pa apielacyjach, [tak što] u ciabie jašče ŭsio dobra.

Receptaŭ na vypadak admovy dva: apielacyja i novaja padača. Pry hetym udzielniki čata schilajucca da taho, što apielavać da konsuła — marnaje dzieła: doraha (ad 1 červienia heta kaštuje 135 jeŭra) i nieefiektyŭna. Lepš padacca znoŭku — možna ŭ toj ža VC i z tymi ž dakumientami. Zekanomić naŭrad ci ŭdasca (bo ŭ dadatak da 35 jeŭra konsulskaha zboru pryjdziecca zapłacić pasiaredniku za novuju datu), ale šancaŭ na pośpiech tak nibyta bolš. Takija nazirańni pierakonvajuć udzielnikaŭ čata ŭ tym, što čaściakom admovy randomnyja.

• Biessensoŭna padavać apielacyju. Tolki lišnija hrošy vykinuć na viecier. Była ja ŭžo ŭ takoj situacyi. Taksama 10 p. I pa apielacyi taksama admova.
• Značyć, sprabujcie biez apielacyi. Znoŭ. Pakul nie atrymaješ vizy.
• U apošnija paru miesiacaŭ sapraŭdy šmat nieabhruntavanych admoŭ.

…i kali jany zdahadvajucca pra pryčyny

Ale byvajuć i inšyja kiejsy, kali zajaŭniki razumiejuć (abo dumajuć, što razumiejuć) pryčynu admovy. Tak, adna biełaruska miarkuje, što nie atrymała turystyčnaj vizy S (u matyvacyi — p. 10), bo pa papiaredniaj polskaj šenhienskaj vizie jeździła tolki ŭ Litvu i ŭ pašparcie niama štampa ab pierasiačeńni polskaj miažy. Płan — padavacca praź inšuju krainu.

Druhaja kaža, što pry pieršaj padačy nie prykłała harantyjnaha lista ad pracadaŭcy. Na jaje dumku, heta i stała pryčynaj admovy. Apielacyju padavać jana nie maje namieru, budzie łavić/kuplać datu na novy vizit u VC.

Treciaja biełaruska śćviardžaje, što pryčynaj admovy (taksama p. 10) była pamyłka ŭ dakumiencie. Jana jaje vypraviła, padałasia znoŭku i ciapier čakaje pašpart.

Byvaje, pretendentam admaŭlajuć pa p. 3 (niedastatkova srodkaŭ). U vypadku z pracoŭnaj vizaj heta adbyvajecca, kali ŭ damovie prapisanaja minimalnaja zp i jaje pamier užo sastareŭ (płanku minimalnaj zp rehularna pavyšajuć).

Chtości z udzielnikaŭ čata sprabuje prymiryć dva mierkavańni — što admovy spres niematyvavanyja i što ŭ vialikaj kolkaści admoŭ jość pryčyny: 

— Vielmi šmat faktaraŭ: jak pustyja admovy, tak i abhruntavanyja. Vielmi šmat levych zaprašeńniaŭ robiać, pa ich admoŭ bolš za ŭsio.

• 2
• 1
• 1
• 2
• 0
• 3
• 0
• 0