Maładuju minčanku, jakaja zajmałasia alternatyŭnaj miedycynaj, asudzili pa troch palityčnych artykułach. Imaviernaja pryčyna — kamientary ŭ telehramie
Sud nad Karynaj Malinoŭskaj skončyŭsia 24 lutaha 2025 hoda, ale infarmacyja pra jaje asobu stała viadomaja tolki ciapier. Dziaŭčynie mahło pahražać da 12 hadoŭ kałonii. Doma jaje čakajuć dvoje dziaciej.
Karynie Malinoŭskaj 32 hady. Jana rodam z Barysava. U joj dvoje niepaŭnaletnich dziaciej.
Paśla škoły Karyna pierajechała z Barysava ŭ Minsk, kab vučycca na cyrulnicu ŭ prafiesijna-techničnym licei №4. Miarkujučy pa sacsietkach, jana zavočna vučyłasia ŭ žanočym instytucie «Enviła», a paśla jaho likvidacyi ŭ 2012 hodzie — na humanitarna-ekanamičnym fakultecie Homielskaha dziaržaŭnaha techničnaha ŭniviersiteta.
Malinoŭskaja šmat u čym siabie sprabavała — pracavała cyrulnicaj, cikaviłasia psichałohijaj, z 2018 pa 2022 rabiła ŭłasny biznes pa prodažy śviatłodyjodnaha aśviatleńnia.
A niekalki hadoŭ tamu Karyna zachapiłasia tym, što jana sama nazyvaje nutrycyjałohijaj. Praŭda, padobna, u rečaisnaści heta bolš padobna da naturapatyi — alternatyŭnaj miedycyny, jakaja vieryć, što lačycca lepš naturalnymi srodkami.
Apošnija zapisy dziaŭčyny pryśviečanyja mienavita hetamu kirunku z rekamiendacyjami roznych BADaŭ i raspoviedami pra toje, što lepš jeści, a što lepš nie jeści. Mahčyma, na hetym jana i zarablała, pradajučy BADy pa svajoj refieralnaj prahramie — heta vid sietkavaha markietynhu.
Karynu Malinoŭskuju zatrymali ŭ sakaviku 2024 hoda. Sud nad joj pačaŭsia vosieńniu 2024-ha i skončyŭsia 24 lutaha 2025 hoda. Karynu vinavacili pa troch artykułach — «raspalvańnie varožaści» (č. 1 art. 130 KK), «udzieł u pratestach» (č. 1 art. 342 KK) i «zakliki da dziejańniaŭ, nakiravanych na pryčynieńnie škody Biełarusi» (č. 3 art. 361 KK).
My nie viedajem, u čym dakładna pryčyna, ale padazrajem, što ŭ kamientarach u telehramie. Sprava ŭ tym, što ŭ jaje byŭ stary akaŭnt, zarehistravany na jaje ŭłasny numar, ź jaje asabistym fota.
Kali jana pakidała ź jaho kamientary ź pieršapačatkova nieabaronienaha akaŭnta, abaranicca, na žal, faktyčna niemahčyma. U bazach HUBAZiK kamientary zastajucca nazaŭždy, navat kali ich vydalić, i «žorstka» pryviazvajucca da numara telefona i asoby.
Na praktycy heta moža pracavać tak — čałavieka zatrymlivajuć za niešta adno, paśla prabivajuć pa milicejskich bazach (ci hladziać telefon) i dadajuć jamu jašče artykuły. Pra takija vypadki raspaviadali ludzi, jakija traplali pad represii.
«Naša Niva» — bastyjon biełaruščyny
PADTRYMAĆ
Kamientary