Vydańnie «Zierkała» z dapamohaj «Kibierpartyzan», Belpol, Digital Intelligence Team i adkrytych krynic vyśvietliła, dzie aficyjna pracaŭładkavany Juryj Vaskrasienski, jaki z «novaha apazicyjaniera» staŭ praŭładnym aktyvistam.
Pavodle dadzienych aficyjnych rejestraŭ, u 2024 hodzie Vaskrasienski byŭ aficyjna pracaŭładkavany jak minimum u piaci arhanizacyjach. Heta ŭ dadatak da «hramadskaj dziejnaści» i rehularnych intervju z prapahandystami.
Žonka Juryja ciapier vałodaje tryma kampanijami, jakimi ŭ minułym kiravaŭ jon sam, i dadatkova pracuje ŭ BDU. Śfiera dziejnaści hetych kampanij vielmi raznastajnaja — finansavyja pasłuhi, handal adzieńniem i raspracoŭka sajtaŭ.
U publičnych vykazvańniach Juryj časta niehatyŭna vykazvajecca pra ŭrady zachodnich krain, ale asnoŭny biznes jaho siamji niepasredna źviazany ź Jeŭropaj.
Pavodle dadzienych aficyjnych rejestraŭ, Juryj pracaŭładkavany ŭ TAA «El Monte». Hetaja kampanija vałodaje kramami KIDS MALL, u jakich pradaje dziciačuju vopratku ź Jeŭropy ŭ Rasii i Biełarusi.
Siarod brendaŭ, ź jakimi pracuje krama, – italjanskija Brums i Primigi, ispanskija Abel & Lula, Mayoral i Pablosky, polskija Giamo, Jamiks, Mek i Sly. Taksama ŭ prodažy jość tavary šviedskaj kampanii Didriksons, Rasijskaj Oldos i partuhalskaj Patachou.
Z hetym biznesam źviazanyja žonka Vaskrasienskaha Alesia i baćka Valeryj. Jany stali saŭładalnikami kampanii ŭ 2012 hodzie, a Valeryj byŭ kiraŭnikom. U 2018 hodzie jon pamior. Miesca baćki zaniaŭ sam Juryj, a adzinaj ułaśnicaj stała Alesia.
Paśla karty źmiašaŭ 2020 hod. 12 žniŭnia Juryja zatrymali i źmiaścili ŭ SIZA KDB. Na nastupny dzień rola kiraŭnika kampanii pierajšła da jaho žonki. Hety ž post jana zajmaje i ciapier.
Pa dadzienych na 2024 hod, u kampanii było ŭsiaho try supracoŭniki, adzin ź ich — Juryj Vaskrasienski.
Padobna na toje, hety biznes nie samy stabilny ŭ płanie finansaŭ. Zhodna z buchhałtarskaj spravazdačnaści kampanii «El Monte», jaje finansavyja vyniki takija:
- u 2020 hodzie — čystaja strata 12 tysiač rubloŭ;
- u 2021-m — čysty prybytak 1 tysiača rubloŭ;
- u 2022-m-strata 19 tysiač rubloŭ;
- u 2023-m-prybytak 43 tysiačy rubloŭ.
Pry hetym vyručka kampanii kožny hod vyličajecca sotniami tysiač rubloŭ.
Jašče z dvuma kampanijami zdaryłasia historyja, padobnaja na «El Monte». Arhanizacyju «Finansavy aŭtsorsinh» Alesia i Valeryj Vaskrasienskija zasnavali ŭ 2015 hodzie. Paśla śmierci Valeryja jana pierajšła ŭ poŭnuju ŭłasnaść Alesi. Juryj značyŭsia kiraŭnikom firmy, a paśla zatrymańnia pieradaŭ pasadu žoncy.
Na sajcie firmy pakazana: jaje śpiecyjalisty biaruć na siabie buchhałteryju, vyrašajuć jurydyčnyja pytańni, absłuhoŭvajuć raźlikovy rachunak i vykonvajuć daručeńni klijentaŭ, źviazanyja ź biźniesam.
Juryj Vaskrasienski byŭ aformleny ŭ hetaj kampanii da 2023 hoda (jaho dakładnaja pasada nieviadomaja). Pa dadzienych na 2024 hod, u «Finansavym aŭtsorsinhu» značyŭsia ŭsiaho adzin supracoŭnik — vierahodna, heta kiraŭnik Alesia Vaskrasienskaja.
Jašče adna kampanija — «El Monte Plus» — zajmałasia aptovym handlem charčovymi praduktami. Jaje ŭłaśnikam byŭ sam Juryj Vaskrasienski, sa žniŭnia 2020 hoda i ŭładalnicaj, i kiraŭnikom stała jaho žonka Alesia. U červieni 2023 hoda kampaniju rearhanizavali.
Na hetym śpis biźnies-prajektaŭ Vaskrasienskich nie zaviaršajecca. U 2019 hodzie jon zasnavaŭ kampaniju «Majninh Braziers». I jana praktyčna adrazu ŭvajšła ŭ Park vysokich technałohij. Paśla Juryj pieradaŭ ułasnaść i kiraŭnictva žoncy.
Arhanizacyja prapanoŭvała pastaŭku i raźmiaščeńnie roznaha vidu abstalavańnia dla majninhu.
«Majninh Braziers» brałasia nie tolki za zadačy, źviazanyja sa zdabyčaj kryptatakienaŭ. U 2023 hodzie kampanija raspracavała dla «biełaruskaha kulturnaha centra duchoŭnaha adradžeńnia» sajt «Kniha pamiaci Minska». Na im sabranyja źviestki ab zahinułych i źnikłych bieź viestak u hady vojnaŭ, a taksama infarmacyja ab pachavańniach.
A voś jak IT-kampanija prezientavała siabie na biržy dla fryłansieraŭ: «paśpiachova realizavała bolš za 15 prajektaŭ (veb-sajty, prykładańni, fintiech-rašeńni, bilinhi, IoT-rašeńni, błokčejn-rašeńni dla hulniavych kampanij, kryptahulni, hulni dla gambling-industryi, NTF-markietplejsy i inš.) dla klijentaŭ z bolš siami krain Jeŭropy, SND i Blizkaha Ŭschodu».
Miarkujučy pa buchhałtarskaj spravazdačnaści, adrazu hety biznes byŭ prybytkovym, ale ŭ 2022 hodzie straciŭ 163 tysiačy rubloŭ.
Juryj byŭ aformleny ŭ «Majninh Braziers» da 2024 hoda. Pa dadzienych na 2024 hod, u kampanii byŭ usiaho adzin supracoŭnik (vierahodna, heta znoŭ Alesia Vaskrasienskaja). Zaraz sajt kampanii i jaje staronka na sajcie PVT niedastupnyja.
Jašče adno miesca pracy Juryja za 2024 hod — TAA «Novaja bijatechnałahičnaja kampanija», tam jon značyŭsia namieśnikam dyrektara.
Hetaja kampanija vyrablaje viskovy dystylat, karbamid, palimiernyja dabaŭki dla cemientaŭ i techničnuju zmazku. U jaje jość licenzii na vytvorčaść ałkaholnaj, niecharčovaj śpirtaźmiaščalnaj pradukcyi, niecharčovaha etyłavaha śpirtu i tytuniovych vyrabaŭ, a taksama aptovy handal i zachoŭvańnie takoj pradukcyi.
Kampaniju zarehistravali ŭ lipieni 2021 hoda. Jaje saŭładalniki — Dźmitryj Sachančuk, Vasil Varfałamiejeŭ i Michaił Stajanaŭ.
Novy biźnies składana nazvać stabilnym. Pavodle buchhałtarskaj spravazdačnaści, u 2022 hodzie «Novaja bijatechnałahičnaja kampanija» pryniesła 4,9 miljona čystaha prybytku, a ŭ 2023 hodzie — bolš za miljon rubloŭ čystaj straty.
Pavodle infarmacyi z sajta Viarchoŭnaha suda, u 2023 hodzie było siem sudovych pasiadžeńniaŭ, u jakich istcom vystupiła AAT «Hrodna Azot», a adkazčykam — «Novaja bijatechnałahičnaja kampanija».
Sutnaść spravy i vynik razboru nieviadomyja. U mai 2024 hoda ŭ Ekanamičny sud Minska źviarnułasia «Biełpaliŭenierha» nakont dźviuch daŭhoŭ «novaj bijatechnałahičnaj kampanii» na ahulnuju sumu kala 3,9 miljona rubloŭ.
Čarhovy pracoŭny zapis Juryja Vaskrasienskaha — «Kruhły stoł demakratyčnych sił». Jon zarehistravaŭ hetuju arhanizacyju ŭ kastryčniku 2020 hoda — nieŭzabavie paśla sustrečy z Alaksandram Łukašenkam u SIZA i vyzvaleńnia z-pad varty.
Tady Vaskrasienski kazaŭ, što arhanizacyja stanie «apierataram nacyjanalnaha dyjałohu ad apazicyi», i zajaŭlaŭ, što jaho meta — humanitarnaja misija. DziaržSMI pačali pradstaŭlać jaho jak «novaha apazicyjaniera».
Ciapier čytajuć
U niaviestki Łukašenki novy prajekt. Pradziusar — Hanna Łukašenka, aŭtar scenaryja — Hanna Siałuk4
Kamientary