Administracyja Trampa departavała vieniesuelcaŭ u Salvador, niahledziačy na zabaronu sudździ

Prezident Salvadora Naib Bukiele napisaŭ u sacyjalnych sietkach, što samalot pryvioz 238 členaŭ vieniesuelskaj bandy Tren de Aragua i jašče 23 členy mižnarodnaj złačynnaj hrupoŭki MS-13.

Pry hetym raniej fiederalny sudździa ŭ Vašynhtonie abaviazaŭ administracyju raźviarnuć samalot, pakolki departacyja hetych ludziej niezakonnaja.

«Oj… Zanadta pozna», — napisaŭ u inšym paviedamleńni prezident Salvadora.

Dyrektyva Trampa ab departacyi spasyłałasia na Akt ab varožych čužaziemcach 1798 hoda, zajaŭlali ŭ sudzie pradstaŭniki administracyi; heta taksama paćvierdziŭ dziaržsakratar Marka Rubia. Hety zakon farmalna nie byŭ admienieny, ale ŭ historyi ZŠA prymianiaŭsia redka i zaŭsiody padčas vajny.

Zakon dazvalaje biez sudovaha rašeńnia zatrymlivać i departavać z ZŠA hramadzian krain, jakija znachodziacca ŭ stanie vajny z Amierykaj.

Jak piša pazapartyjny daśledčy centr Brennan Center for Justice, zakon užyvaŭsia padčas vajny 1812 hoda ź Vialikabrytanijaj i abiedźviuch suśvietnych vojnaŭ. Padčas Druhoj suśvietnaj vajny jon staŭ zakanadaŭčaj asnovaj dla interniravańnia amierykancaŭ japonskaha pachodžańnia.

Sudździa Džejms Baaśbierh, pryznačany prezidentam Džo Bajdenam, pastanaviŭ, što hety zakon moža prymianiacca tolki ŭ vypadku vajny ź inšaj dziaržavaj, tamu departacyja na jaho asnovie pavinna być nieadkładna spyniena. U amierykanskich sudździaŭ niama ŭłasnych miechanizmaŭ, kab prymusić vykanaŭčuju ŭładu vykonvać ich rašeńni.

U Salvadory departavanych vieniesuelcaŭ adrazu nakiravali ŭ hihanckuju turmu Cecot, napisaŭ Bukiele. Pavodle jaho słoŭ, jany praviaduć tam minimum hod, i hety termin moža być praciahnuty.

«Złučanyja Štaty zapłaciać za heta, dla ich heta vielmi małaja suma, ale dla nas — značnaja», — dadaŭ Bukiele.

U studzieni Tramp svaim ukazam abviaściŭ Tren de Aragua i MS-13 zamiežnymi terarystyčnymi arhanizacyjami. Jaho zakliki da departacyi złačyncaŭ byli papularnyja padčas vybarčaj kampanii.

Adnak pakul jamu nie ŭdałosia vykanać svajo abiacańnie pravieści samuju masavuju departacyju z krainy: ahienty imihracyjnaj palicyi ICE nie spraŭlajucca z ustanoŭlenaj Trampam kvotaj na kolkaść aryštaŭ za dzień.

Jak pisała NBC, u lutym hetaha hoda, pieršym poŭnym miesiacy prezidenctva Trampa, z ZŠA było departavana 11 tysiač čałaviek, tady jak u lutym 2024 hoda pry Džo Bajdenie — 12 tysiač.

• 0
• 1
• 0
• 5
• 0
• 0
• 1
• 0