Rasija pastavić u Mahilovie pomnik arhanizataru palityčnych zabojstvaŭ
Vybirać miesca dla pomnika čekistu, na rukach jakoha zabojstvy prezidenta Kitaja i Lva Trockaha, a taksama vykradańni biełych hienierałaŭ, u abłasny centr pryjechaŭ namieśnik Miadzinskaha.
11 vieraśnia ŭ Mahiloŭ prybyŭ Mikałaj Aŭsijenka, namieśnik načalnika ŭpraŭleńnia prezidenta Rasii pa dziaržaŭnaj palitycy ŭ humanitarnaj śfiery i namieśnik staršyni Rasijskaha vajenna-histaryčnaha tavarystva.
Kiraŭnikom tavarystva źjaŭlajecca Uładzimir Miadzinski, pamočnik Pucina, raniej viadomy svajoj rollu ŭ prapahandysckaj dziejnaści Kramla, a ciapier u jakaści kiraŭnika rasijskaj delehacyi na pieramovach z Ukrainaj.
Aŭsijenka sustreŭsia ź pieršym namieśnikam Mahiloŭskaha harvykankama Iharam Bušlakovym, kab abmierkavać mahčymyja miescy dla ŭstanoŭki pamiatnaha znaka čekistu Navumu Ejcinhonu.
«Saviecki raźviedčyk Navum Ejcinhon — čałaviek z supiarečlivym, ale hieraičnym losam, čyja spadčyna siońnia viartajecca z zabyćcia. Navum Ejcinhon byŭ nie prosta ahientam, a hienijalnym apieratyŭnikam, jakoha nazyvali «opier ad Boha». Jaho zdolnaść pierajhrać praciŭnika ŭ najciažejšych umovach, hłyboki analityčny rozum i addanaść słužbie zrabili jaho lehiendaj śpiecsłužbaŭ. Niahledziačy na heta, paśla vajny jon staŭ achviaraj palityčnych represij i pravioŭ 12 hadoŭ u turmie, a jaho imia nadoŭha było vykraślena z historyi. Tolki ŭ 1991 hodzie jon byŭ reabilitavany, ale mnohija i siońnia nie viedajuć pra jaho ŭniosak u biaśpieku krainy», — raskazaŭ rasijski čynoŭnik.
Navum Ejcinhon naradziŭsia ŭ jaŭrejskaj siamji ŭ Škłovie Mahiloŭskaj hubierni ŭ 1899 hodzie. Z maładości dałučyŭsia da revalucyjnaha ruchu i staŭ supracoŭnikam ČK, paśla čaho atrymaŭ adukacyju ŭ Vajennaj akademii i byŭ nakiravany ŭ zamiežnuju raźviedku.
Jon arhanizavaŭ šerah bujnych apieracyj, u tym liku vykradańni biełych hienierałaŭ Alaksandra Kuciepava i Jaŭhiena Milera ŭ Francyi, a taksama ŭdzielničaŭ u padrychtoŭcy zabojstva Lva Trockaha ŭ Mieksicy i prezidenta Kitaja Čžan Czalinia.
U hady vajny kiravaŭ dyviersijami i partyzanskim rucham u tyle, zajmaŭsia śpiecapieracyjami suprać niamieckich śpiecsłužbaŭ. U paślavajennyja hady ŭznačalvaŭ apieracyi pa źniščeńni antysavieckich partyzan u Zachodniaj Biełarusi i lasnych bratoŭ u Litvie.
Paśla vajny pracavaŭ u NKUS-MDB, ale ŭ 1951 hodzie byŭ aryštavany, a potym asudžany jak saŭdzielnik Bieryi i pravioŭ 12 hadoŭ u turmie. Reabilitavany ŭžo paśla śmierci, jon pamior u Maskvie ŭ 1981 hodzie.
Heta nie pieršy pomnik u Biełarusi, jaki prasoŭvaje Rasijskaje vajenna-histaryčnaje tavarystva. U sakaviku hetaha hoda pry ŭdziele Miadzinskaha ŭ Minsku byŭ adkryty novy pomnik sałdatam Rasijskaj impieratarskaj armii, z vyjavaj impierskaha arła, ustanoŭleny za košt tavarystva.
Akramia taho Miadzinski maje namier pastavić u Homieli pomniki savieckamu maršału Kanstancinu Rakasoŭskamu i rasijskamu fieldmaršału Ivanu Paskieviču, dušycielu paŭstańnia 1830—1831 hadoŭ.
Kamientary