«Usio skončana». Ukrainskija vajskoŭcy raskazali pra adstupleńnie z Kurskaj vobłaści

Imiony vajskoŭcaŭ, jakija razmaŭlali ź Bi-bi-si praz sacsietki, źmienienyja ŭ metach biaśpieki. Niekatoryja ź ich raskazali pra «kałaps» paśla straty Sudžy — najbujniejšaha horada Kurskaj vobłaści, jaki ŭtrymlivali ŭkrainskija vojski.

Voś jak piać ukrainskich sałdat apisvajuć toje, što adbyvałasia ŭ ich na vačach.

Uładzimir: «Bieśpiłotniki atakujuć kruhłasutačna»

9 sakavika Uładzimir adpraviŭ Bi-bi-si paviedamleńnie ŭ telehramie, u jakim napisaŭ, što ŭsio jašče znachodzicca ŭ Sudžy, dzie panujuć «panika i kałaps».

«Kałony vojskaŭ i techniki sprabujuć vyjści, — raskazaŭ jon. — Častkova ich spalvajuć rasijskija bieśpiłotniki na darozie. Dniom vyjechać niemahčyma».

Pieravozka ludziej i techniki zaležała ad adnaho asnoŭnaha maršrutu pamiž Sudžaj i Sumskaj vobłaściu Ukrainy. Pa słovach Uładzimira, miesiac tamu pa hetaj darozie možna było pierasoŭvacca adnosna biaśpiečna. Ale da 9 sakavika jana «całkam pierajšła pad ahniavy kantrol praciŭnika — drony lotajuć kruhłasutačna». «Za adnu chvilinu možna ŭbačyć dva-try bieśpiłotniki. Heta vielmi šmat», — rastłumačyŭ jon.

«U nas usio materyjalna-techničnaje zabieśpiačeńnie tut, na adnoj trasie Sudža-Sumy, — raskazaŭ Uładzimir. — I ŭsie viedali, što rasijanie pasprabujuć jaje pierarezać. Ale heta znoŭ stała niečakanaściu dla našaha kamandavańnia».

Na momant napisańnia artykuła, niezadoŭha da taho, jak Rasija advajavała Sudžu, Uładzimir kazaŭ, što rasijskaje vojska cisnuła na USU z troch kirunkaŭ.

Maksim: «Źniščanaja technika abciažarvaje adychod»

Da 11 sakavika ŭkrainskija vojski sprabavali nie dać pierarezać asnoŭnuju trasu, vynikaje z paviedamleńniaŭ u telehramie ad Maksima.

«Niekalki dzion tamu my atrymali zahad arhanizavana pakinuć abarončyja rubiažy», — raskazaŭ jon, dadaŭšy, što Rasija pryciahnuła značnyja siły dla zachopu horada, «u tym liku vialikaja kolkaść paŭnočnakarejskich žaŭnieraŭ». 

Pavodle acenak vajskovych ekśpiertaŭ, kab viarnuć kantrol nad Kurskaj vobłaściu, Rasija skancentravała tam da 70 tysiač vajskoŭcaŭ, u tym liku kala 12 tysiač paŭnočnakarejcaŭ. Taksama jana nakiravała tudy najlepšyja padraździaleńni apierataraŭ BPŁA, bieśpiłotniki-kamikadze i FPV-drony, kab «uziać pad ahniavy kantrol asnoŭnyja łahistyčnyja maršruty». Rasiejskija vojski taksama vykarystoŭvali tut optavałaknovyja drony, jakija niemahčyma padavić z dapamohaj sistem radyjoelektronnaj baraćby.

Pa słovach Maksima, u vyniku «praciŭniku ŭdałosia źniščyć dziasiatki adzinak techniki, i ich abłomki stvarajuć zatory na maršrutach zabieśpiačeńnia».

Anton: «Katastrafičnaje adstupleńnie»

Situacyju ŭ toj dzień, 11 sakavika, Anton nazvaŭ «katastrafičnaj». Heta treci sałdat, ź jakim mieła znosiny Bi-bi-si, jon słužyŭ u štabie kamandavańnia Kurskim frontam.

Anton taksama źviarnuŭ uvahu žurnalistaŭ na škodu, naniesienuju rasijskimi dronami.

«Raniej u nas była pieravaha ŭ bieśpiłotnikach, ciapier jaje niama», — skazaŭ jon.

Inšymi pieravahami rasijskaj armii Anton nazvaŭ bolš dakładnyja avijaŭdary i bolšuju kolkaść sałdat. Šlachi zabieśpiačeńnia byli pierarezanyja, raskazaŭ jon:

«Łahistyka bolš nie pracuje — arhanizavanyja pastaŭki zbroi, bojeprypasaŭ, praduktaŭ charčavańnia i vady bolš niemahčymyja».

Pa słovach Antona, jamu ŭdałosia vyjści z Sudžy pieššu, nočču:

«My niekalki razoŭ ledź nie zahinuli. U niebie pastajanna lotajuć bieśpiłotniki».

Vajskoviec prahnazuje, što ŭvieś ukrainski płacdarm u Kurskaj vobłaści budzie stračany.

«Z vajskovaha punktu hledžańnia hety kirunak siabie vyčarpaŭ. Bolš trymać jaho niama sensu».

Pavodle acenak zachodnich čynoŭnikaŭ, u nastupie ŭ Kurskaj vobłaści ŭdzielničała kala 12 tysiač ukrainskich vajskoŭcaŭ. Heta byli adnyja z samych navučanych padraździaleńniaŭ, abstalavanyja zachodniaj zbrojaj, uklučajučy tanki i broniemašyny.

Rasijskija «vajenkary» apublikavali videa, na jakim źniataje źniščeńnie abo zachop častki hetaj techniki. 13 sakavika Rasija zajaviła, što situacyja ŭ Kurskaj vobłaści znachodzicca «całkam pad kantrolem», a USU nibyta kinuli bolšuju častku svajoj techniki.

Źmicier: «Za krok ad śmierci»

U svaich paviedamleńniach 11-12 sakavika čaćviorty surazmoŭca, vajskoviec Dźmitryj, paraŭnaŭ adstupleńnie z Kurskaj vobłaści sa scenaj ź filma žachaŭ:

«Darohi ŭsiejanyja sotniami źniščanych mašyn, bronietechniki i motaŭsiudychodaŭ. Vielmi šmat paranienych i zabitych».

Za transpartnymi srodkami časta palavali šmatlikija bieśpiłotniki. Dźmitryj raskazaŭ, jak jamu ŭdałosia vyratavacca, kali mašyna, u jakoj jon jechaŭ, zatrymałasia. Jon i jaho kalehi sprabavali vypchnuć aŭtamabil, kali na ich naceliŭsia FPV-dron. Bieśpiłotnik nie trapiŭ u mašynu, ale paraniŭ adnaho z vajskoŭcaŭ. Pa słovach Dźmitryja, im daviałosia chavacca ŭ lesie dźvie hadziny, pierš čym ich vyratavali.

Dźmitryj kaža, što mnohija adstupali pieššu: «Chłopcy prachodzili pa 15-20 km». Situacyja, pa jahonych słovach, pieratvaryłasia «sa składanaj i krytyčnaj u katastrafičnuju».

U paviedamleńni ad 14 sakavika Dźmitryj dadaŭ: «U Kurskaj vobłaści ŭsio skončana… apieracyja nie ŭviančałasia pośpiecham».

Pavodle jaho acenki, z momantu pierachodu USU praź miažu ŭ žniŭni 2024 hoda ŭ Kurskaj vobłaści zahinuli tysiačy ŭkrainskich sałdat.

Arciom: «My zmahalisia jak lvy»

Piaty sałdat, ź jakim parazmaŭlała Bi-bi-si, aceńvaje situacyju nie tak piesimistyčna. 13 sakavika Arciom dasłaŭ paviedamleńnie ŭ telehram z vajskovaha špitala, dzie jon prachodziŭ lačeńnie ad askiepkavych ranieńniaŭ, atrymanych u vyniku ataki bieśpiłotnika.

Jon raskazaŭ, što vajavaŭ na zachad ad Sudžy ŭ rajonie pasiołka Łoknia, dzie ŭkrainskija vojski akazvali žorstki supraciŭ i «zmahalisia jak lvy». Arciom ličyć, što apieracyja zbolšaha była paśpiachovaj.

«Važna, što na hety momant Uzbrojenyja siły Ukrainy stvaryli hetuju bufiernuju zonu, dziakujučy jakoj rasijanie nie mohuć uvajści ŭ Sumskuju vobłaść», — skazaŭ jon.

• 0
• 3
• 5
• 3
• 1
• 41
• 2
• 2