U premijalnaj kliniki — novaja ŭładalnica. Heta dziaŭčyna z kavunovaha bataljonu, jakaja zrazała stužki, kali zabili Ramana Bandarenku

VIP-klinika ź niepubličnymi ŭładalnikami

Sałon pryhažości «Ajrys» adkryŭsia ŭ Minsku ŭ 2017 hodzie. Jon prapanoŭvaŭ miedycynskija, kaśmietałahičnyja i cyrulnickija pasłuhi, a taksama masaž i manikiur. Svaim kozyram nazyvaŭ vysakakłasnych kaśmietołahaŭ ź vialikim dośviedam pracy. A taksama inavacyjnaje abstalavańnie dla estetyčnych pracedur.

45% kampanii naležała biznesmienu Paŭłu Biełamu i źviazanaj ź im jurydyčnaj asobie. A 50% — arhanizacyi «MiedykEjdž», jakoj vałodali dźvie siastry — Śviatłana Kanašenka (90%) i Natalla Kizik (10%). Jašče piać pracentaŭ byli ŭ «Tapas-Inviestkapitał».

Śviatłana Kanašenka — supracoŭnica Słužby biaśpieki Łukašenki, jakuju nazyvajuć asabistaj doktarkaj palityka. Jana časta supravadžaje jaho ŭ aficyjnych pajezdkach i ŭ apošnija hady rehularna traplaje na kadry aficyjnaj fotachroniki sa špicam Umkam.

Pavialičyć

U apošnija hady ŭ biznesu Biełaha nie lepšyja časy: u 2023 hodzie była infarmacyja ab finansavych prablemach jaho kampanij i sychodzie z chakiejnaj kamandy Łukašenki (krynica «Lusterka» źviazvała hetyja padziei).

Pavialičyć

Składana skazać, što ciapier ź jaho biźniesam: adna kampanija sa struktur, źviazanych z «Tapasam», niadaŭna atrymała dziaržpadtrymku, inšaja — raspradavała majomaść.

Novaja nazva i ŭładalnica

U 2024 hodzie ŭ sałonie adbylisia pieramieny. Skład uładalnikaŭ źmianiŭsia: paśla pierastanovak Pavieł Bieły, Śviatłana Kanašenka i Natalla Kizik vyjšli ź liku ŭłaśnikaŭ kampanii.

Zychodziačy z dadzienych dziaržreestru, sa studzienia 2024 hoda 100% biznesu naležyć Alenie Hieorhijeŭnie Kazak. Jana ž źjaŭlajecca aficyjnym kiraŭnikom kliniki.

Adnak niemahčyma ŭstanavić, adbyłasia źmiena ŭłaśnika ŭ vyniku prodažu, dareńnia ci inšym sposabam.

Sama ŭstanova praciahnuła pracavać pa tym ža adrasie, ale źmianiła nazvu: zamiest «Ajrys» na šyldzie zaraz značycca Antiage Clinic. Klijentam prapanujuć pracedury dla amaładžeńnia, epilacyi, kaśmietałohii i dermatałohii, abiacajuć «tolki premijalnyja materyjały i najnoŭšyja technałohii».

Pavialičyć

Miedyk ź blizkaha kruha

Alena Kazak — jašče adna žančyna ź blizkaha atačeńnia Łukašenki, źviazanaja ź miedycynaj.

Ciapier joj 39 hadoŭ. Pavodle infarmacyi TUT.BY, jana vypusknica BDMU i aniestezijołah-reanimatołah pa prafiesii. Niekalki hadoŭ — z 2014 pa 2019 hod — jana pracavała ŭ RNPC «Kardyjałohija» (u 2016 hodzie ŭ adnoj z publikacyj jaje pradstaŭlali jak navukovaha supracoŭnika łabaratoryi chraničnaj sardečnaj niedastatkovaści). Pavodle źviestak vydańnia «Biuro», u 2020—2021 hadach jana nibyta ličyłasia ŭ RNPC, adnak nie płaciła padatkovych adličeńniaŭ. Užo ŭ 2022-m Kazak pierajšła ŭ 6-ju kliničnuju balnicu na aficyjnuju zarabotnuju płatu kala 200 dołaraŭ za miesiac.

Pavialičyć

Kazak — aktyŭnaja ŭdzielnica «supravadžeńnia» Łukašenki na niefarmalnych mierapryjemstvach. Naprykład, u listapadzie 2017-ha jana była razam z Łukašenkam na trybunie tenisnaha matču, u mai 2018-ha — siarod hledačoŭ konkursu pryhažości «Mis Biełaruś», u žniŭni 2018-ha ŭ žanočaj kampanii źbirała kavuny na «pole Łukašenki». 29 žniŭnia 2020-ha Alenu Kazak zaŭvažyli na praŭładnym aŭtaprabiehu «Za adzinuju Biełaruś» pobač z Natallaj Ejsmant i Dźmitryjem Baskavym.

Alenu Kazak paznali siarod tych, chto zrazaŭ BČB-stužki ŭ kampanii Dźmitryja Baskava i inšych u minskich dvarach 11 listapada 2020 hoda. U toj viečar nieviadomyja ludzi, jakija pryjechali ŭ čužy dvor zrazać bieł-čyrvona-biełyja stužki, schapili 31-hadovaha Ramana Bandarenku. Paźniej rodnyja znajšli chłopca ŭ balnicy, dzie jon, nie aprytomnieŭšy, pamior ad ciažkich traŭm. Pra ŭzbudžeńnie kryminalnaj spravy ničoha nie viadoma.

Sama Kazak u razmovie z žurnalistam tady skazała, što «nidzie nie była». Adnak, pavodle infarmacyi BYPOL, jaje sim-karta ŭ toj viečar była zarehistravanaja ŭ rajonie «Płoščy pieramien».

• 0
• 3
• 0
• 18
• 1
• 1
• 22
• 0