Vakalist makiedonskaha hurta DNK viarnuŭsia ŭ kłub i zahinuŭ u pažary, ratujučy svaich junych prychilnikaŭ
Źjavilisia padrabiaznaści žudasnaha pažaru ŭ načnym kłubie ŭ Paŭnočnaj Makiedonii, na jakim zahinuli 59 čałaviek.
Vakalist papularnaha makiedonskaha muzyčnaha hurtu DNK zahinuŭ u pažary, ratujučy svaich junych prychilnikaŭ. Padčas trahiedyi ŭ noč na 16 sakavika zahinuli amal usie ŭdzielniki hurtu, a taksama bolš za piaćdziasiat čałaviek, piša Bi-bi-si — Ukraina.
Padčas vystupu kalektyvu ŭ načnym kłubie Pulse u Paŭnočnaj Makiedonii ŭ budynku zahareŭsia dach. Na toj momant unutry było 1500 čałaviek.
Paśla zaharańnia Andrej Hieorhijeski, adzin z vakalistaŭ papularnaha makiedonskaha hurtu, zaklikaŭ fanataŭ jak maha chutčej pakinuć pamiaškańnie.
Pa słovach mieniedžara, užo apynuŭšysia ŭ biaśpiecy, śpiavak viarnuŭsia ŭ pałajučy zał, kab dapamahčy słuchačam, mnohija ź jakich byli niepaŭnaletnimi.
Mieniedžar DNK padkreśliŭ, što Andrej moh by ŭciačy, ale vyrašyŭ viarnucca.
«Ja nikoli ŭ žyćci nie sustrakaŭ takoha dobraha i ścipłaha čałavieka», — uspaminaje jon zahinułaha.
Trahiedyja taksama zabrała žyćci: fatohrafa hurta Alaksandra Jafremava, bek-vakalistki Sary Pražkoŭskaj, barabanščyka Džerdžy Džerhijeva, kłavišnika Filipa Stevanoŭskaha.
Vyžyŭ tolki adzin udzielnik hurtu, jaki, jak paviedamlajecca, da hetaha času znachodzicca ŭ lakarni.
Siarod zahinułych taksama — Andrej Łazaraŭ, futbalist «Škupi» — kłuba, jaki vystupaje ŭ vyšejšaj lizie Paŭnočnaj Makiedonii.
Kamanda paviedamiła, što futbalist zahinuŭ, sprabujučy dapamahčy inšym naviedvalnikam Pulse vybracca na vulicu. Jon atruciŭsia čadnym hazam.
Ahułam u pažary, pavodle apošnich danych, zahinuli 59 čałaviek, u tym liku troje dziaciej. Bolš 150 atrymali ranieńni, siarod ich — bolš za 20 dziaciej.
Pa danych uładaŭ, stan zdaroŭja 20 paciarpiełych ciažki.
Bolšaść paciarpiełych (kala 90) byli špitalizavanyja ŭ balnicy Paŭnočnaj Makiedonii, 44 čałavieki nakiravali na lačeńnie ŭ Bałharyju, Sierbiju i Hrecyju. Vaśmiarych ludziej płanujuć adpravić u Charvatyju i Rumyniju.
«Heta było majo adzinaje dzicia»
U horadzie Kočani pražyvaje 30 tysiač čałaviek, tamu 59 śmierciaŭ — pieravažna padletkaŭ i moładzi — zakranuli amal kožny dom.
«My — maleńki haradok. Usie ŭsich viedajuć, — raskazaŭ AFP 38-hadovy stamatołah Saška Jordanaŭ. — U ahni zahinuła šmat maich pacyjentaŭ: dziaciej siabroŭ, susiedziaŭ».
Inšy žychar Kočani, Drahi Stajanaŭ, straciŭ syna Tomče.
«Heta było majo adzinaje dzicia, i jano pamierła, — skazaŭ jon žurnalistam. — Što mnie ciapier rabić? Ja nie chaču bolš žyć.»
Miascovyja žychary padazrajuć, što ŭnutry kłuba jašče mohuć być zharełyja ludzi, cieły jakich nie mohuć dastać. Ale aficyjna hetaja infarmacyja nie paćvierdžanaja.
20-hadovaja Maryja Tasieva raskazała makiedonskamu Piatamu kanału, što trapiła ŭ ciskaninu, kali ludzi kinulisia da vychadu.
Pa jaje słovach, jana ŭpała na padłohu, ale ŭrešcie zmahła znajści vychad.
«Tam byli abvuhlenyja cieły. Nie viedaju jak, ale mnie ŭdałosia vybracca, — skazała jana ahienctvu Reuters. — Zaraz ja ŭ paradku, ale zahinuła vielmi šmat ludziej.»
Pavodle jaje słoŭ, jaje 25-hadovaja siastra taksama zahinuła.
Uładzisłaŭ Hrujeŭ, śpiecyjalist pa płastyčnaj chirurhii va Univiersiteckaj klinicy Skopje, skazaŭ BBC, što bolšaść pacyjentaŭ u jaho klinicy majuć surjoznyja apioki.
«U ich apioki druhoj i treciaj stupieni vobłaści hałavy, šyi i vierchniaj častki tułava», — paviedamiŭ jon.
Hora, jakoje pierarasło ŭ hnieŭ
Pažar u pierapoŭnienym načnym kłubie Pulse u horadzie Kočani adbyŭsia kala 2:30 pa miascovym časie ŭ noč na niadzielu, 16 sakavika.
Pa papiarednich danych, pryčynaj zaharańnia stała vykarystańnie piratechniki. Iskry padpalili častku stoli.
Sotni ludziej kinulisia da adzinaha vychadu, kali połymia achapiła dach.
Pavodle dziaržaŭnaha prakurora, u kłubie byŭ tolki adzin zapasny vychad, jaki byŭ začynieny.
Budynak, dzie raniej byŭ skład dyvanoŭ, taksama nie mieŭ vohnietušycielaŭ i źmiaščaŭ lohkija na zaharańnie materyjały.
Kiraŭnica haradskoj balnicy Chryścina Sierafimava zajaviła, što ŭzrost zahinułych maładych ludziej vahajecca ad 14 da 25 hadoŭ.
Najbolš śmiertanosny incydent u krainie za apošnija hady
Heta trahiedyja stała samaj śmiertanosnaj u krainie za apošnija hady, piša Reuters.
Ministr unutranych spraŭ Paŭnočnaj Makiedonii Panče Toškaŭski paviedamiŭ, što palicyja praviała pieršyja zatrymańni ŭ miežach rasśledavańnia pažaru.
Pa dadzienych Reuters, zatrymali kala 20 čałaviek.
Siarod ich: syn uładalnika kłuba Pulse, čynoŭniki, u tym liku były ministr ekanomiki.
Taksama ŭłady pryniali rašeńnie ab zatrymańni jak minimum troch paciarpiełych u pažary. Ich aryštujuć paśla palapšeńnia ich stanu.
Premjer-ministr Paŭnočnaj Makiedonii Chryścijan Mickoski zajaviŭ, što Ministerstva ekanomiki niezakonna vydała kłubu Pulse licenziju, nieabchodnuju dla pracy.
Kiraŭnik urada paabiacaŭ, što ŭsie vinavatyja paŭstanuć pierad sudom, «niezaležna ad taho, chto jany».
Tym časam ludzi kažuć, što kraina patanaje ŭ karupcyi, i patrabujuć jaje vykaranieńnia.
Hora paŭnočnamakiedoncaŭ pierarasło ŭ hnieŭ.
Tysiačy ludziej vyjšli na pratest, patrabujučy pakarać usich vinavatych u śmiarotnym pažary.
Pratestoŭcy razhramili kaviarniu, jakaja, jak miarkujecca, naležała ŭładalniku zharełaha kłuba.
U Paŭnočnaj Makiedonii abviaścili siamidzionnuju žałobu. Identyfikacyja zahinułych praciahvajecca. Nastupnym tydniem adbuducca pachavańni.
Kamientary