Dyjahnastyčnaja zahadka: paśla apieracyi 17-hadovy padletak moh havaryć tolki na zamiežnaj movie
Pry vychadzie z narkozu paśla apieracyi na kalenie junak časova straciŭ zdolnaść razmaŭlać na svajoj rodnaj movie.
Pra dziŭny vypadak u svajoj praktycy paviedamili daktary ź Niderłandaŭ. 17-hadovy chłopiec byŭ dastaŭleny ŭ balnicu dla praviadzieńnia apieracyi na kalenie paśla traŭmy, atrymanaj padčas hulni ŭ futboł.
Apieracyja prajšła paśpiachova, ale kali jon aprytomnieŭ paśla narkozu, to zahavaryŭ vyklučna pa-anhlijsku i nastojliva śćviardžaŭ, što znachodzicca ŭ ZŠA. Da hetaha vypadku jon vykarystoŭvaŭ anhlijskuju movu tolki na ŭrokach u škole.
Padletak nie paznavaŭ svaich baćkoŭ i nie moh havaryć abo razumieć havorku na svajoj rodnaj niderłandskaj movie.
Pavodle spravazdačy daktaroŭ, u jaho nie było historyi psichičnych razładaŭ ci inšych miedycynskich zachvorvańniaŭ u siamji za vyklučeńniem niekalkich vypadkaŭ depresii pa matčynaj linii. Da apieracyi jon havaryŭ na paŭdniovahałandskim dyjalekcie. U jaho nie było nijakich svajakoŭ u anhłamoŭnych krainach, i jon nie naviedvaŭ u apošni čas takija krainy.
Miedsiastra, jakaja pieršaj zaŭvažyła, što pacyjent razmaŭlaje pa-anhlijsku, spačatku nie nadała hetamu značeńnia, miarkujučy, što padletak pieražyvaje deliryj abudžeńnia — stan spantannaj dezaryjentacyi, jaki časam uźnikaje paśla vychadu z narkozu.
Adnak kali praź niekalki hadzin jon usio jašče nie moh skazać nivodnaha słova na niderłandskaj movie, daktary vyklikali psichijatryčnuju kansultacyju.
Padčas abśledavańnia psichičnaha stanu, jakoje pravodziłasia pryblizna praz 18 hadzin paśla apieracyi, psichijatryčnaja hrupa vyjaviła, što padletak byŭ spakojny i ŭvažlivy. Jon moh adkazvać na pytańni, ale tolki pa-anhlijsku ź niderłandskim akcentam. Paźniej jon pačaŭ davać karotkija adkazy na niderłandskaj movie, ale heta jamu davałasia ciažka.
Nieŭrołah nie vyjaviŭ u pacyjenta nijakich adchileńniaŭ padčas poŭnaha nieŭrałahičnaha abśledavańnia.
Padletak zmoh svabodna zahavaryć na rodnaj movie prykładna praz 24 hadziny paśla apieracyi. Heta adbyłosia ŭ momant, kali jaho naviedali siabry.
Pakolki pacyjent samastojna adnaviŭ zdolnaść havaryć na niderłandskaj, daktary nie stali pravodzić dadatkovyja niejrapsichałahičnyja testy, elektraencefałahramu abo inšyja skanavańni mozhu. Praz try dni paśla apieracyi jaho vypisali.
Daktary pastavili junaku dyjahnaz sindrom zamiežnaj movy (FLS) — redki stan, pry jakim čałaviek raptoŭna i mižvoli pačynaje razmaŭlać na inšaj movie zamiest rodnaj.
Aŭtary spravazdačy adznačyli, što historyja ź junakom u Niderłandach — pieršy zadakumientavany vypadak hetaha sindromu ŭ padletka. Usiaho jany ŭ navukovaj litaratury znajšli vosiem inšych padobnych vypadkaŭ, u jakich pacyjent nie prosta razmaŭlaŭ z zamiežnym akcentam, a całkam pierachodziŭ z rodnaj movy na tuju, jakuju vyvučyŭ paźniej u žyćci. Usie pacyjenty nie byli bilinhvami ź dziacinstva.
Heta važnaje adroźnieńnie, bo isnuje taksama sindrom zamiežnaha akcentu (FAS), pry jakim čałaviek zachoŭvaje rodnuju movu, ale havoryć ź niezvyčajnaj intanacyjaj, što stvaraje ŭražańnie inšamoŭnaha akcentu. Hety redki fienomien časta, ale nie zaŭsiody, źviazany z paškodžańniem mozhu.
Dakładnaja pryčyna ŭźniknieńnia sindromu nieviadomaja, adnak jość źviestki, što jon moža źjaŭlacca paśla narkozu. Aŭtary daśledavańnia adznačajuć, što ŭździejańnie aniestetykaŭ na kahnityŭnyja funkcyi, a taksama praces ich vyviadzieńnia z centralnaj niervovaj sistemy mohuć vyklikać deliryj abudžeńnia. Tamu dakładna nieviadoma, ci źjaŭlajecca FLS samastojnym razładam abo prosta adnoj z formaŭ hetaha deliryja.
Kamientary