Stała viadoma, kali i za kolki pačnuć pradavać adziny supolny polis ASAHA dla Biełarusi i Rasii
Adzinaja sistema pavinna spraścić žyćcio vadzicielam, jakija časta pierasiakajuć miažu Biełarusi i Rasii. Zaklučeńnie takich polisaŭ budzie ažyćciaŭlacca tolki ŭ elektronnym vyhladzie, piša OL.
Dakumient dazvalaje vadzicielam dźviuch krain za dadatkovuju płatu dadać da terytoryi pakryćcia svajho polisa Biełaruś abo Rasiju. U vypadku DTZ kampiensacyju strat buduć vyznačać pa zakanadaŭstvie toj krainy, dzie adbyłosia zdareńnie.
Pa ŭkazie «Ab strachavańni» dla aŭtamabilaŭ z abjomam ad 1800 da 2500 kub. sm takaja strachoŭka na 15 dzion abydziecca ŭ 1,57 bazavaj vieličyni (65 rubloŭ 94 kapiejki), na hod — 3,88 BV (162 rubla 96 kapiejek). Pry hetym dla IP i jurydyčnych asob takaja ž strachoŭka budzie kaštavać na 15 dzion 1,36 BV (57 rubloŭ 12 kapiejek), a na hod — 3,68 BV (154 rubla 56 kapiejek).
Dla hruzavikoŭ košt takoha ASAHA ad 16 da 27 ton uklučna na 15 dzion kaštuje 4,24 BV (178 rubloŭ 8 kapiejek), a na hod — 10,74 BV (451 rubiel 8 kapiejek). Śpiectaryfy praduhledžany taksama na aŭtamabili rasijskaj i savieckaj vytvorčaści, jakija vypuščany da 1 lipienia 2025 hoda, — naprykład, VAZ, KamAZ, «Maskvič» i inš.
Za pašyreńnie polisa na Biełaruś rasiejcam daviadziecca zapłacić ad 3400 rasiejskich rubloŭ. Dla hruzavych aŭtamabilaŭ minimalnaja staŭka — 7560 rasijskich rubloŭ.
Darečy, dla aŭtamabilistaŭ jość taksama varyjant «Siniaj karty». Dla tych, chto jedzie na lehkavym aŭtamabili ź Biełarusi ŭ Rasiju nie bolš jak na 15 dzion, jana budzie kaštavać 0,86 BV, abo 36 rubloŭ 12 kapiejek, a hadavy polis — 9,32 BV (391 rubiel 44 kapiejki). Dla hruzavikoŭ adpaviedna 1,73 BV (72 rubli 66 kapiejek) na 15 dzion i 18,55 BV (779 rubloŭ 1 kapiejka) na hod.
Kamientary