Biełarusaŭ zaprašali ŭ Polšču dla pracy ŭ transpartnaj śfiery, a vykarystoŭvali na nielehalnaj fabrycy
Uładalnik polskaj transpartnaj kampanii vydavaŭ padroblenyja zaprašeńni biełarusam, kab tyja mahli atrymać pracoŭnyja vizy. Adnak pa pryjeździe ŭ Polšču ich nie ŭładkoŭvali na transpart, a adpraŭlali na padpolnuju tytuniovuju fabryku. Užo viadoma, što ŭładalniku kampanii prakuratura horad Płocka vystaviła abvinavačańni, piša Most.
U žniŭni 2024 hoda polskija pravaachoŭniki raskryli nielehalnuju vytvorčaść u Žyrardaŭskim paviecie kala Varšavy. U pryvatnych damach rabočyja pierapracoŭvali tytuń i fasavali hatovyja cyharety ŭ skrynki dla picy. Było znojdziena 3,8 miljona kantrafaktnych cyharet i 13,4 tony tytuniu, ahulny košt jakich acanili ŭ 14 miljonaŭ złotych (kala 3,6 miljona dalaraŭ).
Spačatku zatrymali siamioch čałaviek — troch palakaŭ i čatyroch biełarusaŭ, jakich abvinavacili ŭ złačynnaj dziejnaści i vytvorčaści nielehalnych tavaraŭ. Paźniej śledstva vyjaviła novych udzielnikaŭ schiemy.
U lutym i sakaviku 2025 hoda aryštavali jašče traich, siarod ich — 49-hadovy mužčyna, jakoha ličać arhanizataram biznesu. Nibyta mienavita jon vałodaŭ transpartnaj firmaj i zajmaŭsia padboram kadraŭ.
Biełaruski Hrodna, dzie pracuje bujnaja tytuniovaja fabryka «Nioman», mahčyma, staŭ krynicaj kvalifikavanych śpiecyjalistaŭ dla hetaha pradpryjemstva, bo mnohija naniatyja biełarusy mieli dośvied i navat inžyniernuju adukacyju.
Jašče dvaich padazravanych — 46-hadovaha mužčynu i 45-hadovuju žančynu — abvinavacili ŭ datyčnaści da złačynnaj hrupoŭki i arhanizacyi niezakonnaha ŭjezdu inšaziemcaŭ. Mužčyn uziali pad vartu, a žančynu adpuścili pad zakład u 70 tysiač złotych, ale jana zastajecca pad kantrolem palicyi.
Kamientary