Z kastryčnika pačnuć dziejničać novyja praviły ŭjezdu ŭ ES. Što źmienicca dla biełarusaŭ
Novaja sistema pierasiačeńnia miežaŭ Jeŭrasajuza hramadzianami inšych krain, uviadzieńnie jakoj niekalki razoŭ adkładałasia, pačnie pracavać z 12 kastryčnika 2025 hoda. Padrabiaznaści paviedamiła Jeŭrakamisija ŭ svaim pres-relizie.
Idzie havorka pra ŭkaranieńnie na ŭsich pamiežnych pierachodach i ŭ aeraportach krain Jeŭrasajuza bijamietryčnaj sistemy Entry/Exit System (EES). Meta — zrabić pierasiačeńnie miažy bolš chutkim i adnačasova ŭzmacnić efiektyŭnaść kantrolu.
Sistema praduhledžvaje, što pry pieršym ujeździe ŭ ES treba budzie zrabić fota i adskaniravać adbitki palcaŭ.
Hetyja danyja buduć zachoŭvacca ŭ sistemie try hady, paśla čaho — vydalacca. Pry nastupnym pierasiačeńni miažy, kali ŭ vas jość bijamietryčny pašpart, to kantrol budzie adbyvacca aŭtamatyčna.
Zarehistravacca ŭ EES možna budzie navat zahadzia praz mabilny dadatak. Paśla kančatkovaha ŭkaranieńnia sistemy ŭ bijamietryčnyja pašparty pierastanuć stavić štampy. Dla ŭładalnikaŭ zvyčajnych pašpartoŭ ničoha nie źmienicca i nijakich abmiežavańniaŭ nie budzie.
Pakul navat tyja, chto projdzie aŭtamatyčnuju identyfikacyju ŭ sistemie pa bijamietryčnym pašparcie, pavinny buduć padyści na pašpartny kantrol i pastavić štamp.
Sistema budzie ŭvodzicca pastupova ciaham šaści miesiacaŭ. U joj budzie zachoŭvacca ŭsia infarmacyja pra naviedvańni krain ES kankretnym čałaviekam: krainy ŭjezdu i vyjezdu, praciahłaść znachodžańnia, admovy va ŭjeździe, parušeńni i inšaje. Dostup da jaje buduć mieć usie konsulskija słužby pry vydačy novych viz.
Kamientary