Mužčyna patelefanavaŭ u milicyju, pradstaviŭsia inšym imiem i skazaŭ, što zabiŭ žonku
Siamiejnaja svarka ŭ Łuninieckim rajonie skončyłasia dla mužčyny kryminalnaj spravaj. Ale sprava była nie ŭ tym, pra što možna było padumać: žonka nie paciarpieła, prablemy ŭźnikli ŭ jaje svajaka. Hetuju historyju «Lusterka» znajšło ŭ banku sudovych rašeńniaŭ.
Incydent adbyŭsia ŭ Łuninieckim rajonie. Dakładnaja data nieviadomaja, adnak u pastanovie suda paznačany dzień pasiadžeńnia — 21 lutaha 2023 hoda. Pra abvinavačanaha Mikałaja havorycca, što jon žyvie ŭ adnoj ź viosak nazvanaha rajona, maje siaredniuju śpiecyjalnuju adukacyju i pracuje žyviołavodam.
Adnojčy biełarus znachodziŭsia doma i raśpivaŭ śpirtnoje. Kala pieršaj hadziny dnia, užo budučy niećviarozym, jon pasvaryŭsia z žonkaj Irynaj. Nazło joj vyrašyŭ patelefanavać u milicyju — i paviedamiŭ apierataru, što zabiŭ žonku.
Adnak, kali milicyjant paprasiŭ nazvać imia, Mikałaj pradstaviŭsia bratam Natalli — Kiryłam.
Sam Kiryła ŭ toj dzień taksama byŭ doma, pravodziŭ čas z žonkaj i dziciem. Raptam u dźviery pahrukali siłaviki i pačali vyśviatlać, ci telefanavaŭ mužčyna ŭ dziažurnuju častku i ci nie zabiŭ svaju žonku. Pierakanaŭšysia, što žančyna žyvaja i ź joj usio ŭ paradku, milicyjaniery stali raźbiracca dalej.
Vyśvietliŭšy, što telefanavaŭ Mikałaj, jany pryjechali da jaho dadomu i vyjavili, što Iryna žyvaja. A taksama znajšli smartfon, ź jakoha mužčyna telefanavaŭ dziažurnamu.
Na žychara Łuninieckaha rajona zaviali kryminalnuju spravu pa č. 2 art. 400 KK — zahadzia iłžyvy danos ab ździajśnieńni złačynstva, złučany z abvinavačvańniem u asabliva ciažkim złačynstvie.
Da suda mužčyna znachodziŭsia pad padpiskaj ab niavyjeździe. Na pasiadžeńni jon pryznaŭ, što paviedamiŭ pra «zabojstva» ad imia svajaka, i raskajaŭsia ŭ hetym. Heta paličyli źmiakčalnym abstavinaj. Ale na momant zvanka jon byŭ u stanie ałkaholnaha apjanieńnia. U vyniku Mikałaja pryhavaryli da dvuch hadoŭ «chatniaj chimii», a telefon, ź jakoha jon telefanavaŭ, kanfiskavali.
Ciapier čytajuć
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ5
Kamientary