U Maskvie vykrali i pabili baćku padletka, čyjo cieła vystavili napakaz na płoščy ŭ Čačni
17-hadovaha Eskierchana Chumašava zastrelili, kali jon napaŭ na post DPS. Paśla hetaha Ramzan Kadyraŭ pačaŭ pahražać jaho svajakam.
U Maskvie vykrali 45-hadovaha Eldara Chumašava — baćku padletka, jakoha zabili ŭ Čačni.
Mužčynu vyvieźli ŭ rehijon i žorstka źbili, piša The Insider sa spasyłkaj na pravaabaroncaŭ z Vayfond Association. Paviedamlajecca, što Chumašava, jaki nie žyŭ z synam, źbili — u jaho złamanyja ruki, nohi i rebry. Zaraz jon znachodzicca ŭ ciažkim stanie.
17-hadovy Eskierchan Chumašaŭ napaŭ z nažom na post DPS u Ačchoj-Martanie viečaram 7 krasavika. Milicyjaniery zastrelili jaho na miescy. Padletku było 17 hadoŭ. Pavodle źviestak vydańnia «7x7», pryčynaj napadu staŭ kanflikt z adnym ź siłavikoŭ — toj rehularna prynižaŭ i abražaŭ junaka.
Paviedamlałasia, što siłavik — były ŭdzielnik vajny suprać Ukrainy, ale paćvierdzić hetuju infarmacyju pakul nie ŭdałosia. Pavodle źviestak ŚMI, Chumašaŭ chacieŭ adpomścić kryŭdzicielu, ale praz pamyłku paraniŭ nažom jahonaha padnačalenaha Ramzana Dubajeva, jaki ŭ vyniku zahinuŭ.
Paśla zdareńnia kiraŭnik Čačni Ramzan Kadyraŭ staŭ pahražać siamji Chumašava: ich paabiacali vysłać z respubliki i pazbavić majomaści. 9 krasavika na centralnaj płoščy Ačchoj-Martana byŭ arhanizavany mitynh, na jaki sahnali biudžetnikaŭ i navat školnikaŭ. U rolikach vidać, što cieła padletka pakłali na asfalt pierad sabranymi, jano zastavałasia tam i paśla taho, jak natoŭp razyšoŭsia, mima prosta jeździli aŭtamabili.
Na mitynhu arhanizatarami napadu na post DPS nazvali pradstaŭnikoŭ apazicyjnaha čačenskim uładam kanała Niyso, a kurataram apieracyi — supracoŭnika ŭkrainskich śpiecsłužbaŭ.
10 krasavika Niyso napisaŭ, što siłaviki zatrymali ŭsich svajakoŭ napadnika, u tym liku jaho niepaŭnaletnich stryječnych bratoŭ. Akramia taho, nieviadomyja vykrali svajakoŭ niekatorych publičnych udzielnikaŭ hetaha prajekta. Siarod vykradzienych 73-hadovy mužčyna.
U Kramli robiać vyhlad, što śviedčańni pra toje, što adbyvajecca ŭ Čačni, mohuć być nienadziejnymi. Pres-sakratar Pucina Dźmitryj Piaskoŭ nazvaŭ krynicy infarmacyi «nie zasłuhoŭvajučymi davieru», niahledziačy na toje, što jak minimum łakacyja z rolikaŭ ź ciełam lohka paćviardžajecca, fatahrafii hetaha miesca jość navat na sajcie «Jedinoj Rośsii». Vykradańnie i źbićcio čałavieka ŭ Maskvie Piaskoŭ pakul uvohule nie kamientavaŭ.
Ciapier čytajuć
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna10
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ2121
Kamientary