Za Rasiju va Ukrainie vajujuć tysiačy najmitaŭ ź jak minimum paŭsotni krain śvietu. Chto jany?
Uładzimir Pucin zajaŭlaje, što Rasija nie maje patreby ŭ zamiežnych najmitach: «U nas niama takoj nieabchodnaści — zaprašać dla bajavych dziejańniaŭ ludziej zboku», — kazaŭ jon u vieraśni 2023 hoda. Ale tolki ŭ Maskvie na vajnu z Ukrainaj mahli zavierbavać bolš za paŭtary tysiačy zamiežnych najmitaŭ za hod, vyśvietlili «Važnyje istorii».
«Važnyje istorii» ŭstanavili imiony zamiežnych najmitaŭ z dapamohaj uciečki z maskoŭskaj miedycynskaj bazy (JEMIAS), jakaja achoplivaje pieryjad krychu bolš za hod — z momantu adkryćcia vierbavalnaha centra ŭ krasaviku 2023-ha da kanca maja 2024 hoda. Chto ž ź inšaziemcaŭ jedzie vajavać za Rasiju i što ich čakaje na froncie?
«Humovaja kvatera» na Jabłačkava
U krasaviku 2024 hoda chakierskaja hrupoŭka DumpForums zajaviła pra ŭzłom niekalkich sistem Departamienta infarmacyjnych sistem (DIT) meryi Maskvy. Pa słovach uzłomščykaŭ, jany pranikli ŭ sistemu DIT hodam raniej i za hety čas vyhruzili niekalki bujnych baz danych. U tym liku chakiery atrymali dostup da piersanalnych danych maskvičoŭ z adzinaj miedycynskaj infarmacyjna-analityčnaj sistemy (JEMIAS).
Jak vyśvietlili «Važnyje istorii», u vyniku hetaj uciečki ŭ adkryty dostup trapiła infarmacyja pra sotni inšaziemcaŭ, jakija prajšli praz punkt adboru na vajskovuju słužbu pa kantrakcie ŭ Maskvie.
U bolš za 1,5 tysiač zamiežnych hramadzian, jakija fihurujuć u bazie JEMIAS, u jakaści adrasu pražyvańnia paznačany adras adzinaha punkta adboru na kantrakt — vulica Jabłačkava, dom 5, budynak 1. Časam u danych sustrakajecca i numar kvatery. Pavodle ŭciečki, amal try sotni inšaziemcaŭ «žyvuć» u kvatery pad numaram 302. Taki ž numar maje kabiniet miedycynskaha ahladu ŭ punkcie viarboŭki.
Centr pa nabory kantraktnikaŭ pačaŭ pracu 1 krasavika 2023 hoda. Prykmiety padrychtoŭki da pryjomu pieršych dobraachvotnikaŭ možna zaŭvažyć va ŭciečcy JEMIAS prykładna za tydzień da zapusku centra. Tady ŭ sistemu ŭnieśli danyja dvuch «ciozak» — «Testavy Test Testavič» i «Testaŭ Test Testavič». Ich adrasam byŭ paznačany dom na Jabłačkava.
Pra toje, što ŭ supracoŭnikaŭ punkta viarboŭki jość dostup da sistemy JEMIAS, raskazvali i staličnyja ŭłady, i praŭładnyja ŚMI.
U punkcie na Jabłačkava ŭ achvotnych padpisać kantrakt prymajuć ankietu, fatahrafii i inšyja dakumienty, a na ŭvachodzie treba atrymać tałon. «Važnyje istorii» znajšli fota takoha pakieta dakumientaŭ u tyktok-akaŭncie adnaho ź niepalskich najmitaŭ — Rabina Rai. Na fota bačna, što Rai atrymaŭ tałon 16 vieraśnia 2023 hoda ŭ 12:34. Jak vynikaje z danych uciečki, prykładna praz paŭhadziny danyja Rabina Rai ŭnieśli ŭ JEMIAS. Možna mierkavać, što za hety čas najmit prajšoŭ šlach ad pieršaha paviercha, dzie kandydaty zapaŭniajuć ankiety, da treciaha paviercha, dzie znachodzicca kabiniet dla miedahladu.
Adzin ź niepalskich kantraktnikaŭ vykłaŭ ankietu dla zaklučeńnia kantraktu ź Minabarony i elektronny tałon z toj ža dataj, kali jaho imia źjaviłasia ŭ JEMIAS. Pamiž časam druku tałona i ŭniasieńniem u miedycynskuju bazu — prykładna 30 chvilin.
Tam ža, na Jabłačkava, inšaziemcam afarmlali bankaŭskija karty. Pra heta ŭ tyktok-akaŭncie raskazaŭ jašče adzin najmit ź Niepała, Binod Bachadur Sunuvar. Pa vynikach vizitu ŭ punkt viarboŭki zamiežnym najmitam uručali pradpisańnie z prapanovaj źjavicca ŭ navučalny centr «Avanhard» u Padmaskoŭi, dzie raźmiaščajuć kantraktnikaŭ, jakija čakajuć zahadu ab zaličeńni va US RF. Taki dakumient vykłaŭ jašče adzin hramadzianin Niepała — Durha Prasad Nieŭpanie. Zhodna z uciečkaj JEMIAS, pradpisańnie vydadziena ŭ toj ža samy dzień, kali jon naviedaŭ punkt na Jabłačkava. Užo na nastupny dzień, 19 kastryčnika, niepalec apublikavaŭ fota z «Avanharda» ŭ vajskovaj formie.
Zamiežnyja najmity pravodzili ŭ «Avanhardzie» kala dvuch tydniaŭ u čakańni zahadu ab zaličeńni ŭ armiju, paśla čaho adpraŭlalisia na vučeńni i zatym na front.
Pa adkrytych krynicach udałosia paćvierdzić, što dziasiatki inšaziemcaŭ z adrasam na Jabłačkava ŭdzielničali ŭ vajnie va Ukrainie. Niekatoryja ź ich zahinuli abo apynulisia ŭ pałonie, ale jość i tyja, chto prasłužyŭ uvieś termin kantraktu i zmoh adličycca z šerahaŭ US RF.
Adnak nie ŭsie, chto naviedaŭ maskoŭski punkt adboru na kantrakt, prystupili da słužby ŭ rasijskim vojsku. Znojdziena jak minimum 13 vypadkaŭ, kali zamiežnyja dobraachvotniki pakidali Rasiju na nastupny dzień abo praź niekalki dzion paśla vizitu na Jabłačkava. Vierahodna, častka ź ich admoviłasia jechać va Ukrainu z-za ŭśviedamleńnia, z čym treba budzie sutyknucca na vajnie.
Deziercir ź Niepała Kchakiendra Kchatry zrazumieŭ, što stanie «harmatnym miasam», kali kalehi pa trenirovačnym centry dadali jaho ŭ vatsap-hrupu. Tam jany abmieńvalisia infarmacyjaj i vykładali roliki z frontu.
«Na hetych videa kuča ruskich i niepalcaŭ lažali miortvymi na poli boju, — raskazvaŭ Kchatry ŭ intervju «Novaja hazieta — Jeŭropa». — Chtości biez noh, chtości biez ruk, pasiniełyja. Mnie stała vielmi strašna».
Paśla hetaha niepalec źbieh z čaści, złaviŭ spadarožnuju mašynu da Maskvy i palacieŭ na radzimu, tak i nie pabyvaŭšy na froncie.
Niepalskija turysty
«Važnyje istorii» ŭstanavili krainu pachodžańnia bolš za 1,3 tys. z 1,5 tys. inšaziemcaŭ, jakija prajšli praz maskoŭski punkt adboru na kantrakt za hod.
Pieršaje miesca pa kolkaści dobraachvotnikaŭ, jakija adpravilisia ŭ Rasiju, zaniali krainy Paŭdniovaj i Uschodniaj Azii — 771 čałaviek. Na druhim i trecim miescach — krainy byłoha SSSR (523 čałavieki) i Afryka (72 najmity).
Bolš za ŭsio najmitaŭ adpravilisia ŭ Rasiju ź Niepała — maskoŭski punkt viarboŭki naviedali jak minimum 603 čałavieki z hetaj krainy.
Pieršyja niepalcy źjavilisia ŭ rasijskaj armii nie paźniej za maj 2023 hoda, vynikaje z uciečki. Spačatku jany pryjazdžali nievialikimi hrupami pa dva-try čałavieki, ale da žniŭnia ich płyń vyrasła da 30 čałaviek u miesiac, a za kastryčnik praz punkt adboru na Jabłačkava prajšło bolš za 370 čałaviek. U asobnyja dni płyń niepalcaŭ pieravyšała pakazčyk za ŭvieś žnivień.
U pieršaj pałovie listapada nabor dobraachvotnikaŭ ź Niepała syšoŭ na ništo. U hety čas pra viarboŭku niepalcaŭ na vajnu ŭ Rasii pačali raskazvać u ŚMI, i ŭłady hetaj krainy paprasili Kreml nie nabirać hramadzian Niepała ŭ armiju RF. Tym nie mienš, ich viarboŭka praciahvałasia jak minimum da 20 śniežnia. Da pačatku studzienia, kali Niepał pierastaŭ vydavać dazvoły na pracu ŭ Rasii, žychary hetaj krainy ŭžo dva tydni nie źjaŭlalisia na Jabłačkava.
Pa paviedamleńniach niepalskich miedyja, žychary krainy ŭstupali va US RF i paśla zabarony ŭładaŭ. Heta paćviardžajecca i danymi z uciečki: znojdziena čaćviora hramadzian Niepała, jakija prajšli adbor na zaklučeńnie kantraktu ŭ studzieni i lutym 2024 hoda.
Rasija nie paviedamlaje svajakam niepalcaŭ, jakija adpravilisia na vajnu, pra ich los. Siemji sprabujuć damahčysia dapamohi ad uładaŭ Niepała, ale nie ŭsie mohuć źmirycca sa strataj. Tak, praź niekalki miesiacaŭ paśla źniknieńnia Ranała Mišra va Ukrainie jaho baćka skončyŭ žyćcio samahubstvam.
U sakaviku 2025 hoda niekalki siemjaŭ zahinułych i źnikłych bieź viestak niepalcaŭ pryjechali ŭ Maskvu, kab zapatrabavać ad Rasii vypłacić kampiensacyju za zahinułych i adšukać źnikłych. Pavodle źviestak ambasady Niepała, na rachunki svajakoŭ pavinny pieraličyć kala 12 miljonaŭ rubloŭ.
Da hetaha momantu ŭrad Niepała paćvierdziŭ hibiel 48 najmitaŭ. Uvosień 2024 hoda stała viadoma, što rasijskija ŭłady taksama zapytali ŭzory DNK dla identyfikacyi ciełaŭ 57 čałaviek, tamu kolkaść zahinułych moža pieravysić adznaku ŭ sto vajskoŭcaŭ. U adkrytych krynicach sustrakalisia imiony 55 niepalcaŭ, jakija zahinuli na vajnie va Ukrainie abo znachodziacca ŭ śpisach na DNK-testavańnie, znojdzienych u bazie JEMIAS.
«Važnyje istorii» paraŭnali śpis niepalskich dobraachvotnikaŭ, jakija prychodzili ŭ punkt adboru na Jabłačkava, ź inšymi ŭciečkami. Vyjavilisia dvoje niepalcaŭ, pra śmierć jakich nie paviedamlali miascovyja ŚMI — heta 43-hadovy Ram Kryšna Adchikary i 22-hadovy Machiendra Mała. Ich imiony ŭtrymlivajucca ŭ dakumientach, jakija ŭkrainski prajekt «Chaču znajści» nazyvaje śpisami evakujavanych ciełaŭ i pareštkaŭ vajskoŭcaŭ US RF. Aŭtary telehram-kanała śćviardžajuć, što śpisy achoplivajuć pieryjad z 1 pa 14 lutaha 2025 hoda.
Vierahodna, jašče 35 kantraktnikaŭ ź Niepała mahli dezierciravać: ich imiony znajšli ŭ źlitych u sieciva śpisach tych, chto samavolna pakinuŭ čaść. U hetych źviestkach paznačana, što na adnaho ź niepalcaŭ raspačali kryminalnuju spravu pavodle artykuła ab deziercirstvie (č.5 art. 337 KK), a jašče šaściarych zatrymali, adnak inšych paćvierdžańniaŭ hetaj infarmacyi niama.
Paśla zakančeńnia hadavoha kantraktu mnostva najmitaŭ ź Niepała viarnulisia dadomu, adnak niekatoryja zastavalisia ŭ składzie US RF jak minimum da krasavika 2025 hoda, vynikaje ź ich sacsietak. Zusim niadaŭna, u sakaviku 2025-ha, niepalcaŭ možna było sustreć nie tolki va Ukrainie, ale i ŭ Kurskaj vobłaści.
Ad zachodnich kaštoŭnaściaŭ — da pravasłaŭja
Vajavać za Rasiju jeduć nie tolki žychary Azii, ale i pradstaŭniki krain Zachadu. «Važnyje istorii» vyjavili va ŭciečcy niekalki dziasiatkaŭ hramadzian Jeŭrasajuza i dvuch — ZŠA.
Adzin ź ich akazaŭsia poŭnym ciozkam byłoha amierykanskaha vajskoŭca z 82-j pavietrana-desantnaj dyvizii — 30-hadovaha Mećju Kajła Dubrona sa štata Nievada. Jaho imia i ŭzrost, nazvanyja va ŭciečcy JEMIAS, supadajuć z danymi z adkrytaj bazy amierykanskich vybarščykaŭ.
Dubron pryśviaciŭ niekalki hadoŭ vajskovaj padrychtoŭcy: jašče padletkam jon naviedvaŭ letni kadecki łahier na avijabazie ŭ Kalifornii, a adukacyju atrymaŭ u vajskovym kaledžy. Z maskoŭskaj miedycynskaj bazy vynikaje, što Mećju Dubron prajšoŭ abśledavańnie na Jabłačkava 15 lutaha 2024 hoda. Jaho dalejšy los nieviadomy.
Praz staličny punkt adboru na kantraktnuju słužbu prajšli jak minimum 34 hramadzianiny jeŭrapiejskich krain. Try čverci ź ich — rodam z krain, jakija Rasija ličyć niedružalubnymi praź ich padtrymku Ukrainy. Naprykład, u rasijskuju armiju sprabavali trapić hramadzianie Vialikabrytanii, Francyi, Bielhii, Italii i Aŭstryi.
26 lutaha 2024 hoda ŭ punkcie viarboŭki na Jabłačkava źjaviŭsia 21-hadovy francuz Žan Kleman. Jak vyśvietlili «Važnyje istorii», jahonuju maci, Elen Kleman-Picijo, rehularna zaprašajuć u jakaści ekanamičnaj ekśpiertki ŭ efiry francuzskaha adździaleńnia RT i frankamoŭnaj viersii «Sputnika» — padraździaleńnia dziaržaŭnaha chołdynhu «Rośsija siehodnia».
Jašče ŭ 2018 hodzie Kleman-Picijo vystupała na adnoj kanfierencyi z ultrakansiervatyŭnym fiłosafam Alaksandram Duhinym. Jak adznačajuć arhanizatary, mierapryjemstva z udziełam Kleman-Picijo prajšło ŭ ramkach prajekta pa «aktualizacyi miakkaj siły Rasii na jeŭrazijskaj prastory».
Supracoŭnictva z rasijskaj prapahandaj nie pieraškodziła jaje karjery ŭ Francyi. Jak minimum da lipienia 2024 hoda jana vykładała ŭ prestyžnaj Vyšejšaj škole sacyjalnych navuk (EHESS) u Paryžy. U śviežych siužetach rasijskija ŚMI nazyvajuć jaje daśledčycaj Paryžskaj škoły ekanamičnaj vajny (EGE).
Žan Kleman vučyŭsia ŭ škole ŭ centry Maskvy i dobra havoryć pa-rusku. Ź dziacinstva jon udzielničaje ŭ pravasłaŭna-patryjatyčnych łahierach. U 2016 hodzie Kleman adpraviŭsia ŭ dziciačy pravasłaŭny łahier na hrecki vostraŭ Lemnas, pajezdku arhanizavaŭ dabračynny fond «Naśledije». Jaho ŭznačalvaje hienierał-lejtenant Słužby źniešniaj raźviedki i staršynia naziralnaj rady «Carhrada» Leanid Rašetnikaŭ.
«Lemnas ja budu pamiatać usio žyćcio! — dzialiŭsia Kleman. — Tut ja daviedaŭsia, što takoje sapraŭdnaja pravasłaŭnaja viera».
Praz paŭhoda paśla vizitu ŭ punkt adboru na Jabłačkava Kleman źjaviŭsia na fatahrafii, źniataj na poŭdni Rasii. Jon pračytaŭ paviedamleńnie «Važnych istorij» z prośbaj ab kamientary, ale ničoha nie adkazaŭ.
Jašče adzin jeŭrapiejec sa śpisu — 34-hadovy datčanin Nikłas Chafhor, viadomy ŭ Danii jak repier Stanley Most: pavodle jaho słoŭ, dackija sałdaty, jakija vajavali ŭ Iraku, słuchali jaho muzyku ŭ akopach.
Datčanin źjaviŭsia ŭ maskoŭskim punkcie adboru ŭ vieraśni 2023 hoda. A praz hod, u žniŭni 2024-ha, praz sud damohsia skasavańnia kantraktu ź Minabarony.
Chafhor padtrymlivaŭ Uładzimira Pucina i vystupaŭ suprać zachodnich kaštoŭnaściaŭ, a z dapamohaj kantraktu ź Minabarony spadziavaŭsia atrymać rasijskaje hramadzianstva. Jon ličyŭ, što sam abiare sabie miesca słužby, ale trapiŭ na vajnu va Ukrainie i skardziŭsia na ździeki z boku tavaryšaŭ pa słužbie: pa jaho słovach, jaho źbivali, prymušali pić harełku, adbirali telefon i padazravali ŭ špijanažy na karyść ZŠA i Danii.
«Jon trapiŭ u situacyju nie pa svajoj voli, nie źbiraŭsia ŭdzielničać u pracy mienavita takich padraździaleńniaŭ, — kaža «Važnym istorijam» jahony advakat Raman Piatroŭ. — Heta parušeńnie z boku punkta adboru na kantrakt. Jon ža ruskaj movaj nie vałodaje, jany nie aznajomili jaho z kantraktam, nie pieraviali jaho dasłoŭna. Jon vielmi ździviŭsia, kali jaho tudy [pad Łuhansk] adpravili. Pierakładčyki ŭ punkcie adboru zaŭsiody byli, prosta nichto siabie na miescy nie turbavaŭ tym, kab jak naležyć usio rastłumačyć čałavieku, u ich ža patok idzie».
Jak raskazaŭ «Važnym istorijam» Piatroŭ, praz dva miesiacy paśla suda rašeńnie było vykanana, datčanina vyklučyli sa śpisaŭ čaści i zvolnili.
«Jon atrymaŭ usie naležnyja jamu vypłaty, maje pa zakonie prava na status vieterana i ŭsie vieteranskija lhoty. Žyvie i pracuje ŭ Maskvie, dadomu pakul nie źbirajecca, tamu što baicca, što buduć pieraśledy (u Danii najmictva pieraśledujecca pavodle zakona. — Zaŭv. red.), — raskazvaje Piatroŭ. — Maje prava na atrymańnie rasijskaha hramadzianstva, ale pakul jon nad hetym pytańniem dumaje».
Siarod krain Jeŭropy absalutny lidar u kolkaści zamiežnych najmitaŭ — «družalubnaja» Rasii Sierbija, čyje dobraachvotniki vajavali na rasijskim baku jašče z pačatku vajny na ŭschodzie Ukrainy ŭ 2014 hodzie. Jak minimum vosiem sierbaŭ prajšli praz punkt adboru na kantrakt u Maskvie ŭ 2023-2024 hadach.
Siarod ich — 26-hadovy Mijadrah Bieryč, syn sierbskaha snajpiera Dejana Bieryča, jaki zajmaŭsia viarboŭkaj sierbaŭ u rasijskaje vojska. Mijadrah Bieryč źjaviŭsia ŭ maskoŭskim punkcie adboru na kantrakt u kancy kastryčnika 2023 hoda. Telehram-kanał «VČK-OHPU» paviedamlaŭ, što ŭ studzieni 2024-ha Bieryč-małodšy byŭ zvolnieny z šerahaŭ rasijskaj armii. Heta adbyłosia paśla taho, jak jahony baćka paskardziŭsia na kamandavańnie 119-ha parašutna-desantnaha pałka, dzie słužyli sierbskija najmity.
Blizki Uschod: ucioki sa svajho vojska ŭ rasijskaje
Jašče 71 čałaviek sa śpisu — vychadcy z krain Blizkaha Uschodu (Jehipta, Irana, Iraka, Livii, Siryi, Turcyi, Ałžyra i inšych krain rehijonu), mnohija ź jakich taksama achoplenyja ŭzbrojenymi kanfliktami.
26-hadovy siryjec Amaran Chadak pierasialiŭsia ŭ Rasiju jašče da pačatku vajny z Ukrainaj. Jon naradziŭsia ŭ šmatdzietnaj siamji ŭ siryjskim horadzie Chama, a padčas vučoby ŭ škole, kali jamu spoŭniłasia 18 hadoŭ, atrymaŭ pozvu ŭ vojska. U 2019 hodzie, «nie žadajučy słužyć», jon źjechaŭ ź Siryi ŭ Rasiju pa adnarazovaj dziełavoj vizie, staŭ pracavać hruzčykam na rynkach Maskvy i zapytaŭ prytułak u rasijskich uładaŭ, abhruntavaŭšy heta «pahrozaj aryštu praz uchileńnie ad słužby ŭ vojsku», vynikaje z dakumientaŭ sudovaha pracesu, na jakim u 2021 hodzie Chadak sprabavaŭ asprečyć admovu MUS u nadańni jamu statusu ŭciekača.
Sud nie staŭ na bok siryjca, adnak Rasiju Chadak nie pakinuŭ. U kastryčniku 2023 hoda maskoŭski sud aštrafavaŭ jaho za parušeńnie mihracyjnaha zakanadaŭstva — pa adnarazovaj vizie jon moh znachodzicca ŭ Rasii tolki da 2020 hoda — i prysudziŭ da vydvareńnia za miežy krainy: Chadak pavinien byŭ pakinuć Rasiju na praciahu piaci dzion. Na sudzie jon nie moh razmaŭlać bieź pierakładčyka, nie razumieŭ ruskuju movu i nie moh nazvać svaju poŭnuju datu naradžeńnia, zhadvałasia ŭ dakumientach pa spravie.
Za try tydni da hetaha rabotniki maskoŭskaha punkta viarboŭki ŭnieśli Chadaka ŭ bazu kantraktnikaŭ: vierahodna, z dapamohaj słužby ŭ vojsku jon chacieŭ atrymać rasijskaje hramadzianstva, choć jašče niekalki hadoŭ tamu źbieh z rodnaj krainy, sprabujučy hetaj słužby paźbiehnuć.
Amal pałova (44%) vychadcaŭ z krain Blizkaha Uschodu — rodam ź Jehipta. Pieršyja jehipieckija dobraachvotniki pačali źjaŭlacca ŭ maskoŭskim punkcie adboru jašče ŭ krasaviku 2023 hoda, jak tolki jon pačaŭ pracu. Vierahodna, jehipcian ahitujuć padpisać kantrakt užo ŭ Rasii: try čverci zavierbavanych z tych, pa kamu dastupnyja dadzienyja pahransłužby, pražyli ŭ krainie bolš za miesiac da pachodu ŭ staličny punkt viarboŭki, 39% — bolš za hod. Siarod ich-byłyja studenty rasijskich VNU (kolkaść studentaŭ ź Jehipta ŭ Rasii pavialičvajecca ŭ apošnija hady) i mužy rasijanak u pracesie razvodu.
U trojku krain-lidaraŭ Blizkaha Uschodu, čyje hramadzianie prajšli praz maskoŭski punkt adboru, taksama trapili Iran i Ałžyr. Niekatoryja z hetych najmitaŭ užo atrymali rasijskaje hramadzianstva.
40-hadovy Iman Raisivanani ź Irana pryjšoŭ u punkt adboru na Jabłačkava ŭ kancy śniežnia 2023 hoda. Jaho adpravili ŭ motastrałkovyja vojski na terytoryju Łuhanskaj vobłaści. Užo praź niekalki miesiacaŭ Raisivanani trapiŭ pad minamiotny abstreł i atrymaŭ askiepkavaje ranieńnie nahi. Paśla lačeńnia ŭ špitali jon padaŭ prašeńnie ab rasijskim hramadzianstvie i ŭ kastryčniku 2024-ha atrymaŭ jaho ŭ sproščanym paradku — «jak udzielnik śpiecyjalnaj vajskovaj apieracyi».
Iraniec staŭ rasijskim hramadzianinam, nie adsłužyŭšy na froncie i hoda — heta termin, na jaki z zamiežnikami padpisvajuć pieršy kantrakt. «Pieršy dom — Iran, druhi — Rasija», — skazaŭ u prapahandysckim telesiužecie Raisivanani, jakoha ŭ Iranie čakajuć baćki i dočki.
24-hadovy Kamiel Letajef nazyvaje siabie «pieršym u historyi Rasii ałžyrcam, jaki ŭstupiŭ u šerahi rasijskaj armii». U punkt adboru na Jabłačkava jon pryjšoŭ u kastryčniku 2023 hoda — da hetaha tudy źviartalisia jak minimum dva hramadzianiny Ałžyra, vynikaje z našych źviestak. Tady ž u sacsietkach jon padzialiŭsia pieršaj fatahrafijaj u rasijskaj vajskovaj formie, a z 2024 hoda staŭ vykładvać fota i videa z hieateham Čyrvony Prapar (pasiołak u Pieravalskim rajonie Łuhanskaj vobłaści Ukrainy): na niekatorych ź ich — raskładzienyja cieły vajskoŭcaŭ. Užo ŭ krasaviku 2024 — ha — heta značyć mienš, čym praz hod paśla zaklučeńnia kantraktu — Letajef sfatahrafavaŭsia z rasijskim pašpartam i Kanstytucyjaj RF u rukach pad partretam Uładzimira Pucina.
Afryka: u armiju z forumu «Za mir» z udziełam Pucina
U rasijskuju armiju viarbujuć i inšaziemcaŭ ź nieščaślivych krain Afryki: 72 čałavieki, jakija prajšli praz maskoŭski punkt adboru, — rodam z afrykanskich krain z vysokim uzroŭniem biespracoŭja i biednaści. U trojcy krain-lidaraŭ, čyje hramadzianie prajšli praz maskoŭski punkt, — Hana, Kamierun i Sieniehał.
Vychadcy z krain Afryki nie adrazu adpraŭlalisia padpisvać kantrakt, vynikaje sa źviestak ab pierasiačeńni miažy: 11 z 12 čałaviek, pa jakich dastupnyja takija źviestki, znachodzilisia ŭ Rasii bolš za miesiac pierad tym, jak pryjści ŭ punkt adboru na vulicy Jabłačkava.
25-hadovy Džozef Dezair Pakam z Kamieruna prylacieŭ u Rasiju ŭ lipieni 2023 hoda — u pieršy dzień samitu «Rasija — Afryka», jaki byŭ arhanizavany Fondam Raskanhres i prajšoŭ pad łozunham «Za mir, biaśpieku i raźvićcio» z udziełam delehacyj z afrykanskich krain i Rasii. Na samicie vystupiŭ i Uładzimir Pucin.
Paśla samitu kamieruniec Pakam zastaŭsia ŭ Maskvie i praz try miesiacy, u listapadzie 2023 hoda, adpraviŭsia ŭ punkt adboru na Jabłačkava. Paźniej Pakam raskazaŭ, što ŭ rodnaj krainie zajmaŭsia vyroščvańniem pamidoraŭ i pryjechaŭ na samit «Rasija — Afryka» pa turystyčnaj vizie.
«Ja pajechaŭ sa svajoj krainy, tamu što tam šmat prablem. Ale ŭ mianie była časovaja viza. Kab pracavać u Maskvie, treba było mieć stabilny dakumient. Siabry padkazali mnie, što, pakolki jość vajna, možna ŭstupić u vojska», — kaža Pakam.
Pavodle jaho, jon hod pravioŭ na Chiersonskim kirunku, a ciapier zajmajecca atrymańniem rasijskaha hramadzianstva.
«Tata Uładzimir Pucin, jaho treba pavažać. Ja maryŭ by ŭbačyć jaho i pacisnuć jamu ruku ci chacia b padniać ruku i pieradać pryvitańnie», — kaža Pakam u prapahandysckim siužecie na rasijskim telebačańni.
Zaklučyć kantrakt z rasijskim vojskam chacieli jašče jak minimum dva ŭdzielniki samitu «Rasija-Afryka»: «Važnyje istorii» znajšli ich imiony, paraŭnaŭšy źlity ŭ sieciva śpis tych, chto naviedaŭ forum, z bazaj maskoŭskaha punkta adboru na vajskovuju słužbu. Heta 22-hadovy Papie Machidzinie Mbaje, mieniedžar pa markietynhu ŭ Sieniehale, i 33-hadovy Cyrył Danfak z Kamieruna, jaki pracavaŭ kiroŭcam u turystyčnaj kampanii. Jon prylacieŭ u Rasiju ŭ dzień pačatku samitu «Rasieja-Afryka» adnym rejsam z Pakamam, jaki nazvaŭ Pucina tatam.
Nie ŭsim inšaziemcam, jakija padpisali kantrakt, šancuje ź lehalizacyjaj u Rasii hetak ža sama, jak kamieruncu Pakamu. Jak minimum dvaich hramadzian afrykanskich krain, jakija prajšli praz punkt adboru na Jabłačkava, u Rasiei sudzili za znachodžańnie ŭ krainie biez dakumientaŭ, jakija dajuć na heta prava.
26-hadovy Handzi Asiej Akota z Hany prybyŭ u Rasiju ŭ śniežni 2023 hoda pa vizie, vydadzienaj na adzin miesiac. Kali termin vizy padychodziŭ da kanca, Akota pryjšoŭ u maskoŭski punkt adboru na słužbu pa kantrakcie. Praz hod, užo paśla zakančeńnia terminu słužby, Akota sudzili za parušeńnie mihracyjnych praviłaŭ — u jaho nie było dakumientaŭ, jakija dazvalajuć jamu zastavacca ŭ Rasii. Sud uličyŭ, što Akota zaklučyŭ hadavy kantrakt ź Minabarony, i prysudziŭ jaho štrafu ŭ piać tysiač rubloŭ biez vydvareńnia z krainy.
Inšy kantraktnik z Kamieruna zaśviaciŭsia ŭ źlitaj u sieciva bazie dezierciraŭ z rasijskaj armii: 32-hadovy Radryh Tšuanfanh Nhabieu pryjšoŭ u punkt adboru na Jabłačkava ŭ śniežni 2023 hoda. Da zakančeńnia hadavoha kantraktu, u žniŭni 2024-ha, Maskoŭski sud pryznaŭ jaho vinavatym u parušeńni mihracyjnych pravił i prysudziŭ da štrafu i vydvareńnia z Rasii.
Mihranty z postsavieckich krain
Pra viarboŭku ŭ rasijskuju armiju pracoŭnych mihrantaŭ z krain byłoha SSSR stała viadoma jašče na pieršym hodzie poŭnamaštabnaj vajny. Praz adzin tolki punkt adboru na Jabłačkava za hod ź nievialikim prajšło jak minimum 523 čałavieki ź dziaržaŭ postsavieckaj prastory.
Bolšaść — vychadcy z Tadžykistana, Uźbiekistana, Biełarusi, Kyrhyzstana i Kazachstana. Niekatoryja prylacieli ŭ Rasiju z rodnych krain u toj ža dzień abo za dzień da źjaŭleńnia ŭ punkcie adboru, adnak bolšaść z tych, pa kamu dastupnyja danyja ab pierasiačeńni miažy, pražyli ŭ Rasii bolš za miesiac (82%), a časta i bolš za hod (36%).
Siarod ich — kyrhyzstaniec Askar Kubanyčbiek, jaki žyŭ u Rasii z 2012 hoda. Jašče ŭ červieni 2022-ha jon adpraviŭsia dobraachvotnikam na front, dzie pravioŭ piać miesiacaŭ. Paśla hetaha Kubanyčbieka zatrymali ŭ Kyrhyzstanie i sudzili za najmictva. Za ŭdzieł u vajnie va Ukrainie jaho prysudzili da siami hadoŭ pazbaŭleńnia voli, ale adpuścili na volu, pryznačyŭšy trochhadovy nahlad.
Užo ŭ mai 2024 hoda Kubanyčbiek pryjšoŭ u maskoŭski punkt viarboŭki, kab zaklučyć novy kantrakt na słužbu ŭ rasijskaj armii. Jak paviedamlali kyrhyzstanskija ŚMI, užo ŭ žniŭni taho ž hoda Kubanyčbiek staŭ hramadzianinam Rasii.
Ukrainskija vajskoŭcy zachapili ŭ pałon hramadzianina Sieniehała
Rasija zavierbavała na vajnu suprać Ukrainy 200 niepalcaŭ, 14 užo zahinuli
Na froncie va Ukrainie źnik bieź viestak jašče adzin biełarus, jaki pavajavaŭ na baku Rasii miesiac
«Ja vas, baranaŭ, rezaŭ i budu rezać». Dzieviać razoŭ sudzimy najmit viarnuŭsia z ukrainskaha pałonu i zabiŭ chłopca byłoj žonki
Rasija viarbuje na vajnu suprać Ukrainy jemienskich chusitaŭ
Ciapier čytajuć
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj5
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki1414
Kamientary