«Jak z płastylinu». Biełaruska paskardziłasia na śmiatanu ad «Savuškavaha»
U tyktoku zavirusiłasia videa sa skarhaj adnoj z karystalnic na śmiatanu «Brest-Litoŭsk» ad kampanii «Savuškaŭ pradukt». U siužecie rolika adna z pakupnic praviała «ekśpierymient», jaki, na jaje dumku, stavić pad sumnieŭ naturalnaść praduktu. Redakcyja vydańnia Telegraf.news źviazałasia z pradstaŭnikami kampanii dla vyśviatleńnia situacyi.
Niezadavalnieńnie pakupnicy vyklikała jakaść śmiatany «Brest-Litoŭsk» z tłustaściu 20 pracentaŭ. Žančyna apisała situacyju ź niezvyčajnymi, na jaje pohlad, pavodzinami praduktu paśla traplańnia na adzieńnie.
Pavodle jaje słoŭ, kali dzicia zapeckała futbołku śmiatanaj, jana nie ŭvabrałasia ŭ tkaninu, a zastałasia na pavierchni ŭ vyhladzie padobnych na tvaroh «katyškaŭ», a taksama nie pakinuła tłustych plam, jak heta zvyčajna byvaje ŭ vypadku z «viaskovaj śmiatanaj».
Karystalnica vyrašyła pravieści «ekśpierymient» i prademanstravać padpisčykam dziŭnyja, na jaje pohlad, pavodziny praduktu, vykłaŭšy niekalki łyžak śmiatany na tkaninu i pakinuŭšy ŭ takim vyhladzie na paŭhadziny. Paśla hetaha jana viarnułasia i pravieryła, što tam robicca.
Vykładzienaja łyžkami śmiatana nie ŭsmaktałasia ŭ tkaninu i zachavała svaju formu, staŭšy tolki trochi huściejšaj.
«Nu, z narmalnaj śmiatanaj tak ža nie pavinna być. Ja sama ź vioski, i ŭ nas była karova, svajo małako, śmiatana, masła. Byvaje, ablapaješsia śmiatanaj, i ŭsio tłustaje, a tut takoje pačućcio, što parašok niejki dadajuć i raźmiešvajuć. A my heta kuplajem i jamo», — vykazałasia aŭtarka videarolika.
Paśla praviedzienaha «ekśpierymientu» žančyna zajaviła, što bolš nie budzie kuplać takuju śmiatanu, bo sumniavajecca ŭ jaje jakaści.
Videarolik z ekśpierymientam sabraŭ bolš za 600 tysiač prahladaŭ i spravakavaŭ burnyja dyskusii adnosna pradukcyi «Savuškavaha» ŭ kamientarach.
Adna častka ludziej, jakija vykazalisia pad videa, nie padzialaje sumnievaŭ aŭtara.
«Dyk usio pravilna! Tak i pavinna być! Syrovatka vyciekła, zastałasia hušča — białok i tłušč. Što nie tak?! Pavyšajcie adukacyjny ŭzrovień! Vaš vopyt paćviardžaje najaŭnaść białku ŭ śmiatanie!» — napisała adna ź biełarusak u kamientarach pad rolikam.
«Ludzi, syrovatka vyjšła, tvaroh zastaŭsia. Heta ŭsie viedajuć, u vioskach tak robiać chatni syr. Ja ź Biełarusi, heta vielmi dobraja śmiatana. Vam, napeŭna, zapłacili za krytyku. Ci vy ŭ jakaści ničoha nie razumiejecie», — nie pahadziłasia z aŭtarkaj jašče adna biełaruska.
Inšyja ž kamientatary padtrymali žančynu i taksama vykazali svaje sumnievy adnosna jakaści pradukcyi.
«Dyk ja vam adkryju tajamnicu: jaje narmalnaj niama naohuł. Adno suchoje małako razbadziažanaje. Pa fakcie — vada i suchoje małako», — napisaŭ adzin kamientatar.
«Bolš hetaj śmiatany nie vaźmu, a brała zaŭsiody. Mianiaju kirunak», — vykazałasia inšaja kamientatarka.
Niekatoryja karystalniki zasumniavalisia ŭ čyścini ekśpierymientu, paśla čaho aŭtarka videarolika źniała jašče adno videa, u jakim znoŭ praviała raniej prademanstravanyja dziejańni i paraŭnała «Brest-Litoŭskuju» śmiatanu sa śmiatanaj inšaha vytvorcy. U chodzie ekśpierymientu vyśvietliłasia, što abodva pradukty pavodziać siabie prykładna adnolkava.
«Možna lapić cacki jak z płastylinu», — vykazałasia biełaruska i prademanstravała płastyčnaść praduktu.
«Značyć, takoj śmiatana i pavinna być. Voś što my jamo», — reziumavała aŭtarka ŭ svaim videa.
«U jaje składzie tolki naturalnyja inhredyjenty»
Redakcyja Telegraf.news źviarnułasia na pradpryjemstva, kab daviedacca, z čaho robiać śmiatanu «Brest-Litoŭsk», čym tłumačacca pavodziny praduktu, prademanstravanyja ŭ videa, i ci možna pratestavać śmiatanu na jakaść u chatnich umovach.
Havoračy pra syravinu, jakaja vykarystoŭvajecca dla vytvorčaści śmiatany, pradstaŭniki kampanii «Savuškaŭ» padkreślili, što pradpryjemstva nie vyrablaje pradukcyi z suchoha małaka i ŭžo bolš za 48 hadoŭ pracuje vyklučna na śviežym naturalnym karovinym małace.
«Śmiatana «Brest-Litoŭsk», jak i ŭsie inšyja pradukty kampanii, vyrablajecca ŭ adpaviednaści z patrabavańniami zakanadaŭčych i techničnych narmatyŭnych aktaŭ JEAES. U jaje składzie tolki naturalnyja inhredyjenty: narmalizavanyja pasteryzavanyja viarški i zakvaska, jakaja składajecca z małočnakisłych mikraarhanizmaŭ. Padrabiazny skład praduktu paznačany na kožnaj upakoŭcy», — raskazali ŭ adkazie na aficyjny zapyt Telegraf.news.
Taksama ŭ «Savuškavym» padzialilisia infarmacyjaj pra technałohii vyrabu śmiatany, jakaja dazvalaje skvašanym śliŭkam zastavacca adnastajnym pa źmieście tłušču praduktam. Dla hetaha na sučasnych małočnych vytvorčaściach vykarystoŭvajecca technałahičny praces hamahienizacyi.
«Pry zachoŭvańni śmiatany pramysłovaj vytvorčaści va ŭmovach pakajovaj tempieratury adbyvajecca pastupovaje vydzialeńnie małočnaj syrovatki, jakaja praktyčna nie ŭtrymlivaje tłušču ŭ svaim składzie (i tamu amal nie pakidaje tłustych plam). A zhustak, jaki zastaŭsia na hihraskapičnaj tkaninie, trochi ćviardzieje i nabyvaje bolš hustuju i aformlenuju kansistencyju. Technična vydaleńnie častki syrovatki pieratvaraje jaho ŭ niejkaje padabienstva chatniaha tvarožnaha syru», — patłumačyli śpiecyfiku pavodzin śmiatany ŭ kampanii.
Na pradpryjemstvie padkreślili, što vytvorca harantuje jakaść i biaśpieku vypuskanaj pradukcyi pry vykanańni ŭmoŭ zachoŭvańnia na praciahu terminu prydatnaści, paznačanych na ŭpakoŭcy. Taksama ŭ kampanii adznačyli, što pravieści abjektyŭnuju acenku jakaści praduktu ŭ chatnich umovach niemahčyma.
«Dla hetaha nieabchodna vykarystoŭvać mietady łabaratornych vyprabavańniaŭ na śpiecyjalnym pravieranym abstalavańni — tolki tak možna harantavać dakładnaść atrymanych vynikaŭ», — padkreślili na pradpryjemstvie.
Z palic kramaŭ źnik papularny tvaroh ad «Savuškavaha»
«Kolki palitviaźniaŭ vyzvaliŭ Mašenski?!» Piatruchin biŭsia suprać usioj Kaardynacyjnaj rady, ale pieramohu tak i nie zdabyŭ
Chalezin: Mašenski — talenavity biznesmien, za košt hetaha žyvie ceły rehijon
«Savuškaŭ pradukt» abjaviŭ pra rebrendynh
Uładalnik «Savuškavaha pradukta» i «Santa-Bremara» try hady žyvie ŭ Varšavie
Ciapier čytajuć
Łukašenka znoŭ apraŭdvaŭsia za hieorhijeŭskija stužki: hetym razam pierad rasijskim pasłom18
Kamientary
Teos Naturalnyj 2% ich žie johurt łožkovyj pośle iźmienienija v koncie prošłoho hoda dizajna upakovki i dobavlenija v nazvanije i na upakovku słova «Naturalnyj» očień silno uchudšiłsia... Jeśli banočku v tiečienije nieskolkich dniej dieržať otkrytoj (pod kryšiečkoj) v chołodilnikie, to za eto vriemia iz niejo pridiotsia vyliť połovinu banočki syvorotki, otdielivšiejsia za eto vriemia, no sam johurt ot etoho nie staniet huŝie. Chotia rańšie był očień hustym. Za čto jeho i cienili. I najti jeho rańšie była problema, raźmietali, a tiepieŕ viezdie ležit...