Hienieralny prakuror Litvy Nida Hrunskienie daručyła palicyi acanić skandalnyja vykazvańni byłoha kandydata ŭ prezidenta krainy, palityka Eduardasa Vajtkusa padčas jaho niadaŭniaha vizitu ŭ Minsk.
Jak paviedamili ŭ litoŭskaj Hienprakuratury, kiraŭnictvu Departamienta palicyi daručana «inicyjavać vyśviatleńnie faktyčnych abstavin i pryniać adpaviednaje pracesualnaje rašeńnie ŭ paradku, ustanoŭlenym Kryminalna-pracesualnym kodeksam».
Eduardas Vajtkus pryjazdžaŭ u Minsk na zaprašeńnie praŭładnaj partyi «Biełaja Ruś». Jon daŭ u stalicy Biełarusi pres-kanfierencyju i vystupiŭ na Biełaruskim telebačańni.
U Minsku Vajtkus zajaviŭ, što ŭ Litvie «niama lehitymnaha prezidenta». Dziejučy prezident krainy, Hitanas Naŭsieda, na dumku Vajtkusa, byŭ abrany nielehitymna.
Jon ličyć, što Litva idzie «šlacham źniščeńnia litoŭcaŭ i litoŭskaj dziaržaŭnaści», a taksama vykazaŭsia suprać padtrymki Litvoj biełaruskaha demakratyčnaha ruchu.
Edurdas Vajtkus udzielničaŭ i ŭ parłamienckich, i ŭ prezidenckich vybarach 2024 hoda ŭ Litvie. Jon uznačaliŭ śpis Litoŭskaj narodnaj partyi na parłamienckich vybarach, ale partyja nie pieraadoleła vybarčaha barjera.
Kandydatam u prezidenty Litvy palityk atrymaŭ značnuju padtrymku ŭ takich rehijonach Litvy, jak Salečniki i Visahinas, dzie jaho pieradvybarčyja materyjały raspaŭsiudžvalisia na ruskaj movie. Jaho ahulny vynik — 7,31%.
Ciapier Vajtkus praciahvaje svaju palityčnuju dziejnaść, sprabujučy stvaryć partyju «Novaja palityčnaja siła».
Kamientary