Vy — pracaholik i časta pierapracoŭvajecie? Navukoŭcy vyśvietlili, jak heta źmianiaje mozh
Praca zvyš 52 hadzin na tydzień moža vyklikać nie tolki stomlenaść i razdražnionaść — jana, pavodle mierkavańnia paŭdniovakarejskich navukoŭcaŭ, zdolnaja pryvodzić da fizičnych źmienaŭ u mozhu.
Daśledavańnie, praviedzienaje vučonymi z Paŭdniovaj Karei pakazała, što pastajanny stres ad pierapracovak moža parušać pracu tych učastkaŭ mozhu, što adkazvajuć za emocyi i myśleńnie. Pra heta piša The Times.
Navukoŭcy praanalizavali stan mozhu 110 miedycynskich rabotnikaŭ. Ź ich 32 čałavieki pracavali bolš za 52 hadziny na tydzień, astatnija — mienš. Daśledavańnie vyjaviła istotnyja adroźnieńni ŭ struktury mozhu pamiž hetymi dźviuma hrupami.
U ludziej, schilnych da pierapracovak, nazirałasia pavieličeńnie abjomu asobnych učastkaŭ mozhu — pieradusim tych, što źviazanyja z vykanaŭčymi funkcyjami i rehulacyjaj emocyj.
Pavodle aŭtaraŭ, pavieličeńnie abjomu mozhu samo pa sabie nie abaviazkova źjaŭlajecca niehatyŭnym — takija źmieny mohuć naziracca, naprykład, padčas navučańnia abo aktyŭnaha avałodvańnia novymi navykami. Heta moža śviedčyć pra rost aktyŭnaści niejronaŭ abo palapšeńnie kahnityŭnych zdolnaściaŭ.
Adnak u hetym vypadku rost abjomu adbyvaŭsia ŭ tych učastkach mozhu, što asabliva adčuvalnyja da chraničnaha stresu. Navukoŭcy ličać, što havorka idzie nie pra raźvićcio mozhu, a pra jaho sprobu prystasavacca da pastajannaj pierahruzki. Takaja adaptacyja moža časova pavyšać uvažlivaść i efiektyŭnaść, ale pry adsutnaści naležnaha adnaŭleńnia pryvodzić da stomlenaści, emacyjnaj niestabilnaści i paharšeńnia kahnityŭnych funkcyj.
Raniej było ŭstanoŭlena, što praca zvyš 55 hadzin na tydzień pavyšaje ryzyku insultu na 33 % i išemičnaj chvaroby serca na 13 %. Novaje daśledavańnie dapaŭniaje hetuju tryvožnuju statystyku źviestkami pra mahčymyja strukturnyja źmieny ŭ mozhu.
Aŭtary padkreślivajuć, što pakul vysnovy papiarednija: udzielniki hrupy ź pierapracoŭkami byli maładziejšyja i mieli vyšejšy ŭzrovień adukacyi, a značyć, mahli spačatku mieć lepš raźvityja ŭčastki mozhu. Heta mahło paŭpłyvać na vybar prafiesii i schilnaść da praciahłaj pracy.
Ekśpierty adznačajuć, što praca «ŭnosić układ u narastajučaje razumieńnie taho, što pierapracoŭki surjozna ŭpłyvajuć na zdaroŭje» i padkreślivajuć nieabchodnaść dalejšych daśledavańniaŭ z udziełam ludziej roznych prafiesij.
Ź jakoha ŭzrostu pačynajucca pieršyja zboi ŭ pracy mozhu i jak ich zapavolić? Vučonyja dali adkaz
Čamu padletki-dziaŭčaty čaściej pakutujuć na depresiju: vučonyja znajšli mahčymaje tłumačeńnie ŭ mozhu
Što mienavita adbyvajecca ŭ mozhu mužčyny padčas seksu?
Niekatoryja ludzi pakidajuć u našym mozhu ŭnikalny chimičny śled — navukoŭcy. Voś što heta mianiaje
Kamientary
čto sohłasien byť priezidientom