U Tadžykistanie admieniena kryminalnaja adkaznaść za łajki i reposty
Prezident Tadžykistana Emamali Rachmon 14 maja padpisaŭ zakon, jaki vyklučaje z Kryminalnaha kodeksa krainy normy, što praduhledžvajuć pakarańnie za reakcyi — tak zvanyja łajki — i reposty ŭ sacyjalnych sietkach.
Takim čynam, kraina aficyjna admoviłasia ad praktyki, jakaja na praciahu niekalkich hadoŭ vyklikała krytyku jak unutry Tadžykistana, tak i z boku mižnarodnych pravaabaroncaŭ, adznačaje Radyjo Ozodi.
Papraŭki tyčacca artykułaŭ, jakija praduhledžvajuć pakarańnie za publičnyja zakliki da teraryzmu i apraŭdańnie teraryzmu ŭ internecie. Z 2018 hoda pad hetyja farmuloŭki padpadała navat minimalnaja aktyŭnaść — ad łajkaŭ da repostaŭ, za što možna było atrymać ad 10 da 15 hadoŭ pazbaŭleńnia voli.
Pavodle źviestak pieršaha namieśnika hienprakurora Umieda Karymzada, bolš za 1500 čałaviek u Tadžykistanie ciapier adbyvajuć pakarańnie za kamientary i reakcyi ŭ sacsietkach.
Rašeńnie admianić kryminalnuju adkaznaść stała praciaham inicyjatyvy samoha Rachmona. Viasnoj 2024 hoda jon raskrytykavaŭ pravaachoŭnyja orhany za praźmierna šyrokaje prymianieńnie hetych normaŭ, padkreśliŭšy, što «nielha karać ludziej tolki za aktyŭnaść u internecie». U krasaviku nižniaja pałata parłamienta adnahałosna prahałasavała za vyklučeńnie sprečnych pałažeńniaŭ.
Na sajcie prezidenta paviedamlajecca, što zakon «admianiaje kryminalnuju adkaznaść za raźmiaščeńnie łajka abo inšaha znaka ŭ sacyjalnych sietkach». Paśla podpisu prezidenta źmieny ŭstupili ŭ siłu.
U Biełarusi za łajki i reposty karystalnikaŭ pryciahvajuć jak da administracyjnaj, tak i da kryminalnaj adkaznaści pa šerahu artykułaŭ, u tym liku za raspalvańnie varožaści abo prapahandu ekstremizmu. Havorka pra sotni asudžanych pa hetych artykułaŭ.
Kamientary
[Zredahavana]