«Viartajciesia, kali daraściacie». Adzin z samych darahich restaranaŭ Minska šakuje svajoj kamunikacyjaj
«Kali ŭ 20 hadoŭ čałaviek nie moža adroźnić restaran ad palikliniki, to nam niama što bolš dadać».
Restaran Amo źjaviŭsia ŭ Minsku ŭ minułym hodzie, tam padajuć stravy mižziemnamorskaj kuchni. Ustanova znachodzicca na vulicy Karła Marksa. Mienavita hetuju vulicu nazvała «minskimi Patrykami» błohierka, jakaja paskardziłasia, što jaje nie puścili ŭ Amo ź dziciom (toje videa nabrała 136 tysiač prahladaŭ u tyktoku).
Restaran, adzin z samych darahich u horadzie (tam padajuć draniki ź ikroj za 160 rubloŭ), staŭ modnym miescam siarod minčukoŭ. Chacia na anłajn-kartach chapaje admoŭnych vodhukaŭ. Samaje cikavaje tut — toje, jak na ich adkazvajuć supracoŭniki ŭstanovy.
Pačniem z karty Google (tut siaredni bał restarana pa vodhukach — 3,6). Karystalnica Alena adznačaje, što jaje rasčaravała adsutnaść u restaranie marskich vožykaŭ i vustryc — maŭlaŭ, jana pryjšła jakraz dziela ich, i kali heta siezonnyja stravy, to čamu jany jość u asnoŭnym mieniu. Voś što adkazvaje restaran:
«Mahčyma, vaš vizit byŭ vielmi karotki i ŭ vas nie było mahčymaści daviedacca, što ŭ nas niama dostupu da mora ci akijana, tamu štodzionnych pastavak vustryc i marskich vožykaŭ u nas taksama niama […] I vustrycy, i vožyki paznačanyja ŭ mieniu jak pradukt, pra najaŭnaść jakoha treba ŭdakładniać».
Inšy karystalnik napisaŭ u vodhuku, što jamu prynieśli tort z malinaj, dzie była dziŭnaja čornaja jahada — ci to brudnaja, ci to hniłaja. U restaranie znoŭ nie pahadzilisia:
«Na ščaście, nad vašym stolikam znachodziłasia videakamiera, i nam było nieskładana vyśvietlić situacyju. Mabyć, śniadanak vam usio-tki spadabaŭsia, bo vašy talerki byli absalutna pustyja […] Kali vy pakidajecie takija vodhuki, vy zajmajeciesia spažyvieckim teraryzmam».
Adkazy na karcie «Jandeksa» (siaredni bał restarana tut 4,4) jašče cikaviejšyja. Naprykład, karystalnica napisała admoŭny vodhuk i adznačyła, što jana pakinuła krytyku i ŭ instahramie Amo, ale tam joj «hruba adkazali i dadali ŭ čorny śpis». Adna z pretenzij — toje, što ŭ elitarnym restaranie, jakim siabie pazicyjanuje Amo, nie spytalisia pra alerhiju.
U hety raz taksama nie parazumielisia:
«Na žal, u nas niama mahčymaści zabłakavać vas i na hetaj płatformie. Kali ŭ 20 hadoŭ čałaviek nie moža adroźnić restaran ad palikliniki, to nam niama što bolš dadać. Restaran nie pavinien pytacca pra vaša zdaroŭje. Kali vy majecie charčovyja abmiežavańni, vy pavinny sami paviedamić pra heta vašamu aficyjantu zahadzia […]
Akramia vady, chleba i masła, čym jašče vas pavinny pačastavać biaspłatna? Stejk rybaj padydzie?»
Inšaja karystalnica adznačyła ŭ vodhuku — maŭlaŭ, «jość kudy raści». Supracoŭniki restarana znoŭ nie zmaŭčali:
«My abmierkavali vaš vypadak z chłopcami i całkam zhodnyja z vami. Jość kudy raści. Viartajciesia, kali daraściacie!»
Sprečnyja adkazy Amo dniami abmiarkoŭvali ŭ sacsietcy Threads. Niekatoryja karystalniki salidaryzavalisia z supracoŭnikami restarana:
«Narešcie niejkaja z ustanovaŭ adkazvaje tak, jak dumajuć usie rabotniki restarannaha biznesu, kali sutykajucca z padobnymi vodhukami».
«Naša Niva» — bastyjon biełaruščyny
PADTRYMAĆCiapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary