Ajcišnica, jakaja viarnułasia z emihracyi, pachvaliłasia, što idzie vystupić na ANT — u kamientarach adkryŭsia partał u piekła

Dziaŭčyna, pa jaje słovach, trapić na zdymki «na nastupnym tydni». Nie vyklučaje jana (ci to žartam, ci to ŭsurjoz) i prychod u efir da prapahandysta Ryhora Azaronka.

Pavialičyć

Supracoŭnikaŭ ANT pryciahnuŭ kamientar Alesi na temu emihracyi, jaki jana publikavała ŭ Threads. Ajcišnica paśpieła pažyć u Jehipcie i Polščy i, pa jaje słovach, ciapier lepš asensavała, što ŭ Biełarusi lepš.

Adzin ź minusaŭ, jaki jana akreślivaje ŭ dačynieńni da Polščy, naprykład, zabarona na aborty. «Maja siabroŭka ledź nie zahinuła praz heta, naprykład», — nie ŭdakładniaje abstaviny Alesia, padkreślivajučy, što ŭ jaje pry hetym nie było prablem ź lehalizacyjaj. «U mianie jość stały pobyt pa karcie palaka — składanaściaŭ u mianie tam nie było. Pytańnie majho pierajezdu — u kamforcie dla mianie».

U kamientarach ludzi zadajucca pytańniem, navošta pa svajoj voli «iści peckacca» na prapahandysckaje telebačańnie.

«Zdymacca ŭ prapahandysckich rolikach — vialikaja hańba. Čornaja paznaka dla šmat jakich biełaruskich kampanij na ŭsio žyćcio», — adznačaje adzin z kaleh Alesi pa IT-śfiery.

Niekatoryja nie chavajuć emocyj abureńnia, adznačajučy, što pišuć na adras aŭtarki dopisu pieršy niehatyŭny kamientar u žyćci:

«Biełarusy pakutujuć u turmach, biehli ad represij, a vy takaja: «U Jeŭropie drenna, u Biełarusi — vydatna!» Toje, što ŭ vas nie atrymałasia — nie značyć, što ŭ Jeŭropie drenna. Prosta vy nie paciahnuli. ANT — pamyjnica i prapahanda dyktatarskaha režymu. Kali vy za Łukašenku i jaho palityku, represii, supracu z Rasijaj, to tady tam vam i miesca ŭ Biełarusi».

Pavialičyć

U adkaz Alesia Łobač dastała kozyry: «Ja z tych, chto bačyć i razumieje zahadzia, jakija nastupstvy buduć u peŭnych dziejańniaŭ. Ci ja prymušała biełarusaŭ rabić toje, za što ich pasadzili? Ja razumieła, što mnie jość što hublać. Chto nie asensoŭvaŭ da kanca — mnie škada, što tak vyjšła».

Na jaje pohlad, sapraŭdnyja patryjoty, jakija zmahajucca za Biełaruś, nie źjazdžali b z krainy.

«Sapraŭdnyja patryjoty zastajucca i zmahajucca, jak usim viadomaja Maryja K., naprykład (aŭtarka, vierahodna maje na ŭvazie Maryju Kaleśnikavu, ale nie rašajecca pisać jaje proźvišča całkam — NN). A nie siadziać u ciaple i ŭ inšaj krainie i raskazvajuć inšym, jak žyć.

Pa słovach Łobač, jaje pracadaŭca iTechArt Group nie maje ničoha suprać zdymkaŭ supracoŭnikaŭ na prapahandysckim telebačańni. «Tamu što dumaje šyrej ci pad inšym rakursam».

Kampanija iTechArt Group zajmajecca raspracoŭkaj prahramnaha zabieśpiačeńnia i kansałtynham, śpiecyjalizujecca na veb– i mabilnym prahramavańni.

• 6
• 4
• 6
• 75
• 0
• 1
• 15
• 0