Piatruchinu zabaraniali vieści strym z kanferencyi ŭ Varšavie. Jon supraciŭlaŭsia, a paśla staŭ tajemna zapisvać aŭdyja
Padčas biełaruskaj kanfierencyi ŭ Varšavie adzin z udzielnikaŭ sprabavaŭ vieści zapis abmierkavańnia ŭ małoj hrupie, choć inšyja byli suprać. «Radyjo Svaboda» pahavaryła z udzielnikami historyi.
Što adbyłosia
Z 23 pa 25 traŭnia ŭ Varšavie prachodziła IV Kanfierencyja biełarusaŭ i biełarusak śvietu — placoŭka, jakaja źbiraje dyjasparu, inicyjatyvy i arhanizacyi dla sumiesnaj pracy, netvorkinhu i abmienu dośviedam.
Incydent adbyŭsia 24 traŭnia padčas pracy ŭ hrupach. Panel, dzie abmiarkoŭvali dapamohu palitviaźniam, represavanym, dobraachvotnikam va Ukrainie, maderavaŭ kiraŭnik fondu BySol Andrej Stryžak. U hrupie było kala 20 čałaviek, u tym liku byłyja palitviaźni. Siarod ich — błohier Siarhiej Piatruchin. Jon vioŭ z kanfierencyi videastrymy ŭ YouTube pa niekalki hadzin.
Jak bačna ŭ adnym z takich videa, pierad pačatkam abmierkavańnia temy paneli Stryžak prapanavaŭ niekalki pravił, naprykład, vykazvacca paśla padniataj ruki. Była taksama prapanova nie vieści strymy, zapisy, fota, videa abmierkavańnia, kab hrupa pracavała spakajniej i ŭpeŭniena z syrymi idejami. A ŭžo vyniki pracy ŭ kole jon prapanoŭvaŭ pradstavić na forumie.
U hety čas Piatruchin vioŭ žyvy efir z paneli ŭ YouTube. Na jahonym videa nie bačna, kab prysutnyja vystupali suprać prapanoŭ Stryžaka, ale niekatoryja paćvierdzili, što jany suprać zapisaŭ. Na zaŭvahu z hrupy, što Piatruchin praciahvaje vieści zapis, jon adkazaŭ, što jamu «ŭsio roŭna» (zdymać ci nie zdymać), i praciahnuŭ strym. Jon taksama zapeŭniŭ, što moža nie zdymać udzielnikaŭ paneli, ale pravioŭ kamieraj pa kole, pakazaŭšy, chto sabraŭsia, i tolki paśla pieraklučyŭ videa na siabie.
«Ja prapanuju vieści strym, bo nas hladziać ludzi, sorak čałaviek. Im heta cikava, i treba pavažać. My adkrytaje hramadstva budujem, i pavinna być usio prazrysta», — zajaviŭ Siarhiej Piatruchin.
Za try dni hety strym pahladzieli 2,7 tysiačy čałaviek. Na zaŭvahu Piatruchina «My pracujem dla ludziej» adna z udzielnic hrupy adkazała: «My taksama ludzi».
U vyniku Stryžak jak maderatar paprasiŭ Piatruchina pakinuć hrupu, matyvujučy heta tym, što inšym udzielnikam «niajomka pracavać». Błohier aburyŭsia. U hrupie hučali jak hałasy «suprać zdymki», tak i «ŭsio roŭna». Błohier prapanavaŭ, kab ludzi vykazalisia, kali jany suprać, choć jany ŭžo heta zrabili.
Piatruchin paŭtaraŭ: «Vy nie hrupa», prapanoŭvaŭ prahałasavać. Jamu adkazvali, što kali chacia b adzin čałaviek suprać, to varta spynić zdymku. Jon ža pytaŭsia, chto ŭvioŭ takija praviły i dzie jany zapisanyja. Stryžak adkazaŭ, što praviły prapanavaŭ jon jak maderatar.
Piatruchin skardziŭsia niekamu, što Stryžak nibyta vyklikaje na jaho achovu. Ludzi šmat razoŭ prasili jaho spynić strym abo pajści z hrupy. Pieramovy doŭžylisia kala piaci chvilin. U vyniku błohier vyklučyŭ žyvy efir.
Patajemny aŭdyjozapis
Andrej Stryžak u kamientary dla «Svabody» patłumačyŭ, što nazyvaje heta nie kanfliktam, a incydentam z metaj zabieśpiačeńnia biaśpieki. Jon nahadaŭ, što było niekalki pracoŭnych hrupaŭ, i kožny moh vybrać svaju. Stryžaku zahadzia prapanavali maderavać adnu ź ich.
«Da hetaj hrupy dałučyŭsia Siarhiej Piatruchin, jaki pryjšoŭ sa svaim strymam. Častka ŭdzielnikaŭ adrazu zajaviła, što jany nie hatovyja pracavać pry zapisie i tranślacyi na ŭvieś śviet. Z uvahi na toje, što hrupa prymaje praviły svajoj pracy adnahałosna, ja musiŭ pravieści hetaje rašeńnie. Hrupa vyrašyła takim čynam, i my jaho pryniali, na što Siarhiej hučna aburaŭsia», — uzhadaŭ Stryžak.
Jon adznačyŭ, što Piatruchin u vyniku vyklučyŭ strym i schavaŭ telefon. Ale praź niekatory čas adna z udzielnic zaŭvažyła, što jon patajemna viadzie aŭdyjozapis.
«Heta nie moža być abhruntavana prazrystaściu abo adkrytaściu pracesu. Kali ty ŭdzielničaješ u pracy hrupy, ty abo padparadkoŭvaješsia praviłam, abo nie ŭdzielničaješ. Jon moh pajści ŭ inšuju hrupu abo stajać zboku z kamieraj», — kamientuje Stryžak.
Jon dadaŭ, što musiŭ spynić pracu hrupy da vyrašeńnia incydentu. Prysutničaŭ pradstaŭnik arhanizataraŭ, jaki nastojliva prasiŭ adklučyć i vydalić zapis. Ci byŭ vydaleny aŭdyjozapis — nieviadoma.
«Ja jak maderatar musiŭ paviedamić pra heta, kab usie, chto budzie mieć spravu z hetym čałaviekam, viedali pra jaho asablivaści», — kaža Stryžak.
Pavodle jaho, vyniki pracy byli ahučanyja, u tym liku ŭ strymie Piatruchina.
«Pytańnie tolki ŭ tym, što čałaviek śviadoma parušyŭ damoŭlenaści hrupy i heta nie stała pieraškodaj dla patajemnaha, niesankcyjanavanaha zapisu», — adznačyŭ jon.
«Heta śviedčyć, što čałaviek hrebuje damoŭlenaściami i imkniecca dasiahnuć svajoj mety. Dla mianie heta niezrazumieła», — dadaŭ jon.
Niedapuščalnyja praktyki
Na dumku Andreja Stryžaka, u budučyni varta ŭvodzić ahulny rehłamient pavodzin žurnalistaŭ i błohieraŭ. Naprykład, vykarystoŭvać kalarovyja znaki dla tych, kaho nielha zdymać. Jon adznačaje, što jak maderatar nie mieŭ paŭnamoctvaŭ vydalić Piatruchina.
«Kali b heta była maja padzieja, byli b dakładnyja praviły. Pry ich parušeńni ŭdzieł byŭ by niemahčymy», — kaža jon.
«My pracujem u taksičnym asiarodździ. Luby moža vieści patajemny zapis. Ale kali łovim — treba ahučvać i padkreślivać, što heta niedapuščalna», — reziumuje Stryžak.
Bolš strohija miery kanfidencyjnaści
Psichołah Natalla Skibskaja, udzielnica paneli, adznačyła, što Stryžak dobra maderavaŭ hrupu i pravilna vyznačyŭ miežy. Pavodle jaje, hrupa vystupiła suprać zdymki, a nie asabista maderatar.
Abmiarkoŭvalisia stanoŭčyja prykłady dapamohi palitviaźniam, i ich razhałošvańnie mahło nanieści škodu. Na dumku Skibskaj, Piatruchin pravakavaŭ.
Pavodle jaje, adna z udzielnic zaŭvažyła, što Piatruchin praciahvaŭ zapis na dyktafon, navat paśla vyklučeńnia strymu. Arhanizatar prasiŭ pakazać telefon.
«Andrej adstojvaŭ intaresy inšych. Adna dziaŭčyna była vielmi aburanaja. Heta było niepryhoža», — kaža Skibskaja.
U kancy Piatruchin jašče chacieŭ zrabić hrupavoje fota.
«Fakt udziełu ŭ takoj kanfierencyi ŭžo moža być niebiaśpiečnym. Publičnaść u taki momant niedapuščalnaja», — adznačaje jana.
Skibskaja padkreśliła, što hrupa straciła čas praź incydent, i heta była niepavaha da inšych.
«Kali jość ryzyka pravakacyj, treba zastavacca bolš zakrytymi i trymać miežy. Ja b uvodziła bolš žorstkija miery kanfidencyjnaści», — zaklučaje jana.
«Svaboda» taksama źviarnułasia pa kamientar da Siarhieja Piatruchina, ale adkazu nie atrymała.
Kabanaŭ — Piatruchinu: Kolki hrošaj ty atrymaŭ z fondaŭ na novy ajfon, noŭtbuk, kvateru na hod i viełasipied?
Łatuška admoviŭsia iści ŭ adstaŭku z-za źniknieńnia Mielnikavaj. Hetaha zapatrabavaŭ Piatruchin
Piatruchin nie zdajecca: choča, kab KR zasłuchała 17-hadovaha «startapiera». Ale bieź jaho baćkoŭ hetaha rabić nielha
«Piatruchin, prośba nie zajmacca łuchtoj». Kabanaŭ pasvaryŭsia z byłym siabram padčas debataŭ u KR
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary