U Maskvie znajšli 69-hadovaha biełarusa, jaki byŭ u rabstvie ŭ «pracoŭnym domie»
Pažyły hamialčuk staŭ biazdomnym u Maskvie paśla taho, jak u jaho zdaryŭsia insult.
Vałancior rasijskaha dabračynnaha fondu «Mamy śvietu» (hety fond isnuje z 2016 hoda, pieršapačatkova dapamahaŭ biazdomnym, ale paśla pačatku vajny dapamahaje i rasijskim sałdatam) raskazaŭ u tyktoku pra biazdomnaha hamielčuka Alaksandra, jaki źviarnuŭsia pa dapamohu.
Mužčyna stałaha ŭzrostu na videa vielmi drenna razmaŭlaje — kožnaje słova dajecca jamu ciažka.
Zavuć biełarusa Alaksandr Katlaroŭ, jamu 69 hadoŭ. U Rasiju jon pryjechaŭ pracavać, ale trapiŭ u rabstva. Jon pramaŭlaje: «pracoŭny dom».
«Pracoŭnymi damami» ŭ Rasii pravaabaroncy nazyvajuć nielehalnyja ŭstanovy ci damy, u jakich ludziej utrymlivajuć i prymušajuć pracavać biaspłatna ci za ježu, pad pahrozaj hvałtu, izalacyi i daŭhoŭ.
Ludziej tudy zavablivajuć frazami: «dapamožam z pracaj», «prytulim», «damo dach i ježu». U ich zabirajuć dakumienty, telefony, abmiažoŭvajuć svabodu. Prymušajuć pracavać na budoŭli, u sielskaj haspadarcy, źbirać mietałałom, žabravać, prybirać i rabić šmat čaho inšaha.
Alaksandru płacili ŭsiaho pa 50 rasijskich rubloŭ za dzień pracy (heta mienš za dva biełaruskija rubli). Jamu pašancavała — bo na rukach zastaŭsia chacia b pašpart.
Mužčyna śćviardžaje, što ŭ Homieli ŭ jaho jość svajaki. U vyniku rasijskija vałanciory nabyli Alaksandru novaje adzieńnie i ježu ŭ darohu, pasadzili na ciahnik u Biełaruś.
Videa za dzień nabrała ŭ tyktoku 1,4 miljona prahladaŭ, a taksama kala 44 tysiač łajkaŭ. Biełarusy ŭ kamientarach pytali, čym možna dapamahčy Alaksandru.
A niechta dzialiŭsia padobnaha dramatyčnymi historyjami.
«Ja rodam z Mahiloŭskaj vobłaści. U mianie baćka źnik bieź viestak, kali źjechaŭ na zarobki ŭ Maskvu. Jaho taksama Saša kličuć. Minuła ŭžo 16 hadoŭ. My ničoha nie viedajem ab jaho losie».
«Byłoha muža romy źvieźli z Homielskaj vobłaści ŭ Maskvu, ličyŭsia bieź viestak źnikłym. Dačka znajšła praz try miesiacy ŭ Birulovie, śmiećcie pierabiraŭ. Vyciahnuła baćku i jašče troch biełarusaŭ dapamahła milicyi znajści».
«U mianie stryječny brat ź Biełarusi byŭ taksama ŭ rabstvie ŭ Maskvie, uciok, išoŭ pieššu, potym ludzi dapamahli dabracca. Ale, na žal, praź miesiac paśla hetaha pamior, jamu było 35 hadoŭ…»
Biełarus trapiŭ u rabstva ŭ Dahiestanie. Kali ŭciok, trapiŭ na vajnu — a ciapier va ŭkrainski pałon
«Mianie kupili za $680». Biełarusy raskazali, jak trapili ŭ rabstva ŭ Rasii
U Padmaskoŭi žančyna trymała ŭ rabstvie šaściarych biełarusaŭ
Vyzvalenaja biełaruska raskazała, jak apynułasia ŭ pracoŭnym rabstvie ŭ Mjanmie i što tam rabiła
Kamientary