«Łukašenka nikoli ničoha nie baicca». Chrenin zajaviŭ, što vučeńni «Zachad-2025» i nie źbiralisia pravodzić na miažy z NATA

Ministr abarony Biełarusi Viktar Chrenin zajaviŭ, što vučeńni «Zachad-2025» z samaha pačatku źbiralisia pravodzić nie na zachodnich miežach, a ŭ hłybini terytoryi Biełarusi.

Tak Chrenin adreahavaŭ na słovy prezidenta Ukrainy Uładzimira Zialenskaha pra toje, što Alaksandr Łukašenka baicca rasijskich pravakacyj, a tamu vyrašyŭ pieranieści vučeńni dalej ad miežaŭ.

«Jany chaj jak zaŭhodna vykazvajucca. My ŭsio cudoŭna razumiejem, u nas rašeńni prezident nikoli pad nijakim ciskam nie prymaje. Nikoli ničoha nie baicca. 

Rašeńnie pryniata navat nie ŭ hetym hodzie. Kancepcyja była prezidentu dakładzienaja ŭ minułym hodzie. Pastupova, padaŭšy hetuju infarmacyju, danieśli, jakim čynam buduć prachodzić vučeńni. Toje rašeńnie, jakoje pryniata, jano pryniata daŭno», — skazaŭ Chrenin u efiry «Pieršaha infarmacyjnaha». 

Ministr śćviardžaje, što vučeńni ŭ krainach NATA značna maštabniejšyja za biełaruskija i rasijskija.

«Vučeńni «Abaronca Jeŭropy» prosta majuć hrandyjozny charaktar pa kolkaści pryciahvajemych vojskaŭ. 95 tysiač — heta surjoznaja hrupoŭka», — ličyć Chrenin.

Jon pryznaŭ, što va Ukrainie i Polščy mohuć pieražyvać z-za vučeńniaŭ «Zachad-2025».

«Moža, jany i mohuć pieražyvać. Ale heta ich asabistaja sprava. Nu i susiedniaja Polšča čamuści raśpieražyvałasia, što my tut pahroza. Sabralisia ŭ adkaz niejkija vučeńni pravodzić. Heta ich taksama prava. Chaj pravodziać», — dazvoliŭ Chrenin.

Biełaruska-rasijskija vučeńni «Zachad-2025» pavinny prajści ŭ vieraśni na palihonach dźviuch krain. U kancy maja Chrenin abviaściŭ, što vučeńni buduć pieraniesienyja z zachodniaj miažy ŭhłyb Biełarusi.

«Niahledziačy na toje, što nijakija kroki pa viartańni da vykanańnia šerahu klučavych damoŭlenaściaŭ u śfiery kantrolu za ŭzbrajeńniami ŭ adnosinach da Respubliki Biełaruś tak i nie byli zroblenyja, my pryniali rašeńnie ab źnižeńni paramietraŭ vučeńnia «Zachad-2025» i pieranosie jaho asnoŭnych manieŭraŭ uhłyb terytoryi Respubliki Biełaruś ad zachodnich miežaŭ», — zajaviŭ tady Chrenin. To-bok havorka išła mienavita pra pieranos vučeńniaŭ i źnižeńnie ich paramietraŭ, a nie pra pieršapačatkovuju kancepcyju. 

Adnačasova ŭ Minabarony zajavili, što kolkaść vajskoŭcaŭ, jakija buduć udzielničać u vučeńniach, budzie skaročanaja ŭdvaja. 

Paśla hetaha Uładzimir Zialenski zajaviŭ, što Łukašenka baicca rasijskich pravakacyj — mienavita tamu jon pieranios vučeńni dalej ad miežaŭ. U Minabarony, vidać, pakryŭdzilisia na słova «baicca» i prydumali novuju viersiju: maŭlaŭ, vučeńni źbiralisia pravodzić nie na miežach z samaha pačatku, jašče ŭ minułym hodzie, ale tady pra heta ničoha nie skazali. 

• 0
• 0
• 11
• 1
• 0
• 0
• 2
• 0