Navukoŭcy znajšli žudasnuju pryčynu, čamu ludzi ŭpieršyniu zaviali chatnich katoŭ

Doŭhi čas ličyłasia, što kot staŭ spadarožnikam čałavieka jašče ŭ niealicie. Kala 9000 hadoŭ tamu paŭnočnaafrykanskija dzikija katy (Felis lybica) pačali sialicca kala pieršych ziemlarobčych pasieliščaŭ. Zhodna z hetaj hipotezaj, składy zbožža pryciahvali hryzunoŭ, a tyja — katoŭ, što pryviało da pastupovaha ŭzajemavyhadnaha suisnavańnia i ŭrešcie da pryručeńnia.

Adnak, jak piša BBC Science Focus, novaje daśledavańnie pad kiraŭnictvam archieołaha doktara Šona Doerci z Eksieterskaha ŭniviersiteta stavić hetuju madel pad sumnieŭ.

Na padstavie analizu kostak, hienietyčnych danych i malunkaŭ katoŭ u staražytnym mastactvie navukoŭcy śćviardžajuć: sapraŭdnaje pryručeńnie hetych žyvioł pačałosia ŭ Staražytnym Jehipcie pryblizna ŭ druhim-pieršym tysiačahodździ da našaj ery.

Kamanda Doerci vykarystała zoaarchieałahičny, hienietyčny i radyjovuhlarodny analiz dla datavańnia pareštkaŭ katoŭ, znojdzienych na archieałahičnych pomnikach pa ŭsioj Jeŭropie i Paŭnočnaj Afrycy, jakija datujucca ad staražytnych časoŭ da sučasnaści.

Kości z 9500-hadovaj vioski ziemlarobaŭ na Kipry, jakaja kaliści ličyłasia adnym ź miescaŭ rańniaha pryručeńnia, akazalisia bolš padobnymi da dzikich katoŭ.

Pa słovach Doerci, niekatoryja pamyłki ŭ datavańni mahli być źviazanyja z tym, što kości katoŭ małyja i z časam mohuć pieramiaščacca pamiž płastami hleby. Tamu dla ŭdakładnieńnia ŭzrostu navukoŭcy źviarnulisia da radyjovuhlarodnaha analizu, jaki pakazaŭ: šerah astankaŭ nasamreč značna maładziejšyja, čym mierkavałasia.

Usio heta śviedčyć ab tym, što chranałohija pryručeńnia katoŭ nasamreč bolš poźniaja, čym ličyłasia.

Pavodle daśledčykaŭ, choć zmahańnie z hryzunami, biezumoŭna, adyhryvała peŭnuju rolu ŭ pryručeńni katoŭ, hałoŭnym faktaram mahła być relihija. U Jehipcie katy stali śviaščennymi žyviołami bahini Bast, i miljony hetych žyvioł vyroščvalisia śpiecyjalna dla achviaraprynašeńnia.

Pavialičyć

«Suviaź pamiž chatnimi katami i bahiniaj Bast dasiahnuła piku ŭ pieršym tysiačahodździ da našaj ery, — śćviardžaje Doerci. — U chramach, pryśviečanych joj, znachodziać miljony mumifikavanych katoŭ. Ich było tak šmat, što ŭ viktaryjanskuju epochu tony ich mumij pryvozili ŭ Brytaniju dla pieramołu i vykarystańnia ŭ jakaści ŭhnajeńnia».

U pracesie masavaha raźviadzieńnia katoŭ dla rytualnych achviaraprynašeńniaŭ pastupova adbiralisia tyja, chto byŭ bolš spakojny i prydatny da ŭtrymańnia. Tak, ź ciaham času, i źjaviŭsia chatni kot.

U druhim daśledavańni, saaŭtaram jakoha taksama źjaŭlajecca Šon Doerci, byŭ praviedzieny analiz 87 hienomaŭ katoŭ — staražytnych i sučasnych.

Navukoŭcy nie znajšli dokazaŭ taho, što chatnija katy trapili ŭ Jeŭropu razam ź niealityčnymi fiermierami. Zamiest hetaha vyśvietliłasia, što jany źjavilisia ŭ Jeŭropie tolki kala 2000 hadoŭ tamu — chutčej za ŭsio, z Paŭnočnaj Afryki.

«Vyniki śviedčać, što naša blizkaść z katami nie źviazanaja z praciahłaściu sumiesnaha žyćcia, jak heta było z sabakam», — padsumoŭvaje vučony.

• 9
• 0
• 2
• 8
• 9
• 6
• 0
• 0