Cichanoŭskaja: Trampu vielmi ciažka mieć spravu z Rasijaj, ale Biełaruś dla jaho — jak nizka visiačy frukt
Lidarka apazicyi Śviatłana Cichanoŭskaja spadziajecca na nacyjanalny dyjałoh i padtrymku Trampa ŭ hetym. Brytanskaje vydańnie The Sunday Times apublikavała vialiki artykuł z nahody vyzvaleńnia jaje muža Siarhieja Cichanoŭskaha.
Vyzvaleńnie źniavolenych było častkaj pahadnieńnia, zaklučanaha pry pasrednictvie ZŠA, zhodna ź jakim Alaksandr Łukašenka byŭ uznaharodžany sustrečaj u toj ža dzień sa śpiecpradstaŭnikom Donalda Trampa Kitam Kiełaham. Sustreču pakazali pa dziaržaŭnym telebačańni.
Ale i ciapier zastajecca niezrazumiełym, čamu Łukašenka vyrašyŭ vyzvalić čałavieka, jaki tak biaźlitasna krytykavaŭ jaho ŭ svaich videa. Siarod 14 vyzvalenych bolšaść mieli zamiežnyja pašparty, u turmach jašče pryblizna 1100 inšych palityčnych źniavolenych, siarod ich, jak miarkujecca, jość dva brytancy, imiony jakich nie byli apubličanyja.
Adna z teoryj zaklučajecca ŭ tym, što Łukašenka moh ličyć, što, vyzvaliŭšy Cichanoŭskaha — takuju značnuju fihuru — jon spravakuje roznahałośsi pamiž paraj i apazicyjaj.
Jašče adna ź viersij — što Łukašenka sprabuje pasiejać razład ułady ŭ samoj pary.
Cichanoŭskaja imkniecca dakazać, što ŭłady pamylajucca. Jaje muž, choć i «pryrodžany lidar», zojmie rolu «pieršaha džentlmiena», ličyć jana:
«Jon całkam pavažaje, razumieje i prymaje toje, što ja abrany prezident Biełarusi. Ja nie baču pamiž nami nijakaj kankurencyi».
«Pa svajoj pryrodzie ja nie mahu rabić dypłamatyčnuju pracu, jak maja žonka, — dadaje Cichanoŭski. — Jana bolš spakojnaja, bolš praktyčnaja i maje dośvied, jakoha ŭ mianie niama».
Jon kaža, što adnaviŭ karjeru videabłohiera:
«Maja meta — zrabić kankretnyja kroki, kab hety režym razvaliŭsia».
Franak Viačorka, starejšy daradca Cichanoŭskaj, ličyć, što Łukašenka mocna praličyŭsia — hetak ža, jak i tady, kali dazvoliŭ Śviatłanie bałatavacca suprać jaho ŭ 2020 hodzie, vyśmiejvajučy jaje jak maleńkuju dziaŭčynku.
Pakul Cichanoŭski byŭ u turmie, u Śviatłany byli padstavy strymlivać svaje słovy i dziejańni z-za bojazi za muža:
«Ciapier u ich bolš niama takich ryčahoŭ upłyvu», — skazaŭ Viačorka.
Cichanoŭskija raskazali vydańniu, što jany spadziajucca zaachvocić tych biełarusaŭ, chto vahajecca, dałučycca da nacyjanalnaha dyjałohu — padobnaha da taho, jaki pakłaŭ kaniec kamunizmu ŭ Polščy ŭ kancy 1980-ch. «My nie pahražajem paviesić ich [ułady] na słupach aśviatleńnia, — skazała jana. — My kažam im, što Łukašenka kaliści pamre, i im treba padumać pra siabie».
Natchnionaja vizitam Kiełaha, Cichanoŭskaja i jaje prychilniki spadziajucca, što ZŠA dapamohuć zrabić heta realnaściu, piša vydańnie.
Choć para jašče nie razmaŭlała z prezidentam Trampam, jany chacieli b sustrecca ź im — chacia b kab padziakavać za vyzvaleńnie Cichanoŭskaha.
«Trampu vielmi ciažka mieć spravu z Rasijaj, ale Biełaruś — heta nizka visiačy frukt, — skazała jana. — Biełaruski narod abjadnany vakoł idei pieramienaŭ. Tramp maje ŭładu i ryčahi, kab ažyćciavić heta».
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary