«Pažartavali z bulbaj u minułym hodzie — atrymali ad nasielnictva pa vušach». Łukašenka zaklikaŭ čynoŭnikaŭ da surjoznaści
Pravodziačy siońnia sielektarnuju naradu sa svaimi čynoŭnikami, Łukašenka nie abyšoŭ uvahaj nabalełuju sioletniuju prablemu — zabieśpiačeńnia spažyvieckaha rynku bulbaj. Jon pastaviŭ pierad ahraryjami zadaču sabrać bulby nie mienš za miljon ton, kab chapiła i dla ŭnutranaha rynku, i dla ekspartu.
Łukašenka adznačyŭ, što na ŭłasnyja vočy bačyć, što na bulbianych palach nie ŭsio ładzicca:
«Što z bulbaj? Ja ŭsio ž taki baču na palach, dzie kantraluju, što fitaftora ci niejkaja tam inšaja zaraza», — źviarnuŭsia jon da ministra sielskaj haspadarki Juryja Horłava.
Ministr adkazaŭ, što, mahčyma, ahraryi krychu i nie spravilisia z kantrolem, ale prahnoz na ŭradžaj aptymistyčny: «kali ŭ minułym było sabrana 780 tysiač ton bulby, to ŭ hetym kraina płanuje atrymać nie mienš za miljon ton».
Łukašenka znajšoŭ krynicu dla aptymizmu ŭ tym, što
«ŭ nas usio ž taki vytvorčaść bulby, jak i burakoŭ, skancentravanaja ŭ asobnych haspadarkach, tam dzie ŭmiejuć jaje apracoŭvać. Tamu treba apracoŭvać, kab nie zahubić».
U suviazi z hetym jon daručyŭ nie tolki ministru, ale i premjeru ź vice-premjeram arhanizavać pracu tak, kab «nie było nivodnaj zaŭvahi».
«Dziejničajcie, dakładvajcie napramuju. Kali chtości vam nie padparadkavaŭsia, nie daŭ infarmacyju, prymiem samyja žorstkija miery. Siońnia nielha žartavać. Pažartavali z bulbaj u minułym hodzie — atrymali ad nasielnictva pa vušach. I apraŭdvajemsia ŭsie — ad prezidenta da staršyni rajvykankama», — papiaredziŭ Łukašenka.
I na toje, što bulba vyvozicca ŭ Rasiju, kivać taksama, pa jaho słovach, nie varta:
«Apraŭdvajemsia, što bulba była ŭ Rasii daražejšaja ŭ try razy i jaje vyvieźli. Dyk treba było vyraścić stolki, kab na ŭnutranym rynku chapała bulby i možna było pradać. Heta dobryja hrošy dla sialan».
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač25
Kamientary