Łukašenku dałažyli, što kambajny nie hatovyja da žniva ŭ kožnaj treciaj haspadarcy
U Biełarusi sioleta, kali vieryć Alaksandru Łukašenku, płanujuć sabrać kala 11 miljonaŭ ton zbožža. Na sielektarnaj naradzie jon adznačyŭ, što heta — toj uradžaj, jaki zaraz jašče na palach, i jaho treba sabrać biez strat. Adnak nie ŭsio prachodzić hładka, piša BiełTA.
Kamitet dziaržkantrolu, Hienprakuratura i MUS dakładvajuć, što ŭ niekatorych rehijonach da žniva padrychtavalisia drenna. Častka techniki — kambajny, zierniesušylnyja kompleksy — u niaspraŭnym stanie.
Niekatoryja adramantavanyja kambajny navat nie prajšli techahlad. Heta pryvodzić da taho, što nahruzka kładziecca na mienšuju kolkaść pracujučych mašyn.
U kožnaj treciaj haspadarcy z pravieranych kambajny nie hatovyja da pracy. U niekatorych miescach ramonty navat nie pačynali — nie chapaje ni zapčastak, ni miechanizataraŭ. Taksama prablemy z zachoŭvańniem uradžaju: składy nie padrychtavany, brakuje paliva i materyjałaŭ. Jość i vypadki padmanu — u 5% haspadarak technika była «hatovaja» tolki pa dakumientach.
Užo na pačatku žniva Kamitet dziaržkantrolu vyjaviŭ vypadki niajakasnaj pracy, naprykład, u Śvisłackim i Salihorskim rajonach. Padobnyja prablemy i pry narychtoŭcy karmoŭ: šmathadovyja travy nie byli svoječasova padkormlenyja, technika złamanaja, tempy rabot nizkija.
U Viciebskaj vobłaści pa stanie na 14 lipienia jašče nie byŭ zavieršany pieršy ŭkos traŭ na 20 tysiačach hiektaraŭ.
Kamientary