«Burać, burać i atrymlivajuć vadu». Łukašenku daviałosia tłumačyć, čamu znajści radoviščy nafty nie tak prosta
22 lipienia Łukašenka sabraŭ u siabie naradu pa pytańniach zdabyčy vuhlevadarodnaj syraviny. Padčas jaje jon adznačyŭ, što ŭradam byŭ padrychtavany płan-hrafik praviadzieńnia hieołaharaźviedačnych rabot, ale jaho terminy padalisia jamu nadta zaciahnutymi — až da 2030 hoda. U vyniku jamu daviałosia tłumačyć, što nadta chutka heta ŭ pryncypie nie robicca.
Namieśnik ministra pryrodnych resursaŭ i achovy navakolnaha asiarodździa Viktar Hałanaŭ patłumačyŭ, što pa stanie na siońnia sistema pa hieołaharaźviedcy ŭ krainie vybudavanaja dziejnaściu dvuch pradpryjemstvaŭ: RNPC pa hieałohii ź sistemy Minpryrody i vytvorčaha abjadnańnia «Biełaruśnafta». Pieršaje pravodzić raboty pa pačatkovym pošuku vuhlevadarodaŭ, abhruntoŭvaje nieabchodnaść nastupnaha bureńnia i akreślivaje zony mahčymaj naftahazanosnaści.
«Spačatku pravodzicca praca, abhruntavańni, zaburka, vyznačajucca zapasy vuhlevadarodaŭ i paśla hetaha pieradajem «Biełaruśnafcie» dla nastupnaha», — raskazvaŭ namieśnik ministra.
«A jany burać, burać i atrymlivajuć vadu», — pierabiŭ, nie vytrymaŭšy, Łukašenka.
Čynoŭnik patłumačyŭ, što padčas praviadzieńnia hieafizičnych rabot vada i nafta ŭ pryncypie pa ŭsich katehoryjach pakazvajuć adzin i toj ža vynik, i tamu biez bureńnia niemahčyma razabracca, što mienavita tam chavajecca na hłybini 3-4 kiłamietry.
Tady Łukašenka padniaŭ staršyniu Kamiteta dziaržaŭnaha kantrolu Vasila Hierasimava, jaki zajaviŭ, što «Biełnafta» admoviłasia pryniać ad NPC na hieałohii 7 śvidravin, bo jany niepierśpiektyŭnyja.
«Heta značyć, darasśledavała «Biełaruś-nafta» paśla navukoŭcaŭ, tak? I skazali — chłopcy, nam takija śvidraviny i vašy prapanovy nie patrebnyja, tamu što tam ničoha niama. Značyć, hety čas, a heta nie adzin hod, RNPC spracavała marna?» — pastaviŭ pytańnie Łukašenka.
A kali Hierasimaŭ zajaviŭ, što «praktyčnaha vyniku ad ich dziejnaści faktyčna niama», to Łukašenka staŭ namiakać, što RNPC pa hieałohii moža i ŭvohule niepatrebny.
Viktar Hałanaŭ patłumačyŭ:
«Havorka idzie pra 7 śvidravin, jakija na siońnia znachodziacca na bałansie našaha RNPC pa hieałohii. Heta značyć, za ŭvieś pieryjad, apošnija dziesiacihodździ, kala 14 śvidravin pieradadziena «Biełaruś-nafcie» ŭ pramysłovuju ekspłuatacyju. Pa ŭsich pa ich praviedzienyja raboty, vyznačanyja zapasy, i pieradadzienyja jany «Biełaruś-nafcie» dla dalejšych daśledavańniaŭ i pramysłovaj ekspłuatacyi.
Razam z tym 7, jakija zastalisia na siońnia na bałansie RNPC, jany małapraduktyŭnyja. Heta značyć, u ich nafta jość, ale ekanamičny efiekt ad ich admoŭny budzie. I tamu na siońnia jany vykonvajuć navukovuju metu i navukovuju zadaču.
Tamu što zychodziačy z tych danych, jakija my atrymali ŭ vyniku bureńnia hetych śvidravin, my prahnazujem dalejšaje rehijanalnaje vyvučeńnie ŭ hetaj miascovaści. Hetyja śvidraviny, jakija małapraduktyŭnyja, zastajucca na našym bałansie i vykonvajuć metu navukovych daśledavańniaŭ».
«Voś tak pryhoža skazana, ale ci heta sapraŭdy pa-haspadarsku maje sens?» — pacikaviŭsia Łukašenka.
Jaho zapeŭnili, što ŭ vyniku takoj pracy kompleksam hieafizičnych daśledavańniaŭ vyznačajucca dadatkovyja śvidraviny, jakija mohuć dać pryrost zapasaŭ nafty na najbližejšyja 5 hadoŭ. Ale dla hetaha treba pravieści pa ich poŭny kompleks daśledavańniaŭ.
«Ja dakładna viedaju, što ŭ nas tut reziervy jość, jak i ŭ lubym kirunku našaj dziejnaści. Tamu treba nie razhojdvacca, a śvidravać i śvidravać. Ale śvidravać z rozumam i z ukaranieńniem novych technałohij! Luboje śvidravańnie, lubaja hieołaharaźviedka pavinny być apraŭdanyja», — upeŭnieny Łukašenka.
Hiendyrektar «Biełarusnafty» Alaksandr Lachaŭ, dumku jakoha Łukašenka taksama spytaŭ, staŭ na bok Viktara Hałanava. Pavodle słoŭ Lachava, Minpryrody i NPC pa hieałohii, jaki pracuje pry im, viaduć najbolš ryzykoŭny etap rabot — paramietryčnaje pošukavaje bureńnie. Tolki kožnaja treciaja takaja śvidravina moža dać naftu abo haz, a ŭ častcy vypadkaŭ niama mahčymaści atrymać rentabielnuju pradukcyju.
«Heta suśvietnaja praktyka. Heta radoviščy, jakija majuć zapasy mienš za 100 tysiač ton. Z adnoj takoj śvidraviny možna arhanizavać hadavuju zdabyču nie bolš za 300-400 ton. Dla hetaha treba pabudavać adpaviednyja kamunikacyi i padać hetuju naftu ŭ naftazbornuju infrastrukturu. Praktyčna akupnaści tut niama. I tak adbyvajecca ŭ mnohich krainach śvietu», — skazaŭ jon.
U Polščy znajšli vialikaje radovišča nafty i pryrodnaha hazu
«A zmožacie vylecieć zaŭtra?» Džon Koŭł raskazaŭ, jak piŭ z Łukašenkam harełku, kab damovicca pra vyzvaleńnie palitviaźniaŭ
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali
«Pažartavali z bulbaj u minułym hodzie — atrymali ad nasielnictva pa vušach». Łukašenka zaklikaŭ čynoŭnikaŭ da surjoznaści
Kamientary
Voś z hetaj kropcy i pačynajucca ŭsie prablemy. Kali dyktatar u čymści ŭpeŭnieny, i zahadvaje rabić zamiest taho, kab spačatku padyjści da pytańnia "z rozumam" i acanić, ci ŭvohule jość kamiercyjny sens ŭkładać hrošy i pačynać rabić? A potym vinavaty NPC pa hieałohii, Biełarusnafta, čort, djabł - tolki nie dyktatar, jaki pierakanaŭ sabie ŭ tym, što Biełaruś nibyta źjaŭlajecca naftavaj krainaj. Jakoha nie nichto nie abiraŭ i jaki zmarnavaŭ hrošy padatkapłatnikaŭ dziela ŭłasnych chaciełak