Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali
Za apošni čas apieratary i fatohrafy, što absłuhoŭvajuć Alaksandra Łukašenku, źniali interjery adrazu dźviuch jaho rezidencyj — jany ŭpieršyniu apynulisia ŭ poli zroku šyrokaj hramadskaści. Pahladzieli, jak z hustam u biełaruskaha palityka.
U hrafskim pałacy
15 lipienia «Puł Pieršaha» i aficyjny sajt Alaksandra Łukašenki apublikavali kadry jaho sustrečy z prezidentam Indaniezii Prabova Subijanta. Padkreślivałasia, što Łukašenka prymaŭ vysokaha hościa ŭ siabie doma.
Paznać, u jakoj sa šmatlikich aficyjnych rezidencyj prymali Subijanta, dosyć prosta: porcik z kłasičnymi kałonami i zialony koler fasadaŭ vydajuć hałoŭny budynak rezidencyi «Aziorny» ŭ Astrašyckim Haradku.
Hetaja rezidencyja traplała ŭ abjektyŭ da hetaha času prynamsi dvojčy. U mai 2011 hoda, kali jaje naviedvaŭ u jakaści rasijskaha premjer-ministra Uładzimir Pucin, i ŭ 2015 hodzie, kali ŭ Astrašyckim Haradku Łukašenka, ź jašče małym synam Kolem sustrakaŭ premjer-ministra Pakistana Navaza Šaryfa. Praŭda, u abodvuch vypadkach u kadr apierataraŭ traplaŭ vyklučna bakavy flihiel ź vialikaj prybudovaj i nikoli — hałoŭny budynak.
Jak my pisali raniej, rezidencyja ŭ Astrašyckim Haradku źjaŭlajecca siadzibaj hrafaŭ Tyškievičaŭ, kolišnich uładalnikaŭ miastečka. Hałoŭny budynak rezidencyi —heta siadzibny dom, pabudavany ŭ modnym tady anhlijskim styli pobač z ruinami bolš vieličnaha pałaca, jaki da taho času zhareŭ. U druhoj pałovie XIX stahodździa Napaleon Orda zamalavaŭ siadzibny dom, bakavy flihiel i ruiny staroha pałaca.
Čytajcie taksama: Łukašenka žyvie ŭ sapraŭdnym mahnackim pałacy
Za savieckim časam budynak siadziby pierabudavali, ale jaho abrysy ŭsio jašče paznajucca na zdymkach, zroblenych sa spadarožnikaŭ — bližej fotakamiery da jaho nie padpuskali.
Faktyčna heta ci nie pieršy raz, kali dom Łukašenki ŭ Astrašyckim Haradku pakazali publicy. Na adzietym u hranit hanku stajać dva miakkija kresły i stolik z kavanaha mietału. Dźviery pad kłasiku ź filonhami, ale płastykavyja vokny z tonkimi nakładnymi šprosami nijak nie pasujuć budynku z bolš jak paŭtarastahadovaj historyjaj.
Pakazali, taksama ŭpieršyniu, i interjery hetaha doma. Sustreča ź indaniezijskim prezidentam prachodziła ŭ adnym z vuhłavych pakojaŭ. U adździełcy pakoja nie paznajecca ničoha, što mahło b zastacca ad hrafaŭ Tyškievičaŭ.
Interjer aformleny ŭ duchu jeŭrakłasiki, modnaj siarod nuvaryšaŭ u pačatku 2000-ch hadoŭ: strymanaja palitra, elemienty dekoru — imitacyja histaryčnaha stylu biez pretenzii na aŭtentyčnaść.
Ścieny pamalavanyja ŭ strymany šery koler i ŭpryhožanyja butaforskimi ramkami ź piejzažnymi ŭstaŭkami i bra pad daŭninu. Na voknach — prostyja hardziny i ciažkija štory, jakija vyrastajuć prosta ź nizkaj apuščanaj padviesnaj stoli, jakaja dušyć nievialiki pakoj. Na padłozie ź ciomnaha dreva ŭtulny bežavy dyvan z šyrokim ciomnym bardziuram. Meblevy harnitur u kłasičnych formach z kryvaliniejnymi nožkami, strymanaj pazałotaj i šyzaj abiŭkaj.
Samy cikavy elemient interjera — hrubka — vysokaja kruhłaja hałandskaja piečka kala ściany, upryhožanaja biełaj palivanaj dekaratyŭnaj kaflaj. Jaje možna było b pryniać za artefakt, jaki cudam pieražyŭ usie jeŭraramonty ŭ interjery, ale, vidać, heta taksama dekaratyŭnaja butaforyja pad daŭninu.
Hrubka raźmieščana niełahična, možna skazać, biezhaspadarna — pamiž voknami kala vonkavaj ściany. Zvyčajna piečy stavili va ŭnutranych kutach, kab nie hublali ciapło, kab nie aciaplać vulicu. Sapraŭdny haspadar naŭrad ci b dapuściŭ, kab hrošy tak vykidalisia na viecier.
Tym nie mienš, z usich interjeraŭ, u jakich zasiadaje Łukašenka, hety pakoj u pałacy ŭ Astrašyckim Haradku vyhladaje samym čałaviečnym i ŭtulnym, biez asablivaha kiču.
Dom dla zabaŭ siamji
Druhi dom Łukašenki, rezidencyja «Krasnasielskaje», raźmieščanaja niedaloka ad vioski Šaršuny, za 40 kiłamietraŭ ad Minska, trapiŭ u kadr na niekalki miesiacaŭ raniej. Siudy 10 krasavika hetaha hoda pryvieźli pakistanskaha premjer-ministra Šachbaza Šaryf, brata Navaza Šaryfa, jaki dziesiać hadoŭ tamu naviedvaŭ dom Łukašenki ŭ Astrašyckim Haradku.
Apaznać jaho dapamahli płany i rendary interjeraŭ rezidencyi, jakija pakazaŭ sioleta ŭ svaim rasśledavańni «Biełpoł». Rezidencyju pabudavali tajemna pasiarod lesu, vydajučy jaje za azdaraŭlenčy kompleks abo rezidencyju dla adpačynku rasijskaha aliharcha Mikałaja Huceryjeva.
Pakistanskuju delehacyju Alaksandr Łukašenka sa svaimi synami Dźmitryjem i Kolem sustrakali ŭ vialikim chole doma, jaki ŭ rezidencyi pryznačany dla zabaŭ siamji i pryjomu haściej. U domie dla hetaha jość zała pryjomaŭ, biljardnaja, fiešeniebielny bar.
Nasamreč vialiki choł, u jaki hości traplajuć adrazu z vulicy, i jość załaj pryjomaŭ. Pamiaškańnie płoščaj kala 260 kvadratnych mietraŭ zajmaje amal uvieś pieršy pavierch centralnaj častki budynka. Płaniroŭka doma simietryčnaja, da zały pryjomaŭ z adnaho boku prymykaje kryło z kuchnia, a ź inšaha — spalnaje kryło.
Ź pieršaha rakursu bačny viestybiul ź vitražnaj šklanoj pieraharodkaj, u jakoj raskryty ŭvachodnyja dźviery. Z pravaha boku možna zaŭvažyć jašče adny dźviery — jany viaduć u tualet, dakładna taki ž znachodzicca pa inšy bok.
Z druhoha rakursu bačnaja vyhnutaja leśvica, jakaja viadzie na druhi pavierch. Za joj schavanyja dźviery, jakija viaduć u siervirovačnuju kuchni. Simietryčnyja leśvica ź inšaha boku chavaje choł, jaki złučaje zału pasiadžeńniaŭ sa spalnym kryłom.
Rasśledvalniki z «Biełpoła» trochi pamylilisia nakont taho, što hety dom spłanavany tak, kab prysłuha mahła prajści z kuchni ŭ adnym kryle ŭ svaje spalni ŭ kryle pa samym karotkim maršrucie, nie traplajučy na vočy siamji Łukašenkaŭ. Nasamreč ni na płanach, jakija jany publikavali, ni ŭ realnaści niama tych dźviarej z kuchni, jakija b mahli zabiaśpiečyć taki niezaŭvažny pierachod.
Taksama małapraŭdapadobna, što spalny korpus pryznačany dla prysłuhi: spalni tam chutčej nahadvajuć hatelnyja numary z asobnymi sanvuzłami i vychadami na łodžyi. Chutčej za ŭsio, hetyja spalni pryznačany dla haściej siamji, a prysłuha pražyvaje ŭ bolš ścipłych umovach, u karpusach internatnaha typu na terytoryi rezidencyi, prychodziačy ŭ dom zabaŭ tolki na pracu.
Pad leśvicami, jakija viaduć na druhi pavierch, raźmieščany leśvicy, jakija viaduć na cokalny pavierch — pra napaŭnieńnie hetych pavierchaŭ ničoha nie viadoma.
Sama zała pryjomaŭ — prastornaje pamiaškańnie pramavuholnaj formy, da jakoha z bakoŭ dałučajucca eksiedry — paŭkruhłyja pašyreńni. Ich farmirujuć kryvaliniejnyja ścieny pamiaškańniaŭ, sprajektavanych u kutach centralnaj častki doma: užo zhadanych siervirovačnaj-myječnaj, choła spalnaj častki, a taksama kabinieta i čaćviortaha pakoja, jaki na prajektnych čarciažach adsutničaŭ.
Umoŭny viestybiul ad zały adździalajuć dźvie masiŭnyja kałony, jašče niekalki chaatyčna raźmieščany ŭ samoj zale.
Taŭściennym słupam, zadača jakich była čysta kanstrukcyjnaj — nieści ciažar druhoha pavierchu, architektary niaŭdała sprabavali nadać niejkaje padabienstva kłasiki, raśpisaŭšy pad marmur i načapiŭšy tazikapadobnyja kapiteli.
Uvohule niazhrabnyja kałony — heta sapraŭdny praklon architektury poźniaha łukašyzmu: tuju ž biadu, ale ŭ jašče bolš hratesknych formach, moža pabačyć u interjerach Pałaca Niezaležnaści i novaha budynku Viarchoŭnaha suda.
U dalniaj častcy zały pasiadžeńniaŭ bačnyja padmostki sceny z zasłonami. Scena, vidać, nie prosta butaforyja — možna bačyć surjoznuju aŭdyjatechniku ŭ jaje kutach.
Dalniaje akno za scenaj viadzie, choć heta nie bačna za hardzinami, na vialikuju terasu. Vyjści na jaje možna praź dźviery, raźmieščanyja abapał sceny.
Ahułam pamiaškańnie zały vykanana ŭ śvietła-kremavaj kałarystycy ź vialikaj kolkaściu śviatła: trapiŭšy tudy, možna padumać, što patrapiŭ na niabiosy.
Ździŭlaje nakolki dakładna rendary, zdabytyja «Biełpołam», adpaviadajuć realnamu interjeru: taja ž płaniroŭka, toje ž afarmleńnie ścien lapnymi ramačkami, taja ž jarusnaja stol ź lapnoj razietkaj, vialikaj lustraj pa centry i mnostvam paŭśfieryčnych chrustalnych śviacilniaŭ pa pierymietry.
Jość i pampiezny kruhły bieły stoł, ale jon, praŭda, ssunuty z centra ŭ adno z bakavych pašyreńniaŭ. Nijakich pasiadžeńniaŭ u zale pasiadžeńniaŭ, viadoma, nie pravodzicca, kali tolki nie ličyć hetaje słova eŭfiemizmam zastolla.
Zała pasiadžeńniaŭ nahadvaje tancpoł u kłubie dla svaich: scena, šmat prastory i mała miescaŭ, dzie možna prysieści i adpačyć.
Ale najbolš prykmietnaja roźnica — padłoha. U prajekcie była zakładzienaja raskošnaja padłoha, malunak jakoj spałučaŭ sietkavy ŭzor i vialikija hieamietryčnyja razietki z raślinnymi matyvami. Takija ž raskošnyja padłohi byli realizavanyja ŭ Pałacy Niezaležnaści. Ale na kadrach z rezidencyi my bačym pad nahami haściej bolš prosty i mienš kantrasny malunak, a taksama frahmient nievialikaj inkrustavanaj razietki pry ŭvachodzie.
Ci była realizavanaja raskošnaja razietka ŭ centry zały — nieviadoma. Bolšaść častka daražeznaj inkrustavanaj padłohi zasłanaja dvuma ciomnymi dyvanami, jakija, vidavočna, pachodziać nie z hetaha śvietłaha interjera i nie harmanujuć ź im. Takaja biezhustoŭnaja niesumiaščalnaść, vidać, i jość lejtmatyŭ łukašenkaŭskaha stylu.
Źjaŭleńnie dyvanoŭ patłumačyć davoli prosta. Amatary pałacavaha šyku, takija jak aŭtakraty postsavieckaj prastory, časta nie zadumvajucca: u vielizarnych pamiaškańniach z marmuru i chrustalu im jašče treba žyć. Takaja padłoha, jak u rezidencyi, ślizkaja, cokaje pad abcasami, adbivaje huki i stvaraje recha. U vyniku dom nahadvaje zału čakańnia na vakzale, a nie ŭtulnaje hniazdo. A padkazać takija elemientarnyja rečy niama kamu.
Pakazanyja kadry ź nienazvanaha doma Łukašenkaŭ dakładna supadajuć z čarciažami i rendarami rezidencyi ŭ Šaršunach, apublikavanymi ŭ rasśledavańni «Biełpoła». Heta nie pakidaje sumnievaŭ: havorka idzie nie pra siadzibu rasijskaha miljardera, a pra jašče adnu, tajemna ŭźviedzienuju rezidencyju Alaksandra Łukašenki.
«Naša Niva» — bastyjon biełaruščyny
PADTRYMAĆCiapier čytajuć
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali12
Kamientary