«Fantastyčnaja čaćviorka: Pieršyja kroki» — novy błakbastar z supierhierojami i Piedra Paskalem. Tam zhadvajecca i Minsk

«Fantastyčnaja čaćviorka» — nie samaja viadomaja z marvełaŭskich historyj va Uschodniaj Jeŭropie. Mocnyja mužčynskija piersanažy nakštałt Čałavieka-Pavuka ci Žaleznaha čałavieka doŭhi čas byli nam bližejšyja, čym navukoviec Ryd Ryčards, jaho kachanaja Sju i siabry Džoni dy Bien. 

Kinošniki pačali padbiracca da «Fantastyčnaj čaćviorki» jašče ŭ 90-ja, ale pieršy vialiki film pa hetaj historyi vyjšaŭ tolki ŭ 2005-m. Atrymałasia sumnieŭna — chacia jon i sabraŭ 330 miljonaŭ dalaraŭ u prakacie, ale byŭ aplavany krytykami. Nastupnaja vynikovaja sproba ekranizacyi była ŭ 2015-m, ale taja stužka i ŭvohule pravaliłasia ŭ prakacie.

U hety raz Marvel nadali hetym hierojam bolš uvahi. Na hałoŭnuju rolu paklikali Piedra Paskala. Paśla praryŭnaj roli ŭ sieryjale «Apošnija z nas» (The Last of Us) hety 50-hadovy čylijec nie siadzić biez spravy — paralelna z «Fantastyčnaj čaćviorkaj» u suśvietnym prakacie jašče dva filmy ź jaho ŭdziełam, viestern «Edynhtan» (Eddington) i kamiedyja «Materyjalisty» (Materialists).

Hieroj Paskala Ryd Ryčards — hałoŭny čałaviek u kamandzie pad nazvaj «Fantastyčnaja čaćviorka». Heta navukoviec, zdolny raściahvać svajo cieła na lubyja adlehłaści. Jaho kachanaja — Sju Štorm (Vanesa Kirbi), žančyna, jakaja moža rabić svajo cieła niabačnym. Jašče ŭ kamandzie jość Džoni Štorm, małodšy brat Sju: jon umieje lotać i pakryvać svajo cieła połymiem. I Bien Hrym, piersanaž sa zvyščałaviečaj siłaj.

Pavialičyć

Pavialičyć

Nam pradstaŭlajuć hetuju kamandu praz čatyry hady paśla taho, jak kaśmičnyja pramiani dali im supierzdolnaści. Za hety čas byłyja astranaŭty pieratvarylisia ŭ słavutych abaroncaŭ čałaviectva, a Ryd i Sju nastolki zvyklisia sa svaim siamiejnym žyćciom, što ŭžo źbirajucca stać baćkami.

Idyličnuju karcinu razburaje Srebranaja Siorfierka — inšapłaniecianka, jakaja papiaredžvaje ziamlan, što chutka ich śviet skaryć kaśmičny boh Hałaktus. Darečy, u scenie ź jaje źjaŭleńniem stvaralniki stužki padtrymali trend zachodniaha kino na zhadvańnie Biełarusi. Tam pakažuć šyldu kinateatra, dzie ŭ prakacie film Sunrise in Minsk (Śvitańnie ŭ Minsku).

Tak ci inakš, zadača «Fantastyčnaj čaćviorki» — pieraškodzić apakalipsisu. Na šlachu da jaje buduć kaśmičnyja padarožžy, pałon u Hałaktusa i nastolki dzivackaja ideja vyratavańnia płaniety, što nie atrymajecca kazać choć pra niejkuju suviaź z realnym śvietam.

Pavialičyć

U hetym, adsutnaści suviazi z realnaściu i sapraŭdnymi emocyjami, «Fantastyčnaja čaćviorka: Pieršyja kroki» vielmi prajhraje lepšym ekranizacyjam komiksaŭ. Hety film zastaniecca cikavym dla tych, chto daŭno znajomy z Rydam Ryčardsam i kampanijaj, dyj prosta dla fanataŭ Marvel. Jak i zaŭždy ŭ śviecie supierhierojaŭ, heta film, jaki možna pahladzieć ź dziećmi.

Ale hetaj stužcy niama čym apielavać da darosłych hledačoŭ, jakich nie źviazvaje z Marvel dziciačaje minułaje. I ŭsio praź niedachopy scenara, jaki nie mohuć vyratavać mocnyja akciory nakštałt Paskala i Kirbi. 

Darečy, pra Paskala i Kirbi. Na ekranie jany hrali paru, ale stvaryć pamiž saboj chimiju ŭ ich tak i nie atrymałasia. Cikava, što hetaja ž chimija pamiž Piedra Paskalem i Vaniesaj Kirbi całkam prysutničaje ŭ realnym žyćci, chacia Kirbi i čakaje dzicia.

Voś jak heta vyhladaje na kadry ź intervju, jakoje vyjšła tydzień tamu:

Pavialičyć

Kamientatary ŭ sacsietkach šalejuć, budujučy teoryi nakont adnosinaŭ pamiž akciorami, chacia tyja i kažuć, što ich źviazvaje tolki blizkaje siabroŭstva.

Hetuju stužku ciapier časta paraŭnoŭvajuć z «Supiermienam» — minułaj supierhierojskaj premjeraj. U adroźnieńnie ad jaho, scenarysty ciapierašniaj «Fantastyčnaj čaćviorki» nie zdoleli stvaryć piersanažaŭ, za jakich chaciełasia b zaŭzieć, i dastatkova zachaplalnuju historyju. Dy i centralny antahanist atrymaŭsia niedapuščalna blakłym dla kaśmičnaha boha, jaki pažyraje płaniety.

Pry hetym film «Fantastyčnaja čaćviorka: Pieršyja kroki» zrobleny ŭ jakasnaj stylistycy retrafantastyki. Heta sproba pakazać budučyniu takoj, jakoj jaje ŭjaŭlali ŭ 60-ja, u čas stvareńnia historyi pra «Fantastyčnuju čaćviorku». Tym bolš hety čas važny i dla samoj historyi, bo dziejańnie adbyvajecca chacia i ŭ paralelnym suśviecie, ale ŭ pieršaj pałovie 60-ch.

Pavialičyć

Pavialičyć

Hetyja alternatyŭnyja 60-ja adnoŭlenyja ŭ filmie ź vialikim kłopatam i dalikatnaściu, i havorka nie tolki pra adzieńnie dy źniešnaść. Vašaj uvazie — cełyja vulicy alternatyŭnaha Ńju-Jorka, stylizavanyja pad 60-ja takim čynam, što inšapłaniecianie i kaśmičny karabiel vyhladajuć u hetym suśviecie tak, nibyta na svaim miescy. I kali stylovaje kino — heta vaša, novuju «Fantastyčnuju čaćviorku» lepš nie prapuścić.

• 3
• 0
• 0
• 0
• 0
• 0
• 0
• 0