Kavaleŭski raskrytykavaŭ inicyjatyvu Ofisa Cichanoŭskaj pra kruhły stoł z Łukašenkam

Ofis Cichanoŭskaj prapanavaŭ ZŠA ideju kruhłaha stała z režymam Łukašenki. Jak raskazvaŭ «Lusterku» dypłamatyčny daradca Cichanoŭskaj Dzianis Kučynski, pieramovy mohuć być pačatyja tolki paśla spynieńnia represij. Hetuju prapanovu jon pieradaŭ i łukašenkaŭskim dypłamatam.

Kiraŭnik Ahienctva jeŭraatłantyčnaha supracoŭnictva i były čalec Kabinietu Valer Kavaleŭski ŭ kamientary «Biełsatu» krytykuje zajavu pra kruhły stoł. Inicyjatyvu jon ličyć pravakacyjnaj.

Heta, skazaŭ Kavaleŭski, moža być sprobaj ubudavacca ŭ praces, jaki inšyja ludzi pabudavali dziela inšych metaŭ — nie dziela załahodžvańnia biełaruskaha ŭnutrypalityčnaha kryzisu. Ofis Cichanoŭskaj farmuluje, na dumku Kavaleŭskaha, absalutna nievykanalnyja na siońnia ŭmovy: pieramovy ź Cichanoŭskaj, spynieńnie represij, vyzvaleńnie ŭsich palitviaźniaŭ, vyklučeńnie ź pieramovaŭ Łukašenki. 

Dypłamat nie vyklučaje, što heta moža być sprobaju naškodzić kancepcyi nacyjanalnaha dyjałohu i kruhłaha stała — zrabić jaje «naśmieškaju» praź niesurjozny padychod da farmulavańnia składanaj inicyjatyvy, jakaja vymahaje «značna bolš lohkich dotykaŭ» i bolš uzvažanaj rytoryki. Pavieł Łatuška, zaŭvažaje Kavaleŭski, praktyčna «biare na słabo» Łukašenku svaimi zajavami. Kavaleŭski pytaje: chto z palitykaŭ u zdarovym rozumie staŭ by reahavać na takija pravakacyjnyja zajavy? 

Jon ličyć važnym «nie pierahružać paradak dnia pieramovaŭ». U dvuchbakovych stasunkach ZŠA i Biełarusi dastatkova prablemaŭ: suŭdzieł Biełarusi ŭ vajnie suprać Ukrainy, raźmiaščeńnie rasijskaj jadravaj zbroi, mihracyjny kryzis, represii… 

«Bolš čym dastatkova temaŭ dla razmovaŭ, ale kali ich usie prynieści za adzin stoł, to heta budzie paralič, heta nie pryviadzie ni da čaho», — miarkuje Kavaleŭski.

Inicyjatyva kruhłaha stała ŭ pryncypie narmalnaja i mahła b abmiarkoŭvacca, dadaje jon. Ale biez žorstkich umovaŭ i pieradusim u zakrytym farmacie.

Pavodle Kavaleŭskaha, ideju kruhłaha stała Ofis davioŭ da amierykancaŭ, ale nie dačakaŭsia reakcyi i dalejšych krokaŭ, a «pajšoŭ u pablik» i «razmazaŭ inicyjatyvu da takoha stanu, što jana robicca absalutna nieprymalnaju».

Pieramovy biez maksimalisckich patrabavańniaŭ niaredka krytykujucca za toje, što ŭłady Biełarusi sadziać bolš, čym vypuskajuć, a situacyja pryncypova nie mianiajecca. Kavaleŭski na heta adkazvaje: situacyja pryncypova mianiajecca dla asob, jakija siadziać u turmach, vychodziać adtul niaredka absalutna pałamanymi, a časam i pamirajuć za kratami. Sistemnyja źmieny ŭ krainie — inšaja reč, da ich vielmi daloka.

Vyzvaleńnie palitviaźniaŭ — najbolš realistyčnaja i dasiahalnaja meta, a stanoŭčy dośvied miž Minskam i Vašynhtonam moža stymulavać i jeŭrapiejskija krainy rabić bolš aktyŭnyja dziejańni ŭ spryjańni vyzvaleńniam, ličyć Kavaleŭski. Kab nie sarvać dasiahnieńnia hetaj mety, patrebnyja bolš strymanyja kamunikacyi, mienš pravakacyjnych zajavaŭ i sprobaŭ vyklikać admoŭnuju reakcyju z boku Łukašenki. 

Kavaleŭski nie bačyć z boku ŭładaŭ Biełarusi niejkich dziejańniaŭ, jakija možna było b sčytać jak «nam treba z kimści parazmaŭlać, nazavicie nam, z kim». U pieradvybarčaj prahramie Łukašenki ŭ 2025 hodzie byŭ «pošuk šlachoŭ da vybudoŭvańnia stasunkaŭ», ale pakul nie vidać kankretnych płanaŭ administracyi Łukašenki ŭ hetaj spravie. 

Nie bačyć Kavaleŭski i hatovaści da dyjałohu z boku demakratyčnych siłaŭ: apazicyjnyja palityki časta apuskajucca da pahrozaŭ, jak Siarhiej Cichanoŭski, jaki choča pasadzić Łukašenku na koł.

Tym, chto kaža pra hatoŭnaść Minsku da dyjałohu, Kavaleŭski prapanuje spytać siabie: a my hatovyja vieści hety dyjałoh? Kali ž iści za stoł pieramovaŭ z «nastrojem pieramožcaŭ», možna zastacca samotnymi za tym stałom.

• 15
• 4
• 3
• 8
• 0
• 2
• 0
• 0