«Kryva pakuryŭ». Alimpijskaha čempijona Aramnava zatrymali, źbili i adpuścili ź IČU z kryminałkaj

Barysaŭčanin Andrej Aramnaŭ prasłaviŭsia ŭ 2008-m: tady jon pieramoh na Alimpijskich hulniach u Piekinie. Zrabiŭ jon heta tryumfalna, adrazu z tryma suśvietnymi rekordami — pieršy taki vypadak u historyi. Aramnavu było ŭsiaho 20 hadoŭ, zdavałasia, napieradzie zornaja karjera. Ale alimpijskaja pieramoha litaralna zakruciła asiłku hałavu. Andrej pajšoŭ u zahuł.

Pa vyniku jaho niekalki razoŭ zatrymlivali pjanym za styrnom. Čempijon atrymaŭ dźvie kryminałki, pazbaviŭsia stypiendyi ad Łukašenki i rassvaryŭsia z trenierami zbornaj Biełarusi.

Niekalki razoŭ čempijon sprabavaŭ uziacca za rozum i viarnucca ŭ prafiesijny sport. U 2019-m jon navat atrymaŭ srebra na čempijanacie śvietu. Ale da jašče adnaho alimpijskaha miedala jon tak i nie dabraŭsia. 

Niadaŭna Aramnaŭ, jaki ciapier pracuje taksistam, trapiŭ u čarhovuju niepryjemnuju situacyju. Jak paviedamiła «Jeŭraradyjo», alimpijskaha čempijona zatrymali pa kryminalnaj spravie. Detali historyi raskazała «Trybuna». Padrabiaznaści vydańnie daviedałasia ad pieršakrynicy. Žurnalist partała pradstaviŭsia Aramnavu jak supracoŭnik ustanovy adukacyi, jaki chacieŭ zaprasić jaho na sustreču sa školnikami ŭ miežach Škoły aktyŭnaha hramadzianina. Aramnaŭ raskazaŭ usio, jak na spoviedzi. 

Vyśvietliłasia, što były spartoviec niaŭdała pakuryŭ, pryčym nie cyharety. 

«Karaciej, kryva pakuryŭ ja. Byvaje i takoje, ujaŭlajecie?» — pryznaŭsia Aramnaŭ. Na zaŭvahu pra toje, što narkotyki — heta surjozna, asiłak zajaviŭ: «Heta nie narkotyki! Vy čo, prykałvajeciesia? Traŭka — heta nie narkotyki».

Aramnaŭ raskazaŭ, što vyjšaŭ na volu z barysaŭskaha izalatara časovaha ŭtrymańnia 3 žniŭnia. U źniavolenńni jon prabyŭ troje sutak, sprava suprać jaho nie spynienaja. Pry zatrymańni Andreja źbili.

— Uziali hetyja mianie za dupu. Nichto nie braŭ, a hetyja ŭziali. Prykoł u tym, što brała mianie kampanija, ź jakoj ja kaliści trenavaŭsia. Moža, pakryŭdziŭ niejak u dziacinstvie kaho ź ich? Łuchta poŭnaja, chaj by spačatku navučylisia bić, a potym užo bili.

— Vas i bili navat?

— Nu. Boh ich pakaraje. Heta hučyć, kaniečnie, nie vielmi, ale nasamreč usio dobra. Złavili kłasična: vyjšaŭ z padjezda pakuryć — mianie i ŭziali. Ja ŭvohule nie kuryŭ! Tolki paprasiŭ, ale mnie nie dali. Ja narmalny, adekvatny čałaviek, ščyra vam kažu. Heta siońnia tolki ja roznaj łuchtoj majusia: pryjechaŭ na rečku, vypju piŭka.

Ale hetaje zdareńnie nie paŭpłyvała na palityčnuju pazicyju Aramnava. Jon pryznaŭsia, što padtrymlivaje Alaksandra Łukašenku.

«Ja prezidenta padtrymlivaju rukami i nahami! U mianie ž jość Orden Ajčyny III stupieni, mahu z saboj uziać, kab dzieci pafotkalisia, jaho jašče nie prapiŭ. Ja lublu svajho prezidenta i vielmi dobra staŭlusia da svajoj dziaržavy», — adznačyŭ Aramnaŭ.

Cikava, što ŭ 2020 hodzie Andrej publična padtrymaŭ inšaha kandydata — Siarhieja Čeračnia. Aramnaŭ kaža, što zrabiŭ heta za hrošy:

«Mnie prosta babak zapłacili i ja skazaŭ, kab ludzi źviarnuli ŭvahu na maładoha palityka. Ja ž nie kazaŭ za jaho hałasavać, a kab prosta pahladzieli, što jość taki. Ja jaho asabista viedaŭ, mnie zapłacili 500 dołaraŭ. Ja dumaju, čamu b i nie prapijaryć?»

Ciapier alimpijski čempijon pracuje ŭ taksi. Kaža, što za dzień možna zarabić 300 ci navat 400 rubloŭ. Stolki ž, kolki, ź jaho słoŭ, zarablajuć treniery ŭ spartovych škołach.

• 1
• 2
• 12
• 30
• 2
• 0
• 1
• 0