Biełaruska natchnialna raskazała, jak atrymała novuju prafiesiju ŭ Hiermanii paśla 45 hadoŭ

Čytačka «Našaj Nivy» Alena kaža, što svaim prykładam choča natchnić biełarusaŭ nie bajacca źmianić niešta ŭ svaim žyćci — navat paśla 45 hadoŭ.

— Ja davoli časta čuju ad ludziej, jakim 40 ci navat usiaho 35, što im užo pozna vučycca čamuści novamu, pavyšać kvalifikacyju ci navat hłabalna źmianiać prafiesijny šlach: «Heta składana, ja nie zmahu…». Ja vučyłasia novaj prafiesii na dźviuch čužych movach — niamieckaj i łatyni. I ciapier ščaśliva, što mahu pracavać u takoj cikavaj śfiery.

Ale pačniom ad startu: u 1999 hodzie Alena skončyła ŭniviersitet. Śpiecyjalnaść atrymała piedahahičnuju. Spačatku pracavała školnym psichołaham, potym — nastaŭnicaj anhlijskaj movy.

Žančyna kaža, što maryła stać psichołaham. Toje, što bonusam treba było intensiŭna vyvučać anhlijskuju, było druhasnym. Alena pryznajecca, što zamiežnaja mova davałasia joj składana. Ale ž na haryzoncie majačyła hałoŭnaja meta — dypłom psichołaha. Padčas vučoby ŭ VNU jana prachodziła dadatkovyja sieminary.

Atrymaŭšy vyšejšuju adukacyju, Alena zrazumieła: bolš za ŭsio joj padabajecca pracavać mienavita ź ciełam čałavieka.

— Słovy, kamunikacyja… Heta nie zusim toje, što asabista mnie pasuje. U tym samym 1999-m ja pastaviła sabie ptušku ŭ hałavie, što chaču pracavać u napramku cialesna-aryjentavanaj terapii.

Žyćcio skłałasia inakš. Spačatku — dva dekretnyja adpačynki, a paśla Alena vyrašyła, jak ciapier kažuć, «syści ŭ IT». Jana pracaŭładkavałasia kadravikom i 12 hadoŭ pracavała ŭ IT-kampanijach.

— Dobryja zarobki, cikavyja zadačy, vybitnyja kalektyvy… Usio było cudoŭna.

Niamieckuju movu Alena pačała vyvučać tolki ŭ 38 hadoŭ — za niekalki miesiacaŭ da taho, jak ź siamjoj pierajechała ŭ Hiermaniju, bo mužu prapanavali pracu tam.

— I voś amal u 40 hadoŭ ja apynułasia ŭ Hiermanii i pačała dumać, ci zmahu ja pracavać intensiŭna ŭ toj samaj śfiery? Ci zmahu ja jak HR zarabić niamieckuju piensiju? Kaniečnie, byli dumki, ci chopić mnie sił i zdaroŭja na toje, kab adoleć hety vyklik.

Tady i zhadała pra svaju maru 1999-ha — pracavać u kirunku cialesnaj terapii.

Žančyna pryznajecca: tolki praz šeść hadoŭ intensiŭnaha vyvučeńnia niamieckaj movy — u svaje 44 hady — zrazumieła: voś ciapier jaje ŭzroŭniu dastatkova, kab pajści vučycca z nula novaj prafiesii.

U Hiermanii jość ausbildung — tak nazyvajecca sistema profilnaj siaredniaj adukacyi. Alena vyrašyła, što choča stać erhaterapieŭtkaj.

— U ruskamoŭnaj prastory hetaja prafiesija hučyć davoli redka. Kali kazać prostaj movaj, heta bližej za ŭsio da reabilitołaha. Ja dapamahaju ludziam jak paśla roznych traŭm, tak i niejrałahičnym pacyjentam, stałym ludziam, u jakich pačalisia ŭzrostavyja prablemy… To-bok erhaterapieŭt — heta śpiecyjalist, jaki razam z pacyjentam ruchajecca albo pa šlachu adnaŭleńnia paśla traŭm i chvarob, albo pa šlachu padtrymki. Bo, kaniečnie, nie mocna ty adnoviš pacyjenta z demiencyjaj, tam užo šlach zrazumieła kudy, ale my prachodzim hety šlach razam hodna.

Vučycca, kaža Alena, było składana. Bo havorka išła nie pra kursy, a pra paŭnavartasnaje navučańnie: šeść hadzin zaniatkaŭ štodzionna, chatnija zadańni, padrychtoŭka da kantrolnych…

U hrupie biełaruska była samaj starejšaj vučanicaj — jaje adnakurśnicam było ad 16 da 22 hadoŭ. Dy i z nastaŭnikaŭ šmat chto byŭ maładziejšy za Alenu. Ale jana nie sutykałasia z ejdžyzmam.

— Ja adčuvała siabie vydatna. Moža, sprava ŭ tym, što dla Hiermanii moj vypadak nie vielmi ŭnikalny. Tut ludzi va ŭzroście niaredka iduć vučycca čamuści novamu.

A składanaści ŭ vučobie čaściej za ŭsio byli źviazany z movaj.

— Usie maje nastaŭniki, adnakurśniki byli niemcami — i ja adna na hrupu zamiežnica. Nichto nie rabiŭ skidku na toje, što dla mianie niamieckaja — nie rodnaja. U Hiermanii ŭ kožnym rehijonie jość svaje asablivaści vymaŭleńnia, jakija vielmi dalokija ad litaraturnaj movy. I kaniečnie, nichto pad čas lekcyi nie dumaŭ, ci razumieju ja ŭsio, što hučyć. Kali ja niešta ŭdakładniała, mnie tłumačyli. Ale ja sama imknułasia biehčy napieradzie ciahnika, być vielmi skancentravanaj.

Samo navučańnie ŭ Bavaryi było dla Aleny biaspłatnym, spadarožnyja vydatki byli nievialikimi.

— Ja ž darosły čałaviek — u mianie jość dzieci, jość abaviazki. Try hady — davoli vialiki pramiežak času, tamu treba było daskanała ŭsio praličyć pierad tym, jak pajści vučycca. Ale ja prykidvała: navat kali b u mianie nie było muža i było b pry hetym dvoje niepaŭnaletnich dziaciej, ja b u miežach niamieckaj madeli atrymańnia adukacyi zmahła b sabie dazvolić hetuju vučobu. Bo ŭ Hiermanii realna atrymać padtrymku dziaržavy ŭ apłacie žylla, kamunalnych pasłuh. Adziny varyjant, kali b ja nie zmahła pajści vučycca bieź finansavaj padtrymki muža — heta kali b u mianie było dvoje zusim maleńkich dziaciej. Bo maleńkija dzieci patrabujuć vielmi šmat času — heta asobnaja praca.

U novaj śfiery Alena ŭžo pracuje dva hady — i adčuvaje siabie całkam ščaślivaj. Jana kaža, što kali b była takaja mahčymaść, to z zadavalnieńniem by pracavała i ŭ Biełarusi ŭ reabilitacyjnym centry.

• 22
• 1
• 0
• 0
• 0
• 1
• 0
• 1