«Bieź niezaležnaści niama svabody i niama budučyni». Cichanoŭskaja pavinšavała biełarusaŭ z Dniom abviaščeńnia niezaležnaści
25 žniŭnia 1991 hoda mara ździejśniłasia: Dekłaracyja ab dziaržaŭnym suvierenitecie atrymała siłu kanstytucyjnaha zakona, i ŭpieršyniu z časoŭ BNR Biełaruś znoŭ stała niezaležnaj dziaržavaj. Lidarka apazicyi Śviatłana Cichanoŭskaja pavinšavała biełarusaŭ sa śviatam.
Cichanoŭskaja kaža, što biełarusy maryli pra niezaležnaść svajoj krainy stahodździami. Našyja prodki paŭstavali suprać pryhniotu, baranili svaju ziamlu ad zachopnikaŭ, zachoŭvali movu i kulturu. Kožnaje pakaleńnie płaciła svaju canu, kab Biełaruś žyła.
«Niezaležnaść — heta toje, što abjadnoŭvaje ŭsich nas. Heta nie tolki pra miežy i suvierenitet. Heta — pra mir i biaśpieku, pra prava samim vybirać svaju budučyniu. Heta ŭpeŭnienaść u zaŭtrašnim dni dla našych dziaciej.
Heta naš ściah, naš hierb, našaja mova. Niezaležnaść — heta być častkaj svabodnaj Jeŭropy, a nie pravincyjaj čužoj impieryi», — piša jana.
Cichanoŭskaja davodzić, što siońnia niezaležnaść Biełarusi znoŭ pad pahrozaj. Režym uciahnuŭ našuju krainu ŭ złačynnuju vajnu i zdaje naš suvierenitet Rasii. Usio toje, za što pakaleńni biełarusaŭ zmahalisia i što zdabyli ŭ 1991 hodzie, apynułasia pad pahrozaj, kaža Cichanoŭskaja.
«I siońnia ja chaču źviarnucca da ŭsich biełarusaŭ, i asabliva da tych, chto zastajecca ŭ sistemie, — nie dajcie režymu źniščyć samaje kaštoŭnaje, što ŭ nas jość — našuju niezaležnaść», — zaklikaje jana.
Cichanoŭskaja kaža, što biełarusy nie raz pakazali śvietu: navat u samych ciažkich abstavinach my nie apuskajem ruki i nie zdajomsia. My jadnalisia, baranili svajo — i budziem rabić heta znoŭ. Bo bieź niezaležnaści niama svabody i niama budučyni.
«Biełaruś budzie žyć, pakul žyvie hetaja vola ŭ sercach biełarusaŭ. Z Dniom adnaŭleńnia Niezaležnaści! Žyvie Biełaruś!» — pavinšavała jana.
Ciapier čytajuć
Zatrymali adnaho z udzielnikaŭ juvielirnaha brenda Belaruskicry Jahora Bužyłava. Prapahandysty pakazali jaho5
Kamientary
Dziakuj, što pierakanali kamunistyčnaje bałota, jakoje nie chacieła nijakaj niezaležnaści, a chacieła žyć u saŭkie i z Rasiejaj, usio ž taki prahałasavać za Niezaležnaść Respubliki Biełaruś.
Choć kamunisty-enkavedzisty nazaŭtra i pieradumali, ale było pozna. Fakt hałasavańnia zafiksavany, adkrucić nazad užo niemahčyma.
Vinšuju ŭsich biełarusaŭ sa Śviatam Niezaležnaści.