Zialenski: Ukraina maje ŭłasnuju zbroju dla dalokich udaraŭ pa Rasii biez uzhadnieńnia z ZŠA
Prezident Ukrainy Uładzimir Zialenski zajaviŭ, što ciapier jaho kraina vykarystoŭvaje ŭłasnyja rakiety dalokaha dziejańnia i bolš nie pavinna ŭzhadniać udary pa terytoryi Rasii z Vašynhtonam, piša Business Insider.
Na pres-kanfierencyi z premjer-ministram Kanady Markam Karni 24 žniŭnia Uładzimir Zialenski adznačyŭ:
«Siońnia my vykarystoŭvajem ajčynnuju zbroju dalokaha dziejańnia. I, ščyra kažučy, užo daŭno nie abmiarkoŭvajem padobnyja pytańni z ZŠA».
Pavodle jaho słoŭ, čas, kali Zachad dasyłaŭ supiarečlivyja sihnały nakont udaraŭ Ukrainy pa Rasii ŭ adkaz, užo minuŭ.
Raniej Ukraina krytyčna zaležała ad zachodnich sistem nakštałt amierykanskich ATACMS i brytanskich Storm Shadow. Ich prymianieńnie patrabavała dazvołu i padtrymki ZŠA, u tym liku spadarožnikavych danych dla naviadzieńnia.
Doŭhi čas Kijevu zabaraniali atakavać terytoryju Rasii z-za strachu eskałacyi. Heta vyklikała rasčaravańnie ŭkrainskich uładaŭ, jakija ličyli, što biez mahčymaści bić u tył voraha ich armija «źviazanaja pa rukach».
U kancy 2024 hoda Vašynhton usio ž dazvoliŭ abmiežavanyja ŭdary pa Rasii, ale ŭ žniŭni 2025-ha Wall Street Journal paviedamiła, što Pientahon zabłakavaŭ vykarystańnie ATACMS dla atak unutry RF. Aficyjna Bieły dom zajaviŭ, što «vajenny kurs nie źmianiŭsia».
Adnak za apošnija hady Ukraina stvaryła ŭłasnyja sistemy dalokaha dziejańnia.
- «Nieptun» — kryłataja rakieta, jakaja ŭžo dakazała svaju efiektyŭnaść, patapiŭšy jašče ŭ krasaviku 2022 hodzie fłahman rasijskaha Čarnamorskaha fłotu «Maskva».
- «Fłaminha» — novaja rakieta ŭkrainskaj vytvorčaści z dalokaściu kala 3000 kiłamietraŭ i bajavoj častkaj da 1000 kiłahramaŭ. Jana zdolnaja dasiahać stratehičnych zavodaŭ u Rasii ažno da Urała. 18 žniŭnia ministr abarony Ukrainy Dzianis Šmyhal paviedamiŭ pra pačatak sieryjnaj vytvorčaści hetaj rakiety. Uładzimir Zialenski dadaŭ, što masavaja vytvorčaść moža razharnucca ŭžo ŭ lutym nastupnaha hoda.
Akramia taho, Ukraina aktyŭna vykarystoŭvaje bieśpiłotniki dla ŭdaraŭ pa rasijskich enierhazavodach i vajskovaj infrastruktury. Choć jany pavolniejšyja i słabiejšyja za rakiety, ale taksama dajuć vynik u stratehičnaj vajnie na źniasileńnie.
Na fonie sprob administracyi Donalda Trampa ŭciahnuć prezidenta Rasii Uładzimira Pucina ŭ mirnyja pieramovy situacyja sa źniščalnymi srodkami Ukrainy nabyvaje asablivuju vahu. Sam Tramp niadaŭna adznačyŭ, što «niemahčyma vyjhrać vajnu, kali tabie dazvalajuć tolki abaraniacca, a nie atakavać».
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary