Dačka ministra Markava zapuściła novy prajekt na telebačańni — budzie raskazvać pra historyju Biełarusi
Marat Markaŭ prystroiŭ dačku Nastaśsiu na ANT, jašče kali sam uznačalvaŭ kanał. Pakul baćka mianiaje kresły ŭ ministerstvach, Nastaśsia praciahvaje budavać karjeru na telebačańni. Praŭda, na małaznačnym «JASNAie TV».
Nastaśsi Markavaj 36 hadoŭ. Jana vypusknica jurydyčnaha fakulteta BDU. Raniej dziaŭčyna pracavała vykładčycaj u Jurydyčnym kaledžy BDU. Kala piaci hadoŭ tamu jana ŭładkavałasia jašče i ŭ dyrekcyju internet-viaščańnia ANT, a ŭ 2024 hodzie źjaviłasia i ŭ kadry.
Na toj momant baćka Nastaśsi, Marat Markaŭ, užo šmat hadoŭ uznačalvaŭ hety telekanał.
Žančynie daručyli vieści prapahandyscki internet-prajekt «Likbiez BY». Pieršy ž jaho vypusk pieratvaryŭsia ŭ manałoh Markavaj z zaklikam udzielničać u hałasavańni i źviestkami pra toje, jakaja adkaznaść jość za niajaŭku na vybary ŭ roznych krainach.
Darečy, sioleta toj prajekt naminavali na «Televiaršyniu», ale ŭ vyniku dali Markavaj tolki dypłom łaŭreatki.
Ale ž 2026‑ty staŭ dla Nastaśsi hodam vyprabavańniaŭ. Niekalki miesiacaŭ tamu jana tłumačyła padpisčykam u instahramie, čamu raptoŭna źnikła — chvaroby i stres.
Ciapier jana pachvaliłasia ŭ sacsietkach, što zapuściła aŭtarski prajekt na «JASNAie TV» (naležyć «Biełtelekamu»). Nazyvajecca jon «Kabiniet historyi».
Dačka Markava abiacaje, što prostaj movaj budzie raspaviadać historyju Biełarusi i dapamoža staršakłaśnikam padrychtavacca da ispytaŭ i dobra zdać ich.
Pieršy vypusk Nastaśsia pryśviaciła pachodžańniu słavian. Za sutki videa nie zmahło nabrać navat sotni prahladaŭ.
Adnoj ź pieršych rolik prybiehła kamientavać byłaja kiraŭnica internet-prajektaŭ ANT Śviatłana Cichanava. Taja 10 hadoŭ addała telekanału, ale ŭ 2022 hodzie vyjšła zamuž za małdavanina ŭ Aŭstralii i pierajechała da jaho ŭ Bryśbien.
Śviatłana raniej chvaliła i svajho byłoha načalnika Marata Markava — zachaplałasia intervju taho z Pratasievičam.
I ciapier jana nie zabyvaje dasyłać kamplimienty ź inšaha kanca śvietu ministerskaj dačce, ź jakoj paśpieła papracavać na ANT.
«Maja pryhažunia i razumnica», — napisała Śviatłana Nastaśsi.
Ciapier čytajuć
Ź psichbalnicy źbieh były načalnik Hancavickaj milicyi13
Ź psichbalnicy źbieh były načalnik Hancavickaj milicyi
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary