Biełaruska za dva dni prajhrała ŭ anłajn-kazino amal 70 tysiač rubloŭ i ciapier sprabuje viarnuć ich ad banka
Dziaŭčyna praviała kala 200 apieracyj praz ARIP i spyniłasia, kali ad značnaj sumy praktyčna ničoha nie zastałosia.
Zaraz Dyjana sprabuje razabracca, ci pavinien byŭ bank źviarnuć uvahu na takuju kolkaść płaciažoŭ i ci možna viarnuć prajhranyja hrošy, piša Onliner.by.
— Usio adbyłosia ŭ krasaviku, z 18‑ha pa 20-je. Ja vyrašyła pahulać u anłajn-łatareju, — raskazvaje dziaŭčyna. — Uvohule, ja hulaju prykładna z 2019—2020 hoda, ale raniej heta zaŭsiody byli nievialikija sumy — umoŭna, pa 100 rubloŭ. Niekali niešta vyjhravała, niekali prajhravała, ale takich hrošaj, jak u tyja dni, ja nikoli nie prajhravała.
Niezadoŭha da hetaha ŭ našaj siamji źjaviłasia davoli bujnaja suma — kala 70 tys. rubloŭ. Nie chaču padrabiazna raskazvać, adkul mienavita ŭzialisia hetyja hrošy, kab pa niejkich detalach mianie nielha było paznać. Skažam tak, siamji daviałosia sioje-toje pradać, tamu hetyja hrošy źjavilisia davoli niečakana.
Pa słovach dziaŭčyny, hrošy nie byli niejkimi svabodnymi srodkami, jakija možna spakojna patracić, u siamji byli płany na hetuju sumu, u tym liku treba było vyrašać pytańnie z žyllom.
— Dyk voś, za hetyja dva dni ja prajhrała praktyčna ŭsie 70 tysiač rubloŭ — prykładna pałovu ŭ pieršy dzień i pałovu ŭ druhi.
Pavodle dziaŭčyny, hrošy na rachunak anłajn-łatarei jana pieravodziła praz ARIP. Adnym bujnym płaciažom 70 tysiač nie syšli: bałans papaŭniaŭsia znoŭ i znoŭ pa miery hulni. Usiaho za dva dni nabrałasia kala 200 takich apieracyj.
— A vy nie stavili dla siabie niejki limit: umoŭna, prajhraju 1000 rubloŭ — i chopić?
— Atrymlivałasia, kolki hrošaj było, stolki ja i staviła. Usiaho, nakolki pamiataju, prajšło kala 200 tranzakcyj. Viadoma, u peŭnaj stupieni ja razumieła, što hrošy prajhrajucca. U asnoŭnym tak i adbyvałasia: projhryš, potym znoŭ papaŭnieńnie, znoŭ hulnia. Čamu nie spyniłasia? Ja dahetul nie mahu narmalna adkazać na hetaje pytańnie. Prosta siadzieła i praciahvała papaŭniać bałans, pakul u vyniku na rachunku praktyčna ničoha nie zastałosia.
«Pry hetym ja liču, što z boku banka taksama pavinny byli spracavać peŭnyja miechanizmy abarony. Mnie nie prychodzili SMS, nie było niejkich papiaredžańniaŭ pra reštu na rachunku. Ja liču, što bank chacia b moh previentyŭna zabłakavać kartu i vyśvietlić, ci sapraŭdy ŭsie hetyja apieracyi pravodžu ja. Tym bolš havorka išła pra 200 tranzakcyj za dva dni. Mnie zdajecca, heta pavinna było vyklikać pytańni», — śćviardžaje dziaŭčyna.
«Bank źviazaŭsia sa mnoj užo tady, kali rachunak byŭ pusty. Nakolki ja zrazumieła, ich cikaviła pachodžańnie hrošaj: adkul źjaviłasia hetaja suma i nakolki jana lehalnaja. Ale čamu pravieryć pachodžańnie hrošaj vyrašyli, kali ich užo nie zastałosia?» — dadaje jana.
Dziaŭčyna kaža, što kali b prychodzili SMS abo push-apaviaščeńni, ja b chacia b pastajanna bačyła, jak sychodziać hrošy i kolki zastajecca na rachunku.
«Mahčyma, heta dapamahło b spynicca. A tady ja prosta praciahvała hulać i nie ŭsprymała narmalna, nakolki chutka źmianšajecca rešta», — kaža jana.
Paśla taho, što adbyłosia, Dyjana pačała pisać u roznyja instancyi, sprabujučy zrazumieć, ci možna było spynić takuju kolkaść apieracyj i ci jość mahčymaść viarnuć chacia b častku hrošaj.
Spačatku jana źviarnułasia niepasredna ŭ MTBank, ale tam ź jaje pretenzijami nie pahadzilisia.
Jak vynikaje z adkazu MTBanka, 18 krasavika ŭ 17:44 [pieršy dzień pačatku hulni] ź dziaŭčynaj źviazaŭsia supracoŭnik banka z metaj udakładnieńnia infarmacyi pra apieracyi, jakija pravodzilisia, a nie paśla taho, jak dziaŭčyna prajhrała ŭsie hrošy.
«U chodzie analizu telefonnaj razmovy było ŭstanoŭlena, što adkazny supracoŭnik banka paviedamiŭ vam, što pa kartcy było zafiksavana ździajśnieńnie vialikaj kolkaści apieracyj, paśla čaho zapytaŭ infarmacyju pra pachodžańnie hrašovych srodkaŭ. < …> Vy paćvierdzili, što apieracyi pa apłacie ździajśniajucca pa ŭłasnaj inicyjatyvie.
Źviartajem uvahu, što paśla hetaj telefonnaj razmovy vy praciahnuli ździajśniać apieracyi pa apłacie praz AIS «Raźlik» (ARIP). Uličvajučy vykładzienaje, parušeńniaŭ z boku adkaznaha supracoŭnika banka nie ŭstanoŭlena.
< …>
Za pieryjad z 14 lipienia 2023 hoda pa 22 maja 2024 hoda vami ažyćciaŭlałasia źmianieńnie tranzakcyjnych limitaŭ u bok pavieličeńnia. Tak, byli ŭstanoŭlenyja nastupnyja tranzakcyjnyja limity: bieznajaŭnyja apieracyi ŭ dzień u pryładach Respubliki Biełaruś — 550 000 biełaruskich rubloŭ, bieznajaŭnyja apieracyi ŭ tydzień u pryładach Respubliki Biełaruś — 45 000 biełaruskich rubloŭ. Adznačym, što paśla nazvanaha pieryjadu źmianieńniaŭ limitaŭ nie pravodziłasia.
Suma bieznajaŭnych apieracyj u tydzień u pryładach Respubliki Biełaruś za pieryjad z 13.04.2026 pa 19.04.2026 składaje 42 834,72 biełaruskaha rubla, za pieryjad z 20.04.2026 pa 26.04.2026 składaje 23 696 biełaruskich rubloŭ. Takim čynam, pakolki pieravyšeńnia limitu pa bieznajaŭnych apieracyjach u tydzień u pryładach Respubliki Biełaruś nie było, apieracyi byli praviedzienyja karektna.
Uličvajučy vyšejpadadzienaje, parušeńniaŭ z boku banka ŭ situacyi nie ŭstanoŭlena. Razam z tym u banka adsutničajuć padstavy dla zadavalnieńnia vašaha chadajnictva», — havorycca ŭ adkazie banka.
Na hetym Dyjana nie spyniłasia i źviarnułasia ŭ Nacbank. Tam zapytali infarmacyju ŭ MTBanka i taksama nie znajšli parušeńniaŭ u jaho dziejańniach.
Žurnalisty pierapytali dziaŭčynu, što paśla zvanka ad supracoŭnika banka jana ŭsio roŭna praciahnuła hulać. Čamu heta jaje nie spyniła?
— Tak, pradoŭžyła. 18 krasavika ja prajhrała 36 650 rubloŭ, i supracoŭnik słužby biaśpieki patelefanavaŭ užo tady, kali rachunak byŭ pusty. Raz bank pravieryŭ pachodžańnie hrošaj, nie zabłakavaŭ kartku i ničoha nie skazaŭ pra apieracyi na adras anłajn-łatarei, ja vyrašyła, što ŭsio narmalna.
— Na nastupny dzień, 19 krasavika, na rachunak pastupiła jašče 32 140 rubloŭ, i ja znoŭ pačała pieravodzić hetyja hrošy ŭ anłajn-łatareju. Ale hetym razam z banka ŭžo naohuł nichto nie patelefanavaŭ. Ja liču, što novaje bujnoje pastupleńnie znoŭ pavinna było vyklikać u banka pytańni. Jość praviły KYC, pryncyp «Viedaj svajho klijenta», finansavy manitorynh. Na moj pohlad, bank pavinien byŭ źviarnuć uvahu na toje, što na rachunak znoŭ pastupiła bujnaja suma i jana adrazu pačała źnikać z mnostvam apieracyj. Tamu ja i liču, što z boku banka taksama byli niedahlady.
— To-bok zvanok nie spyniŭ vas ad hulni, a SMS z kodam abo infarmacyjaj pra reštu mahło b spynić?
— Kali tabie telefanujuć i pytajucca: «Vy paćviardžajecie, što hrošy pryjšli i kartkaj karystajeciesia vy?» — mozh u stanie stresu ŭsprymaje heta jak «Usio ŭ paradku, bank uchvalaje, sistema mianie bačyć, ja ŭ biaśpiecy». Žyvy hołas supracoŭnika, jaki vietliva skazaŭ «Dziakuj za paćviardžeńnie, usiaho dobraha» i nie nazvaŭ pahrozu, spracavaŭ jak zialonaje śviatło. Pavodle maich adčuvańniaŭ, jon lehalizavaŭ toje, što adbyvałasia, u majoj hałavie.
— Z SMS, dumaju, situacyja mahła b być inšaj. Kali hulaješ, u niejki momant pačynaješ ździajśniać usie dziejańni praktyčna aŭtamatyčna: papoŭniła rachunak, zrabiła staŭku, znoŭ papoŭniła. A kali b kožnuju apieracyju treba było asobna paćviardžać kodam, mnie kožny raz daviałosia b adciahvacca ad hulni, adkryvać paviedamleńnie, bačyć sumu śpisańnia i reštu na kartcy, a zatym viartacca i ŭvodzić kod.
Takich apieracyj było kala 200, to-bok ja znoŭ i znoŭ bačyła b u realnych ličbach, kolki hrošaj śpisvajecca i jak pamianšajecca rešta. Mahčyma, u niejki momant heta prymusiła b mianie spynicca i ŭśviadomić, kolki ŭžo prajhrana.
— Tady takoha techničnaha barjera nie było. Ja zastavałasia ŭnutry hulni i praciahvała papaŭniać rachunak. Tak što toj zvanok mianie nie praćvieraziŭ, a pastajannyja paćviardžeńni apieracyj, jak mnie zdajecca, całkam mahli b heta zrabić.
Dyjana źviazvałasia ź niekalkimi jurystami, źviartałasia da hramadskich pamočnikaŭ, ale pakul nichto asabliva nie choča za heta bracca. Jana šukaje advakata i kaža, što kali sprava dojdzie da suda, budzie zmahacca za ŭsiu sumu.
«Ja liču, što z boku banka nie spracavali peŭnyja miechanizmy i słužba biaśpieki jak minimum pavinna była źviarnuć uvahu na takuju kolkaść apieracyj za vielmi karotki čas. Ja nie zdymaju adkaznaść ź siabie. Ja sama hulała i sama ździajśniała hetyja płaciažy, ale ŭsio ž liču, što pry prykładna 200 tranzakcyjach i takoj sumie bank pavinien byŭ chacia b spynić apieracyi, źviazacca sa mnoj i vyśvietlić, ci razumieju ja, što adbyvajecca», — kaža jana.
Onliner.by źviarnuŭsia da jurystki Taćciany Ravinskaj z prośbaj prakamientavać situacyju Dyjany.
«Na moj pohlad, u razhladanaj situacyi bank vykanaŭ svoj hałoŭny abaviazak pa abaronie srodkaŭ: zapadozryŭ nietypovuju aktyŭnaść i ažyćciaviŭ papieradžalny zvanok klijentu, što vynikaje z adkazu banka. Ale jak tolki dziejazdolny i paŭnaletni hramadzianin asabista paćviardžaje, što pieravody robić jon, bank nie maje prava ŭtrymlivać srodki i abaviazany vykanać zakonnaje rasparadžeńnie ŭładalnika hrošaj», — kaža juryst.
Kamientary