U Polščy ajčym na praciahu šaści hadoŭ hvałtavaŭ svaju padčarku. Maci ŭsio viedała i navat dapamahała jamu
Na pieršy pohlad heta była ŭzornaja siamja. Ajčym — paśpiachovy biznesoviec, padčarka Ania — honar škoły, jakaja zavajoŭvała ŭznaharody. U nievialikim miastečku, dzie ŭsie dobra viedajuć adno adnaho, nichto i ŭjavić nie moh, što za vobrazam ščaślivaj dziaŭčynki chavałasia sapraŭdnaja trahiedyja.
Jak piša Gazeta Wyborcza, u nievialikim miastečku niedaloka ad Śvidnicy, što ŭ Nižniaj Silezii, Ania žyła razam z maci Darotaj i jaje mužam Vojciecham (imiony źmienieny). Mužčyna kiravaŭ davoli paśpiachovaj budaŭničaj kampanijaj i ŭtrymlivaŭ siamju, u jakoj, akramia Ani, raśli jašče dvoje ahulnych dziaciej pary. Dziaŭčynka dobra vučyłasia i navat pradstaŭlała svaju škołu na vajavodskich spabornictvach. Susiedzi ličyli siamju prykładam dla inšych.
Pra toje, što adbyvałasia za začynienymi dźviaryma doma, daviedalisia vypadkova. U lipieni 2023 hoda 12-hadovaja Ania pajechała na kanikuły da svajoj ciotki Bieaty ŭ Šviecyju. Kali ŭ žniŭni ciotka z mužam advozili dziaŭčynku i jaje brata dadomu, z Aniaj raptam pačało adbyvacca niešta dziŭnaje: jana płakała, admaŭlałasia jechać, pahražała, što ŭciače. Dla Bieaty heta stała šokam — raniej dziaŭčynka zaŭsiody była pasłuchmianaj. Kali jaje pačali supakojvać i raspytvać, Ania pačała havaryć.
Usio pačałosia ŭ 2017 hodzie, kali Ani było šeść hadoŭ. Ajčym pačaŭ začyniacca ź joj u pakoi. Spačatku jon raspranaŭsia pierad joj i dazvalaŭ rečy, jakija śledčyja kvalifikujuć jak «raspusnyja dziejańni». Pastupova jaho pavodziny stanavilisia ŭsio bolš śmiełymi. Urešcie dajšło da seksualnych kantaktaŭ.
Kali dziaŭčynka supraciŭlałasia, jon užyvaŭ siłu, kab utrymać jaje ŭ pakoi. Taksama pahražaŭ joj emacyjna: kazaŭ, što praź jaje «niepasłuchmianaść» pacierpiać chatnija žyvioły, a taksama što jon zabje jaje maci i bratoŭ.
Śledstva vyśvietliła, što maci Ani ŭsio viedała. Bolš za toje, jana sama padładžvała situacyi tak, kab dačka zastavałasia z ajčymam sam-nasam. Kali dziaŭčynka nie chacieła, maci cisnuła na jaje emacyjna abo siłaj zaciahvała ŭ pakoj.
Tak Ania šeść hadoŭ zastavałasia sam-nasam sa svajoj dramaj. Kali jana ŭrešcie davieryłasia ciotcy, taja adrazu paviedamiła ŭ palicyju. Maci i ajčyma zatrymali, i ŭ studzieni 2025 hoda abaich asudzili.
Sud pastanaviŭ, što maci nie vykanała abaviazku pa harantavańni biaśpieki dziciaci i navat sadziejničała złačyncu. Jaje asudzili na 6 hadoŭ turmy i zabaranili nabližacca da dački.
Vojciech atrymaŭ maksimalnaje pakarańnie — 15 hadoŭ źniavoleńnia. Ale jaho termin pavialičyli: vyśvietliłasia, što jon nie tolki pahražaŭ Ani hvałtam nad chatnimi žyviołami, ale i ździajśniaŭ jaho. Jon paviesiŭ na pavadku kata, u vyniku čaho žyvioła zadychnułasia. Za heta jamu dadali jašče adzin hod turmy. Za žorstkaje abychodžańnie z druhim katom i sabakam prysudzili dadatkovyja 6 miesiacaŭ.
Svoj termin Vojciech budzie adbyvać u papraŭčaj ustanovie terapieŭtyčnaha typu, a taksama pavinien prajści prymusovaje lačeńnie ŭ psichijatryčnaj klinicy. U červieni 2025 hoda prysudy ŭ dačynieńni da abaich nabyli zakonnuju moc. Ich unieśli ŭ rejestr seksualnych złačyncaŭ.
Apieku nad Aniaj i jaje bratami ŭziała na siabie ciotka Bieata.
Kamientary