Stała viadoma, čym ciapier zajmajecca špijon Marsalek, jaki 5 hadoŭ tamu ŭciakaŭ z Aŭstryi ŭ Rasiju praź Biełaruś
Aŭstryjec Jan Marsalek, były apieracyjny dyrektar niamieckaj kampanii Wirecard i adzin sa złačyncaŭ, jakich najbolš šukajuć u śviecie, ciapier žyvie ŭ Maskvie i faktyčna nie chavajecca, daviedałasia vydańnie The Insider.
Paśla vyjaŭleńnia ŭ kampanii Wirecard finansavaj dzirki ŭ pamiery 2 miljardy dalaraŭ Jan Marsalek uciok z Hiermanii ŭ Rasiju, pry hetym pieravałačnaj bazaj dla hetaha była Biełaruś.
U Rasii Marsalek pamianiaŭ źniešnaść (pierasadziŭ vałasy, adraściŭ baradu) i pašpartnyja źviestki. Jon vykarystoŭvaje falšyvyja dakumienty, u tym liku bielhijski pašpart na imia «Alaksandra Šmita» i inšyja psieŭdanimy.
Adzin ź psieŭdanimaŭ, pra jaki raniej nie było viadoma, — Alaksandr Nialidaŭ, jaki naradziŭsia 22 lutaha 1978 hoda ŭ Ryzie. Takoha realnaha čałavieka, jak śćviardžajecca, prynamsi ŭ Rasii nikoli nie isnavała.
U Maskvie Marsalek žyvie razam sa svajoj dziaŭčynaj Taćcianaj Śpirydonavaj, jakaja źjaŭlajecca supracoŭnicaj FSB. Jana maje dośvied pracy ŭ mižnarodnych strukturach i dostup da sakretnaj infarmacyi, a taksama razam z Marsalekam udzielničała ŭ jaho špijonskich apieracyjach. Z 2016 hoda ŭ jaje ŭžo byŭ dypłamatyčny pašpart i dostup da sakretnych źviestak. Jana nie tolki kachanka, ale i apieratyŭny partnior Marsaleka ŭ vykanańni śpieczadańniaŭ.
Marsalek raniej byŭ zavierbavany rasijskim HRU, ale z kanca 2021 hoda jaho dziejnaść usio bolš intehravanaja z FSB. Jon rehularna źjaŭlajecca na Łubiancy, faktyčna pracujučy z arhanizacyjaj na pastajannaj asnovie. U jaho jość šyrokaja sietka kantaktaŭ u Jeŭropie, Livii, Centralnaj i Paŭdniova-Uschodniaj Azii, jakaja robić jaho kaštoŭnym aktyvam dla rasijskich śpiecsłužbaŭ.
Z Maskvy Marsalek arhanizoŭvaŭ špijonskija apieracyi ŭ Jeŭropie. Jon kantralavaŭ zbor techniki, uklučajučy smartfony i noŭtbuki, jakija vykarystoŭvalisia dla adsočvańnia asob, što cikavyja FSB, u tym liku žurnalistaŭ Ramana Dabrachotava i Chrysta Hrozieva. Dla hetaha jon vykarystoŭvaŭ svaich pamočnikaŭ, u tym liku byłych supracoŭnikaŭ śpiecsłužbaŭ i kurataraŭ u Aŭstryi i Turcyi.
Jan Marsalek taksama aktyŭna ŭdzielničaje ŭ vajennych apieracyjach va Ukrainie. Zhodna z telefonnymi bilinhami, jon nieadnarazova znachodziŭsia na akupavanych terytoryjach i pobač z zonami bajavych dziejańniaŭ. Marsalek nasiŭ vajskovuju amunicyju i byŭ u kampanii rasijskich śpiecnazaŭcaŭ. Krynicy ŭ rasijskich śpiecsłužbach paviedamlajuć, što jon braŭ udzieł u bajavych zadańniach, ale dakładnyja detali nie raskryvajucca.
Akramia taho, Marsalek vykarystoŭvaje svaju prahu ryzyki i adrenalinu dla inšych prajektaŭ: naprykład, u Livii jon sprabavaŭ arhanizavać «čałaviečaje safary», pradajučy dostup da videakamier vajskoŭcaŭ, kab ludzi mahli «vyžyvać» u bajavych umovach za hrošy.
U jaho dziejnaści zaŭsiody jość elemient dakumientavańnia: pajezdki va Ukrainu rabilisia ŭ supravadžeńni fatohrafa Siarhieja Biarmienćjeva.
Aŭstryjski miljanier, jakoha rasšukvaje Interpał, uciakaŭ praź Minsk
Finansavy machlar Marsalek, jaki moh być u Biełarusi, pierabraŭsia ŭ Rasiju
Finansavy machlar, jaki moža viedać formułu «Navička», moža chavacca ad niamieckaha pravasudździa ŭ Biełarusi — ŚMI
Jak na zamovu FSB płanavali vykraści Chrysta Hrozieva — detali špijonskaj apieracyi, jakaja ciahnułasia dva hady
Ciapier čytajuć
Aryna Sabalenka vyjšła da minčukoŭ u atačeńni vaśmi achoŭnikaŭ VIDEA8
Kamientary