Byłaja palitźniavolenaja ź Biełarusi trapiła ŭ zbornuju Polščy pa futbole siarod emihrantaŭ

Unity Euro Cup — futbolny turnir, arhanizavany sumiesna UEFA i Upraŭleńniem Viarchoŭnaha kamisara AAN pa spravach biežancaŭ (UNHCR). Jaho meta — intehracyja biežancaŭ u miascovyja supolnaści praz sport. Hulni prachodziać u farmacie 7 na 7: kožnaja kamanda składajecca ź siami biežancaŭ i čatyroch pradstaŭnikoŭ krainy, jakaja ich prymaje, pry hetym u składzie pavinna być nie mienš za try žančyny.

U 2025 hodzie turnir prachodzić z 14 pa 16 kastryčnika ŭ Niderłandach, u im udzielničajuć 18 kamand. U składzie zbornaj Polščy, akramia palakaŭ, vystupajuć pradstaŭniki Afhanistana, Siryi i Biełarusi.

Kamanda nie zdoleła vyjści ŭ płej-of. Akramia Maryi, za zbornuju Polščy taksama hulaŭ adzin sa stvaralnikaŭ kłuba «Pahonia» Anton Łahviniec.

Maryja Babovič zajmałasia futbołam na amatarskim uzroŭni jašče ŭ Biełarusi, a paśla pierajezdu ŭ Polšču adnaviła treniroŭki.

«Užo dva hady ja hulaju ŭ Etnoliga ŭ Polščy, dzie vystupajuć mihranty i mihrantki z roznych krain śvietu. Čatyry miesiacy tamu daviedałasia pra turnir u Niderłandach dla mihrantaŭ, prajšła adbor i trapiła ŭ kamandu. Dva miesiacy my treniravalisia — i adpravilisia na spabornictvy», — raskazvaje Maryja.

Biełaruska pryznajecca, što była ŭražanaja ŭzroŭniem arhanizacyi i staŭleńniem da ŭdzielnikaŭ zbornaj. Usim hulcam u Polščy vydali poŭny kamplekt formy — jak u nacyjanalnaj zbornaj.

«Toje, što formu treba viarnuć paśla turniru, mianie nie chvaluje. Hałoŭnaje — udałosia vystupić na takim uzroŭni. Raniej ja navat maryć pra heta nie mahła», — kaža Maryja.

Maryja Babovič była zatrymanaja 9 vieraśnia 2020 hoda kala stancyi mietro «Puškinskaja» ŭ Minsku za nadpis na tratuary «Nie zabudziem». Spačatku suprać jaje raspačali kryminalnuju spravu pa artykule 339 Kryminalnaha kodeksa («Chulihanstva, ździejśnienaje hrupaj asobaŭ»). Praź niekalki dzion jaje adpuścili, ale paźniej znoŭ vyklikali ŭ milicyju i aznajomili z pastanovaj pa artykule 341.

Abvinavačańnie paźniej pierakvalifikavali na č. 2 art. 339 i č. 2 art. 218 KK («Naŭmysnaje źniščeńnie albo paškodžańnie majomaści z bujnoj škodaj»), paśla čaho Maryju znoŭ zatrymali i pakinuli pad vartaj u SIZA Žodzina da suda.

Sud Frunzienskaha rajona Minska ŭ śniežni 2020 hoda razhladaŭ spravu razam z palitviaźniem Maksimam Paŭluščykam. Sudździa Alina Kaśjančyk admoviłasia ad abvinavačvańnia pa č. 2 art. 218. U vyniku Maryju 8 śniežnia 2020 hoda asudzili na paŭtary hady abmiežavańnia voli biez nakiravańnia ŭ papraŭčuju ŭstanovu — z adbyvańniem pakarańnia doma («chatniaja chimija»). Nie adbyŭšy hetaha terminu da kanca, jana pakinuła Biełaruś. 

• 6
• 0
• 1
• 0
• 0
• 0
• 0
• 0