Ci sapraŭdy treba namylvać hałavu dvojčy?

Na asnovie paradaŭ śpiecyjalistaŭ žurnalisty The New York Times vyłučyli try asnoŭnyja prykmiety taho, što vam varta myć hałavu ŭ dva etapy.

1. Vašy vałasy chutka stanoviacca tłustymi

Kali karani vałasoŭ vyhladajuć niaśviežymi i źlipłymi ŭžo praź dzień-dva paśla myćcia, navat kali končyki zastajucca suchimi, dvajnoje namylvańnie moža vypravić situacyju.

Pa słovach chimika-technołaha Krupy Kiestłajn, pieršaje myćcio razburaje pavierchnievy płast tłušču i brudu. Paviarchoŭna-aktyŭnyja rečyvy źviazvajuć «ciažkija» zabrudžvańni, dazvalajučy padčas druhoha naniasieńnia šampuniu dabracca niepasredna da skury hałavy i ačyścić stryžni vałasoŭ.

Hłybokaje ačyščeńnie skury krytyčna važnaje, bo nazapašvańnie siebumu ci skuranoha tłušču i potu moža pryvieści da zapaleńniaŭ, śvierbu i navat zapavoleńnia rostu vałasoŭ.

2. Vy vykarystoŭvajecie šmat srodkaŭ dla ŭkładki

Pryncyp tut padobny da dvajnoha ačyščeńnia tvaru paśla makijažu. Kali ŭ vašym arsienale rehularna prysutničajuć suchi šampuń, łak, hieli, vosk albo hustyja alei, adnaho namylvańnia budzie niedastatkova.

Pieršaja porcyja pieny zmyvaje sami pradukty stajlinhu, a druhaja — užo čyścić vałasy i skuru. Kali nie vydalić reštki srodkaŭ całkam, vałasy ź ciaham času stanuć ćmianymi i suchimi. Bolš za toje, napłastavańni praduktaŭ pieraškadžajuć praniknieńniu vilhaci i kandycyjanujučych rečyvaŭ u strukturu vołasa, što z časam pryvodzić da suchaści, krochkaści i pavialičvaje vierahodnać ich łomkaści.

3. Vy myjecie hałavu redka

Mietad paŭtornaha namylvańnia taksama aktualny dla tych, chto addaje pieravahu doŭhim intervałam pamiž myćciom (naprykład, kab zachavać składanuju pryčosku abo kosy). Čym daŭžej vy nie myjecie hałavu, tym bolš tłušču, pyłu i admierłych kletak nazapašvajecca na pavierchni. Kab efiektyŭna vydalić šmatdzionnaje napłastavańnie i paźbiehnuć razdražnieńnia skury, adnarazovaj pracedury časta byvaje mała.

Ci jość škoda ad dvajnoha myćcia?

Kali vy nie adnosiciesia da pieraličanych vyšej katehoryj, ale ŭsio roŭna lubicie myć hałavu dvojčy, vialikaj biady ŭ hetym niama. Adnak varta ŭvažliva sačyć za reakcyjaj arhanizma.

Dermatołahi papiaredžvajuć, što praźmiernaje ačyščeńnie moža zmyć naturalny achoŭny płast i pierasušyć vałasy i skuru hałavy. Kali vy zaŭvažyli, što paśla dvajnoha myćcia vałasy stali žorstkija i suchija (byccam chruściać) abo skura hałavy vyhladaje razdražnionaj — heta sihnał, što vam bolš pasuje adnarazovaje myćcio.

• 11
• 0
• 3
• 3
• 2
• 0
• 0
• 0