Ukraina pryhraziła bajkotam Paralimpijady-2026 praz dopusk Biełarusi i Rasii sa ściaham i himnam
Ministerstva zamiežnych spraŭ Ukrainy vystupiła z zajavaj, u jakoj pahražaje abviaścić bajkot praz dopusk Biełarusi i Rasii sa ściaham i himnam. U viedamstvie zaklikali inšyja krainy prapuścić cyrymoniju adkryćcia Paralimpijady-2026. Na hulni było dapuščana čaćviora biełarusaŭ i šaściora rasijan. Jany źjaviacca na spabornictvach ź dziaržaŭnaj simvolikaj.
«Rašeńnie dapuścić Rasiju i Biełaruś da Paralimpijskich hulniaŭ pad nacyjanalnymi ściahami vyklikaje abureńnie. Jano prynižaje paralimpijskuju supolnaść i ŭsiu Ukrainu, padryvaje davier da mižnarodnaha sportu.
My zaklikajem Mižnarodny paralimpijski kamitet i arhanizacyjny kamitet hulniaŭ pierahledzieć rašeńnie ab dopusku rasijan i biełarusaŭ pad nacyjanalnaj simvolikaj. My čakajem zabarony dziaržaŭnaj simvoliki Rasii i Biełarusi na Paralimpijadzie. My prosim partnioraŭ dziejničać pryncypova.
Kali heta haniebnaje rašeńnie nie budzie pierahledžana, ukrainskija słužbovyja asoby nie pajeduć na Paralimpijskija hulni. My nie budziem prysutničać na cyrymonii adkryćcia. My taksama nie budziem naviedvać inšyja aficyjnyja mierapryjemstvy. Zaklikajem pradstaŭnikoŭ uradaŭ krain svabodnaha śvietu nie naviedvać cyrymoniju adkryćcia i inšyja mierapryjemstvy ŭ ramkach Paralimpijskich hulniaŭ. Ukraina praciahnie pracu na ŭsich mižnarodnych placoŭkach, kab adnavić spraviadlivaść. My abaraniajem sumlenny sport. My abaraniajem hodnaść ludziej», — paznačana ŭ tekście zajavy MZS Ukrainy ŭ sacyjalnych sietkach.
U pačatku tydnia stała viadoma, što čatyry biełaruskija i šeść rasijskich spartsmienaŭ zmohuć vystupić pad svaimi dziaržaŭnymi ściahami na Paralimpijskich hulniach 2026 hoda ŭ Miłanie i Karcina d'Ampieca.
Čatyry biełaruskija kvoty pryznačanyja dla łyžnych honak. Rasija atrymała pa dva miescy ŭ harnałyžnym sporcie, łyžnych honkach i snaŭbordzie.
Paralimpijada projdzie z 6 da 15 sakavika ŭ Miłanie i Karcinie d'Ampieca. Spartsmieny prymuć udzieł pa šaści vidach sportu ŭ dźviuch katehoryjach: vidy sportu na śniezie (hornyja łyžy, biehavyja łyžy, bijatłon i snaŭbord) i vidy sportu na lodzie (chakiej na saniach i kiorlinh na vazkach).
Padčas Paralimpijady-2022 (4—13 sakavika 2022) biełaruskija i rasijskija spartoŭcy byli adchilenyja ad spabornictvaŭ z-za pačatku poŭnamaštabnaj vajny. Pryčym jany byli adchilenyja za dzień da pačatku spabornictvaŭ.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ1
Kamientary
pakul bolš nahadvaje chajp i ńjuśmiejkinh.