«Mnie nie varta było pić». Topavaja aŭstralijskaja žurnalistka vybačyłasia za pjany repartaž z Alimpijady
Viadomaja aŭstralijskaja teležurnalistka Danika Mejsan pryniesła prabačeńni hledačam paśla taho, jak vyjšła ŭ efir z repartažam ź zimovaj Alimpijady ŭ Italii ŭ niećviarozym stanie. Videazapis hetaha staŭ virusnym u sacsietkach i vyklikaŭ u Aŭstralii ahulnanacyjanalnuju dyskusiju, da jakoj dałučyŭsia i premjer-ministr krainy, piša Bi-bi-si.
Mejsan źjaviłasia ŭ efiry telešou Today na Dziaviatym kanale ŭ sieradu ranicaj (u toj momant u Miłanie byŭ jašče viečar). Joj było vidavočna ciažka vymaŭlać tekst, žurnalistka pastajanna ŭśmichałasia i błytała słovy.
«Nu ŭvohule, cana kavy tut nasamreč narmalnaja, ale voś da cany kavy ŭ ZŠA nam daviadziecca pryvyknuć, — skazała jana. — Nie viedaju nakont ihuan, što tam ź imi ŭ nas było (pa ŭsioj vierahodnaści, hetych žyvioł u efiry raniej zhadvali viadučyja telešou — Bi-bi-si)».
Dalej jana, zapinajučysia i błytajučy Vialikabrytaniju z ZŠA, raskazała pra aŭstralijskija spartyŭnyja naviny. Na fonie jaje repartažu byŭ čuvać śmiech u studyi.
«Maroznaje nadvorje — heta, kaniešnie, niešta asablivaje, — prakamientavaŭ jaje ŭklučeńnie viadučy prahramy Karł Stefanovič. — Vusny prosta zamiarzajuć».
Zapis z Mejsan chutka razyšoŭsia ŭ sacyjalnych sietkach i vyklikaŭ ažyŭlenyja kamientary žycharoŭ krainy.
«Jana małajčyna, ničoha drennaha tut niama. Vidać, što joj tam vielmi viesieła», — napisaŭ adzin z karystalnikaŭ sietki Ch. «Ź jaje zdaroŭjem usio ŭ paradku, jaje treba nieadkładna zvolnić. Heta poŭny nieprafiesijanalizm», — napisaŭ jašče adzin čałaviek.
U sprečku ŭklučyŭsia navat premjer-ministr Aŭstralii Entani Albanieze. «Ja za Daniku, — napisaŭ jon. — Jana małajčyna. Jana ŭ Italii… i, napeŭna, prosta stamiłasia. Roźnica ŭ časie vialikaja, heta, vierahodna, i paŭpłyvała na jaje».
Adnak u čaćvier ranicaj Mejsan znoŭ vyjšła ŭ efir i pryznała, što sprava była nie tolki ŭ stomlenaści.
«Całkam biaru vinu na siabie, takija maje pavodziny byli niedapuščalnymi», — skazała jana, dadaŭšy, što joj soramna za toje, što zdaryłasia.
Paśla zvyčajnaha apoviadu pra spartyŭnyja naviny jana spytała, «ci moža prynieści prabačeńni», i padziakavała hledačam, jakija turbavalisia za jaje.
«Sa mnoj usio ŭ paradku, mnie tolki, napeŭna, trochi soramna, — skazała žurnalistka. — Razumiejecie, ja prosta zusim niapravilna acaniła situacyju. Mnie nie varta było pić, asabliva ŭ hetych umovach. Tut chałodna, my znachodzimsia na vyšyni, a ja jašče i nie paviačerała, heta taksama nie dapamahło. Tak što, jak ja ŭžo skazała, ja prynošu najhłybokija prabačeńni i chaču padziakavać usim, chto napisaŭ mnie».
Viadučaja prahramy Today Dženi Azapardzi adkazała joj: «My viedajem, jak dobra ty pracuješ, Danika».
Danika Mejsan — adna z samych viadomych u Aŭstralii spartyŭnych žurnalistak, siarod inšaha jana aśviatlaje vielmi papularnyja ŭ krainie matčy pa rehbi.
Zahinuŭ biełaruski dobraachvotnik Vasil «Dzir» Rapicki11
Kamientary