Pra toje, što staršynia likvidavanaj u Biełarusi AHP i były palitviazień Mikałaj Kazłoŭ pakinuŭ terytoryju Biełarusi, paviedamili jahonyja paplečniki pa partyi. Nieŭzabavie jon maje namier dać pres-kanfierencyju.
Mikałaj Kazłoŭ vyjšaŭ na volu bolš za hod tamu, u lipieni 2024 hoda.
Pieršy raz jaho asudzili ŭ žniŭni 2021 hoda da troch miesiacaŭ aryštu. Palityka pryznali vinavatym pa č. 1 art. 407 Kryminalnaha kodeksa za razhałašeńnie źviestak pavodle kryminalnaj spravy suprać Kaardynacyjnaj rady, ale kankretnyja epizody abvinavačvańnia nieviadomyja, bo sud prachodziŭ u zakrytym režymie. Byŭ vyzvaleny 26 sakavika 2022 hoda pa zakančeńni terminu.
27 lipienia 2022 hoda Kazłova znoŭ zatrymali. Pavodle abvinavačańnia, Kazłoŭ, jaho paplečnicy Antanina Kavalova i Aksana Alaksiejeva 23 žniŭnia 2020 hoda «publična vykrykvali łozunhi, hučna apładziravali, znachodzilisia na prajeznaj častcy, čym błakavali i pieraškadžali ruchu transpartu ŭ Minsku, u tym liku haradskoha pasažyrskaha transpartu «Minsktransa»
Jamu dali dva z pałovaj hady pazbaŭleńnia voli ŭ kałonii va ŭmovach ahulnaha režymu. Termin za kratami jon adbyŭ całkam.
Da taho, jak pryjści ŭ palityku, ciapier 58‑hadovy Mikałaj Kazłoŭ na praciahu 17 hadoŭ pracavaŭ staršym opierupaŭnavažanym pa asabliva važnych spravach kryminalnaha vyšuku UUS Centralnaha rajona Minska, za hetyja hady raskryŭ sotni złačynstvaŭ. Dasłužyŭsia da zvańnia padpałkoŭnika milicyi, jakoha ŭ 2021 hodzie Łukašenka jaho pazbaviŭ svaim ukazam.
Padčas parłamienckich vybaraŭ 2008 hoda, achoŭvajučy paradak na vybarčym učastku, Kazłoŭ abvinavaciŭ staršyniu ŭčastkovaj kamisii Alaŭcinu Hładkuju i namieśnika staršyni Alaksieja Piatnicu ŭ ździajśnieńni falsifikacyi, kali jany ŭvajšli ŭ apiačatany pakoj i ŭkinuli ŭ skryniu dla hałasavańnia pačak biuleteniaŭ. Kazłoŭ napisaŭ pra heta rapart načalstvu, a kali zachadaŭ nichto nie zrabiŭ, paviedamiŭ u niezaležnuju presu.
Kazłova prasili adklikać rapart, kab zamiać spravu, ale jon prajaviŭ pryncypovaść i nieŭzabavie pajšoŭ u zapas. Nieŭzabavie jon ustupiŭ u Abjadnanuju hramadzianskuju partyju, a ŭ 2018 hodzie jaje ŭznačaliŭ. U 2020 hodzie jon byŭ na vybarach davieranaj asobaj Śviatłany Cichanoŭskaj.
Mikałaj Kazłoŭ byŭ łaŭreatam premii imia Džordža Buša i Marharet Tetčer «Za svabodu».
Taksama jon byŭ pryznany «Čałaviekam hoda-2010» pa viersii «Našaj Nivy». Arhumientujučy svoj vybar, redakcyja tady pisała: «Bieź jaho i biez takich, jak jon, napeŭna, nie było b i manifiestacyi 19 śniežnia, śviet nie pabačyŭ by sutnaści biełaruskich «vybaraŭ».
Ciapier čytajuć
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał44
Kamientary
Nie. Daviałosia b taksama biehčy lasami i bałotami za miažu.